RUTH 1 - BUKUIT NE TILIIL Sireet ne Dutero Kanon

Kowendi `Elimelek ak koonnyi Moab

¹ Eng' peetuusyek che ki irwoochi kirwoogik, ko ki piit rubeet eng' emet. Ki wo chii ne po Bethlehem eng' Judah kwo komeny emetap Moab, ineendet ak osotyonnyi kobooto weeriikyik aeng'.

² Kainetap chiichooto ko ki Elimelek, ko osotyonnyi ko ki Naomi, ak weeriichooto aeng' ko ki Malon ak Kilion, che icheeget ko ki Epratik kobun Bethlehem eng' Judah. Ki it emetap Moab ak kotebee olooto.

³ Ki me Elimelek manong'otyotap Naomi ak ki ng'et Naomi ak weeriikyik aeng'.

⁴ Ki itun `weerchooto osotik eng' kwonyiigap Moab ne kainetap age ko ki Orpa, ko age ko ki Ruth. Ki meny olooto olo po kenyiisyek taman.

⁵ Ki pek ak icheek Malon ak Kilion, ak ki ng'et Naomi ineegei ama lagokyik aeng' anan manong'otyondennyi.

Koweeksei `Naomi ak `Ruth Bethlehem

⁶ Ki ng'eet ineendet anyun kobooto kwonyiigap weeriikyik komachei koweektagei eng' emetap Moab, amu kiga kogas komi emetap Moab kole ki korutoochi `Kamuktaindet ne Toroor piikyik ak kogoochi amitwogik.

⁷ Ki wo eng' komosta ne ki mi ak osotigap weeriikyik aeng', ak koba pandanywa koweektagei emetap Judah.

⁸ Ki leenji `Naomi osotichooto aeng' po weeriikyik, “Ingoweektagei age tugul kwo kootap kamennyi ak ingoyaiywok Kamuktaindet ne Toroor ne myee ko uu ye ki oyachi che ki kobek ak ko uu ye ki oyaiywo.

⁹ Ingogoonok Kamuktaindet ne Toroor onyooru kaalyeet, konyoor age tugul eng' okweek eng' kootap manong'otyondennyi.” Ki ng'utut icheek, ak ki waakyo koriiryo.

¹⁰ Koleenji `icheek ineendet, “Achicha, ki weeksei kebendi tugul ole mi piiguk.”

¹¹ Koleenji Naomi, “Obechigei tiibiikyuk. Amu nee si keebe tugul? Ta asiche weeriik alak che imuuchi koek manong'otaikwok?

¹² Oba tiibiikyuk, obechigei amu koaositu ak koma kituno. Agot ndata abwaati ale ta komi kamang'unet, ak asich manong'otyot kemouni ak anyooru weeriik,

¹³ ko tos ogen kot koechegitu? Tos otebii koma kitunook? Achicha tiibiikyuk! Ki kong'wanit miising' eng' anee kosiirook, amu ki konyaliila eutap Kamuktaindet ne Toroor.”

¹⁴ Ki testai kowaakyo icheek. Inga ki ng'utut `Orpa korgennyi po yugoi kosaiseret, ko ki nam `Ruth ak komeitoochi.

¹⁵ Koleenji `Naomi Ruth, “Keero, kagoweek kwondap pomurtang'ung' kwo ole mi piikyik ak kamuktaindennyi. Weektegei aginye! Isup ne po pomurtang'ung'.”

¹⁶ Ago ki wolji Ruth koleenji, “Amegimnjo ile abagachin anan ile aweek matkebe tuwai! Ole kewe, awendi, ak ole itebee atebee agane. Egu piiguk piikyuk, ak egu Kamuktaindeng'ung' Kamuktaindennyu.

¹⁷ Ole imechini, amechini, ak ketupchino yooto. Ingoyaiywo Kamuktaindet ne Toroor ko uu nooto, ak kotes kosiir, kobatee meet ineegei ne ibestoseech anee ak inyee.”

¹⁸ Kingo keer Naomi kole kiga kobegechi koba tuwai, ko mata komwachi kiy ineendet.

¹⁹ Ki pa anyun tuwai kot koit Bethlehem. Kingo it Bethlehem, komong' nganaseet komugul eng' poiboiyet ak kole kwonyiik, “Naomi niito iman?”

²⁰ Koleenji `ineendet icheek, “Moguureno Naomi (chebaibai)! Oguureno Marah (chepnereekya), amu ki koyaiywo ineendet Ne po Kamuktaet kiit ne ng'waan.

²¹ Ki awendi ko aa nyiitaat, ak kogomutwaa `Kamuktaindet ne Toroor kaa ami puch. Amu nee si oguureno Chebaibai ko ki kobaoryan Kamuktaindet ne Toroor kogikyo, ak konyaliila Ineendet Ne po Kamuktaet?”

²² Ki week anyun Naomi eng' emetap Moab kobooto Ruth cheptap Moab osotyotap weeriinnyi. Ki it Bethlehem ko katoygei kesisyetap baale.