NG'ANG'UTYET 11 - BUKUIT NE TILIIL Sireet ne Dutero Kanon

Paorinik aeng'

¹ Ak ki kigoono tegat ne uu kirokto: ak ki leenjo age, Ng'eet, ak ikwa hekaluutap Kamuktaindet, ak kapkorosuut, kobooto icheeget che saaei eng' olooto.

² Ago pagakte, amat ikwa seremut ne miitei Hekaluut saang'; amu ki kigoochi Pororyosyek: ak kotyechei eng' keelyekwak nganaseet ne tiliil eng' arawek artam ak aeng'.

³ Ak agoochini paorinikyuk aeng' komaoten peetuusyek eliphuut agenge pogol aeng' ak tamanwogik lo, kolaachi kuniok.

⁴ Chooto ko keetiik aeng' che po mseituni, ak keelyek aeng' che po taisyek, kotonondos eng' taitap Kiptaiyat ne po ng'wony.

⁵ Ak ngot komachei chii konyaliil icheek, komang'une maat kutusweekwak, ak kobar puunikwak: ak ngot komachei chii konyaliil icheek, kebarei ko uu niito matiny.

⁶ Tinyei chuuto kimnateet koger kipsengwet, si ma robon eng' peetuusyegap maonatennywa: ak kotinyei kimnateet kowal peek koek korotiik, ak kobir ng'wony eng' koroita age tugul, kotugul ko uu ye machei.

⁷ Ak ye tuun kagogees paornatennywa, koyai lugeet tyondo ne mang'une keriinget ne ma igoksei, ak koterteer icheek, ak kobar icheek.

⁸ Ak tebyei muuswekwak eng' ooreetap nganaseet ne oo, ne kiguure eng' kalewenet Sodom ak Misiri, ole kiga kigartate Kiptaiyannywa agine.

⁹ Ak keerei muuswekwak alak eng' piik ak ortinwek ak kutusweek ak pororyosyek eng' peetuusyek somok ak kebebertap peetuut, ama chamdoi ketup muuswekwak eng' kererit.

¹⁰ Ak poiboitu icheek che menyei ng'wony agobo icheeget, ak kogasegei; ak koyookyingei konunoik, amu ki inyalili maotichuuto aeng' icheek che menyei ng'wony.

¹¹ Ak ye kingo pata peetuusyechooto somogu ak kebeberta kochut icheek kabuusetap saboondo ne punu Kamuktaindet, ak kotononio eng' keelyekwak; ak konam kaiyweisyet ne oo icheek che ki keer.

¹² Ak ki kas kutit ne oo ne punu kipsengwet koleenji icheek, Otogosu oli. Ak kitogosta koba kipsengwet eng' pooldet; ak kogeerot icheek puunikwak.

¹³ Ak ki piit eng' sainooto potanet ne oo ne po emet, ak kiluul kebeberta agenge eng' taman ne po nganaseet; ak ki kibar eng' potanonooto piik eliphuusyek tisap; ak ki aragenso che kiga ng'et, ak ki igoochi toroornatet Kamuktaindet ne po kipsengwet.

¹⁴ Kagosiirto Nyalilda ne po aeng': ogeero, nyoonei Nyalilda ne po somok kochogu.

Iryageet ne po tisap

¹⁵ Ak ki kuut malaikaiyatap tisap; ak ki piit tweguunoik che eecheen eng' kipsengwet, ak ki mwa kole, “Kagoek laitornatetap ng'wony laitornatetap Kiptaiyandennyo, ak ne po Kristo; ak laitorani inee koigeny ak koigeny.”

¹⁶ Ak ki ibutyi ng'wony poisyek tiptemu ak ang'wan, che tebee taitap Kamuktaindet eng' ng'echerokwak che po toroornatet, ak kolas Kamuktaindet,

¹⁷ kole, “Kimwaun kongoi, ee Kiptaiyat Kamuktaindet, Ne po Kamuktaet, ne imi ak ki imi; amu ka inam kamuktaeng'ung' ne oo, ak ibou.

¹⁸ Ki nereekso pororyosyek, ak kagonyo nereeknateng'ung'. Kagoit peetuut ne kirwookyinee piik che ki kobek, ak peetuut ne kigoochinee otwogiguk maotik melekwek, ak piik che tiliileen ak icheek che iywei kaineng'ung', che mengeechen ak che eecheen; ak keng'em icheek che ng'emei ng'wony.”

¹⁹ Ak ki kiyaat hekaluutap Kamuktaindet eng' kipsengwet; ak ki took eng' hekalunnyi moingetap arorutyennyi; ak ki piit kalyelosyek, ak kutusweek, ak tuloosyek, ak potaneetap ng'wony, ak koik che eecheen che po ropta.