Adlezenn 19 - Bibl Koad 21: Ar Bibl e Brezhoneg evit ar Vretoned

Pennad 19 Kêrioù-repuiñ. An testoù

¹ P'en devo distrujet an AOTROU da Zoue a-zirazout ar broadoù, a ro dit an AOTROU da Zoue o douar, pa berc'henni o bro hag e vi o chom en o c'hêrioù hag en o ziez,

² e lakai a-du teir c'hêr e-kreiz ar vro en devo an AOTROU da Zoue roet dit evit he ferc'hennañ.

³ Ober a ri hentoù hag e ranni e teir lodenn tiriad ar vro a roio dit an AOTROU da Zoue evel hêrezh, evit ma tec'ho eno ar muntrer.

⁴ Setu penaos e ri e-keñver ar muntrer a dec'ho eno evit saveteiñ e vuhez p'en devo lazhet e nesañ diratozh, hep kasoni outañ diagent,

⁵ evel pa'z a unan bennak gant e nesañ d'ar forest evit troc'hañ koad, ma lusk e zorn gant ar vouc'hal evit troc'hañ ur wezenn, hag e tistag an houarn diouzh an troad hag e tizh e nesañ, en doare ma varv. An den-se a dec'ho da unan eus ar c'hêrioù-se evit saveteiñ e vuhez,

⁶ gant aon na zeufe ar veñjer-gwad da redek war-lerc'h ar muntrer e-pad ma vez fuloret e galon, ma tapfe anezhañ ma vefe re hir an hent, ha na lazfe anezhañ petra bennak na vefe ket da varn d'ar marv, dre ma n'en doa bet kasoni ebet outañ diagent.

⁷ Setu perak e c'hourc'hemennan dit o lavarout: lakaat a ri a-du teir c'hêr.

⁸ P'en devo ledanaet an AOTROU da Zoue da harzoù, evel m'en deus touet da'z tadoù, ha m'en devo roet dit an holl vro en deus prometet reiñ da'z tadoù,

⁹ gant ma viri an holl c'hourc'hemennoù a gemennan dit hiziv ha ma ri diouto, evit karout an AOTROU da Zoue ha kerzhout atav en e hentoù, e lakai c'hoazh teir c'hêr war an teir-se,

¹⁰ evit na vo ket skuilhet gwad didamall e-barzh ar vro en devo an AOTROU da Zoue roet dit evel hêrezh, ha ne vi ket kablus a wad.

¹¹ Met p'en devo un den kasaet e nesañ, stegnet pechoù dezhañ, en em savet a-enep dezhañ, ha m'en devo skoet gantañ d'ar marv, mar tec'h en unan eus ar c'hêrioù-se,

¹² henaourien e gêr a gaso da gerc'hat anezhañ ac'hane, hag e lakaint anezhañ etre daouarn ar veñjer-gwad, evit ma varvo.

¹³ Da lagad a vo didruez hag e tilami diouzh Israel ar gwad didamall, hag e vi eürus.

¹⁴ Ne zilec'hi ket bonn da nesañ, bet lakaet gant ar re a vo a-raok dit en hêrezh az po bet er vro en devo an AOTROU da Zoue roet dit da berc'hennañ.

¹⁵ Un test hepken ne vo ket a-walc'h evit un torfed bennak pe evit ur pec'hed bennak, petore mank bennak a vefe graet; war gomz daou dest pe dri dest e vo talvoudek an dra.

¹⁶ Pa en em savo ur falstest a-enep unan bennak evit e damall a zisentidigezh,

¹⁷ an daou zen o devo enebet an eil ouzh egile en em ziskouezo dirak an AOTROU, dirak an aberzhourien ha dirak ar varnerien a vo en deizioù-se,

¹⁸ hag ar varnerien a reno un enklask gant evezh. Mar kavont penaos e vefe an test-se ur falstest, en defe testeniet e gaou a-enep e vreur,

¹⁹ neuze e reot dezhañ evel ma felle dezhañ ober d'e vreur. Evel-se e vo lamet an droug diouzh da greiz.

²⁰ Ar re all a glevo hag a zoujo, ne raint ken un hevelep tra fall ez touez.

²¹ Da lagad a vo didruez, buhez evit buhez, lagad evit lagad, dant evit dant, dorn evit dorn, troad evit troad.