KAITOSYEK 5 - BUKUIT NE TILIIL Sireet ne Dutero Kanon

Tiliilindap Nganaseet

¹ Ki mwachi anyun `Kamuktaindet ne Toroor Musa koleenji,

² “Ng'at piigap Israel koisto age tugul ne tinyei mogondosaik eng' nganaseet, age tugul ne tinyei kusereet, ak age tugul ne kaing'wanitkei amu katiiny muusto.

³ Oiste koba saang'utap nganaseet chooto tugul che murenik ak kwonyiik; ma nyolu komurwon nganasennywa, ole amenye eng' kwenunnywa.”

⁴ Ki yai piigap Israel ko uu nooto; ki isto icheek koba saang'utap nganaseet. Ki yai ko uu nooto anyun piigap Israel ko uu ye ki mwachi `Kamuktaindet ne Toroor Musa.

Ng'ang'eetap tengekto

⁵ Ki ng'alaalji `Kamuktaindet ne Toroor Musa koleenji,

⁶ “Mwachi piigap Israel leenjin: Ye kachalwogenji muren anan ko kwony chii age tugul, koleelji Kamuktaindet ne Toroor, konamei ng'oogisto chiichooto,

⁷ ak nyolu kong'aany ng'oogisto ne koyai, ak igoitoi kiy ne yamegei ak ng'oogisooto ak kotesyi kebebertap muut, yeityo kogoochi chiichooto kichalwogenji.

⁸ Ago ngo ma tinyei chiichooto chiito ne tilya ne kimuuchi keeweekyi tuguuchooto po ng'oogisto, ko tuguuchooto kiyaaktoe ng'oogisto kigoochin Kamuktaindet ne Toroor. Kigoochin Kiptaiyat si kobiit kobunji tisiindet kobooto mengitap kagaigaet ne kiyachine ineendet kagaigaet.

⁹ Punjin tisiindet kagoochinoik tugul che tiliileen che po piigap Israel che igoochin icheek ineendet.

¹⁰ Ak punjin tisiindet tuguuk che itabaanatiin; punjin ineendet kiy age tugul ne igoochin chii.”

Ng'atuutik agobo ibeetapkei

¹¹ Ki ng'alaalji anyun `Kamuktaindet ne Toroor Musa koleenji,

¹² “Mwachi piigap Israel leenjin, Ngo kesesen osotyotap chii, ak koek kateweerin eng' manong'otyonnyi,

¹³ ak ngot koipkei ak chii ak koung'ak kioto eng' manong'otyondennyi, ko kagomurwonitkei ineendet nganda ma piit chii ne paoryanjin anan chii ne ki namji yautyonooto.

¹⁴ Ngot koam ng'etkong' chiichooto eng' saboondanyi ak konereech agobo osotyonnyi amu koimurwongei anan ngo nyoor kang'unyet chiichooto eng' saboondanyi ak konereech agobo osotyonnyi nganda ma imurwongei osotyondonooto,

¹⁵ komutyin anyun chiichooto osotyonnyi tisiindet ak koip kagoochinennyi agobo osotyondonooto. Ibu ineendet kererutik che po peegap sairi che ng'ootiin. Ma roong'jin ineendet mwaita anan konde tuguuk che nyamdut, amu niito ko kagoochinetap peek che po ng'etkonda, kagoochinetap kabwaatet ne kibwaatee tengekto.

¹⁶ “Imutu anyun `tisiindet osotyondonooto koriik ak konde taitap Kamuktaindet ne Toroor.

¹⁷ Yeityo konam tisiindet peek che tiliileen eng' taabeet ne ki kiyae ng'ung'unyek ak komugut ng'ung'unyek che mi koot ng'wony ak konde peechooto.

¹⁸ Ye kagonde tisiindet kwonyooto taitap Kamuktaindet ne Toroor, kotyach suumeekyik ak konde eunnyi kagoochinetap peek che po kabwaatet, peechooto po kagoochinetap ng'etkong'. Ak eng' yooto kotinyei tisiindet peek eng' eunnyi che po ng'wanindo che ibu chubisyet.

¹⁹ Yeityo komwachi tisiindet kwonyooto koyasyo kole: Ngo ma oipkei ak chii anan ngo ma igesesenote imi pounatetap manong'otyondeng'ung', ityagage anyun eng' peechu po ng'wanindo che ibu chubisyet.

²⁰ Ago ngo ki igesesen iman, imang'une pounatetap manong'otyondeng'ung', ak ngo ki imurwongei ak ki oipkei ak chii age ne ma manong'otyondeng'ung',

²¹ ko ngo mwachi anyun tisiindet kwonyooto koyasyo kayasyoet ne po chubisyet, ak koleenji tisiindet ineendet, Ingoyain Kamuktaindet ne Toroor iegu ne chuboot ak ne iteweerat eng' piiguk ye yaei ineendet konun ak kosoonen moeng'ung'.

²² Ingochut peechu ibu chubisyet agutaniguk ak kosoonen ak konun moeng'ung'. Wolu kwonyooto kole, ‘Uu nooto, uu nooto.’

²³ “Ye ibata ko sirchin tisiindet chubisyosyechuuto kitabuut ak koundo koba peegap ng'wanindo.

²⁴ Igoochin kwonyooto koe peechooto po chubisyo, ak pendi peechooto poortanyi ak kogoochi ng'wanindo.

²⁵ Inemu tisiindet kagoochinetap peek che po ng'etkong' eng' eutap kwonyooto ak koongoi eng' taitap Kamuktaindet ne Toroor, ak koip kobwa kaptisisyet.

²⁶ Muguti tisiindet kagoochinonooto po peek konyi euut koek kabwaatet ak kobeel eng' kaptisisyet, ak ye ibata kogoochi kwonyooto peek koe.

²⁷ Ye kagogoochi koe peechooto, kobiitu anyun ko uu ni, ngo koimurwongei kwonyooto ak ngo ko koteweer manong'otyondennyi, koba anyun poortanyi peechooto ibu chubisyet ak kogacho ng'wanindo; kosooneni ak konun moennyi ak koek ne chuboot ineendet eng' piikyik.

²⁸ Ago ngot kotom komurwongei kwonyooto ak ko tiliil, kotyagat anyun ak komuuchi komanach.

²⁹ “Niito ng'atuutyetap ng'etkonda ye kagesesen osotyot ye mi pounatetap manong'otyondennyi ak komurwongei,

³⁰ anan ye kaam chii ng'etkong' eng' saboondanyi ak konereech agobo osotyonnyi. Imutu `manong'otyonnyi ineendet taitap Kamuktaindet ne Toroor ak koyachi tisiindet ng'atuutyoniito tugul.

³¹ Ago ma nyooru chiichooto yaityo, ago ibei kwonyooto yaityennyi.”