HOSEA 2 - Bukuit Ne Tilil

¹ Omwachi ng'eetap kametwagikwok oleenji “Piikyuk,” ak omwachi chepkametwagikwok oleenji, “Che ki kiriiree.”

Pistoet ne po Israel, kergong'yennyi ak saruunennyi

² Oteechi kamenng'ung', oteechi amu ineendet koma ko osotyonnyu, ama aa manong'otyonnyi. Ingometo kugoinatosyekyik che mi togeennyi, ak ingometo ibeetapkei nooto mi tegeennyi.

³ Ngo ma noo, aregunee ngoroikyik ak amete kotebi aach ngor ko uu peetuut ne ki kisichei, ak ayai ineendet koigeit surkwen, ak agoochi ineendet koigei emet ne yaamaat, ak abare melelda.

⁴ Ma riiree lagokyik, amu icheeget ko lagogap kugoinatet.

⁵ Amu ki yaei kamet kugoinatet; ki yai teweernateet ineendet ne ki manachi icheek. Amu ki mwa kole, asuboti chamanikyuk, che koono amitwogikyuk ak peekyuk, koroorikyuk che po keechiirek ak mabuteekyuk, mwanikyuk ak tuguuk che aee.

⁶ Nooto anyun, ayiemee oreng'ung' katook, ak ang'oot ineendet, si ma nyoor ortinwekyik.

⁷ Isubi chamanikyik ko uu kotugul, ago ma nyooru icheek; ak cheeng'ei icheek, ago ma nyooru. Yeityo anyun komwa kole, awendi ak aweekyigei manong'otyonnnyu ne po tai amu ki agaigai eng' peetuusyechooto kosiir nguno.

⁸ Amu ma nai kole anee ne ki agoochini peek, ak divaik, ak mwanik, ak atesyi fedha ak thahabu che ki yae Baal.

⁹ Aweechi anyun peekyuk eng' peetuusyegap kesisyet, ak aweech divaikyuk eng' kasarta ne karuryo, ak arebee koroorikyuk che po keechiirek ak mabuteekyuk, che kota tugegei.

¹⁰ Ang'aanye teweernatennyi eng' taitap chamanikyik, ama piitu chii ne saru ineendet eng' eunnyu.

¹¹ Ageesu kogeny poiboiyennyi, igoorwekyik, peetuut ne kaleel arawet, sabatoisyekyik, ak tuiyosyekyik tugul che ki king'at.

¹² Ang'eme keetiikyik che po sabibuk ak mogoonikyik, che mwaei koleen, “Chu ko tuguuk che ki alena chamanikyuk.” Ayae tuguuchooto koek timiin, ak koam tyong'igap timiin.

¹³ Aipchini ineendet pireet agobo peetuusyegap Baalik, ye kibeelji `ineendet icheek nyamdutik, ak kolelesanjinegei munaokyik ak tuguukyik che po lelesta, ak kwo kosubot chamanikyik, ak koutyeno, mwaei Kamuktaindet ne Toroor.

Chamyetap Kamuktaindet ne Toroor eng' Israel

¹⁴ Nooto anyun, ogeero, agaigai ineendet ak amut kwo surkwen, ak amwachi ng'aleek che agaigae.

¹⁵ Ak agoochi ineendet mbareenikyik che po sabibuk eng' olooto, ak ayai atebweetap Akor koek kurgeetap kamang'unet. Iyanwa eng' olooto ko uu eng' peetuusyegap ming'inatennyi, ak ko uu eng' peetuut ne ki mong'u kotogosu eng' emetap Misiri.

¹⁶ Iguureno eng' peetuunooto “Manong'otyonnyu,” mwaei Kamuktaindet ne Toroor; ma iguureno Baal.

¹⁷ Amu aistoi kainaigap Baalik eng' kutinnyi ama kibwaati kogeny kainaikwak.

¹⁸ Eng' peetuunooto ayae arorutyet agobo icheek kobooto tyong'igap timiin ak toriitigap parak, ak tuguuk che ichuutegei ng'wony. Ak airii kwanget ak rotwetap chok, ak aiste lugeet eng' emet, ak agoochi koruiyo eng' chametapkei.

¹⁹ Ak atunin koigeny; ee, achobe atunin eng' imanda ak eng' kirwooget, ak eng' chamyet ne tala ak eng' rirenosyek.

²⁰ Achobe atunin eng' imanda; ak inai Kamuktaindet ne Toroor.

²¹ Ak tuun awolu eng' peetuunooto, mwaei Kamuktaindet ne Toroor. Awoljini kipsengwetisyek, ak kowolji icheek ng'wony;

²² ak kowolji ng'wony peek, ak divaik, ak mwanik, si kowolji chooto Jezreel.

²³ Ak agoole ineendet eng' emet; ak ariiree ineendet ne ki ma ki riiree; ak aleenji icheek che ki ma ko piikyuk, “Oo piikyuk;” ak kole “Ii Kamuktaindennyu.”