2 Samuel 10 - Bibl Koad 21: Ar Bibl e Brezhoneg evit ar Vretoned

Pennad 10

¹ Goude-se e varvas roue mibien Ammon, hag Hanun e vab a renas war e lerc'h.

² David a lavaras: Madelezhus e vin e-keñver Hanun mab Nakash, evel m'eo bet e dad madelezhus em c'heñver. David a gasas e servijerien evit e frealziñ diwar-benn e dad. Ha servijerien David a zeuas da vro mibien Ammon.

³ Met pennoù mibien Ammon a lavaras da Hanun o aotrou: Ha soñjal a rez e vefe kaset frealzerien gant David evit enoriñ da dad? Ha n'eo ket evit imbourc'hiñ kêr, hag he spiañ, hag he distrujañ, e tegas David e servijerien da'z kavout?

⁴ Hag Hanun a dapas servijerien David, a douzas dezho an hanter eus o barv, a droc'has an hanter eus o dilhad betek krec'h an divorzhed, hag o c'hasas kuit.

⁵ Ha kement-se a voe lavaret da Zavid, a gasas tud en arbenn dezho, rak mezhek-tre e oa an dud-se. Ar roue a lavaras dezho: Chomit e Jeriko ken na vo bountet ho parv, ha neuze e tistroiot.

⁶ Mibien Ammon a welas e oant bet kasaus e-keñver David. Hanun ha mibien Ammon a gasas da-gichen ar Siriz eus Bet-Reob hag ar Siriz eus Zoba evit goprañ ugent mil den war droad, mil den e-kichen roue Maaka, ha daouzek mil den e-kichen tud Tob.

⁷ David, o vezañ klevet kement-se, a gasas Joab hag e holl arme, tud kadarn.

⁸ Mibien Ammon a yeas er-maez hag en em renkas evit an emgann a-dal d'an nor. Hag ar Siriz eus Zoba hag eus Reob, ha tud Tob ha Maaka a oa a-du war ar maez.

⁹ Joab, o welout e oa an arme troet a-enep dezhañ a-dreñv hag a-raok, a zibabas soudarded a-douez holl re wellañ Israel, hag o renkas a-enep ar Siriz,

¹⁰ hag e roas renerezh an nemorant eus ar bobl da Abishai e vreur, hag o renkas a-enep mibien Ammon.

¹¹ Hag e lavaras: Mar bez ar Siriz kreñvoc'h egedon, e teui da'm sikour, ha mar bez mibien Ammon kreñvoc'h egedout, me a zeuio da'z sikour.

¹² Bez kreñv, diskouezomp kalon evit hor pobl hag evit kêrioù hon Doue. Ra vo graet gant an AOTROU evel ma kavo mat.

¹³ Neuze Joab hag ar bobl a oa gantañ a dostaas evit stourm a-enep ar Siriz, met ar re-mañ a dec'has kuit dirazañ.

¹⁴ Mibien Ammon, o welout e tec'he ar Siriz, a dec'has kuit int ivez dirak Abishai, hag ez ejont e kêr. Joab a bellaas diouzh mibien Ammon hag a zistroas da Jeruzalem.

¹⁵ Ar Siriz, o welout e oant bet trec'het gant Israel, en em zastumas.

¹⁶ Hadadezer a gasas da gerc'hat ar Siriz a oa en tu all d'ar stêr. Shobak penn arme Hadadezer a rene anezho.

¹⁷ Kement-se a voe lavaret da Zavid, a zastumas holl Israel, a dremenas ar Jordan, hag a zeuas da Helam. Ar Siriz en em renkas a-enep David, hag e stourmjont en e enep.

¹⁸ Hag ar Siriz a dec'has dirak Israel. David a zistrujas seizh kant karr, ha daou-ugent mil marc'heger. Skeiñ a reas ivez war Shobak penn o arme, a varvas eno.

¹⁹ An holl rouaned a oa didndan Hadadezer, o welout e oant bet pilet gant Israel, a reas peoc'h gant Israel, hag e voent sujet dezhañ. Hag ar Siriz o doe aon da skoazellañ c'hoazh mibien Ammon.