JOSHUA 8 - BUKUIT NE TILIIL Sireet ne Dutero Kanon

Keng'emei nganaseetap Ai

¹ Ki mwachi `Kamuktaindet ne Toroor Joshua koleenji, “Meiywei anan komein mugulelel, ago imut piik tugul che po lugeet ak ong'eetyee otogoste Ai. Keero, kaande eung'ung' laitoryatap Ai kobooto piikyik, nganasennyi ak emennyi.

² Iyachini Ai ak laitoryandennyi ko uu ye ki iyachi Jeriko ak laitoryandennyi. Ago tuguukyik ak tuukyik che kiluulei, oipchinigei kobunjook koek parunenik. Ng'at anyun piik koribisyo eng' ole po nganaseet let.”

³ Ki ng'eet anyun Joshua ak piik tugul che po lugeet koba kobookyi Ai. Ki lewen `Joshua piik eliphuusyek sosom, murenik che kiimeen che nyigoonen ak koyookto koba kemoi.

⁴ Ak kong'at icheek koleenji, “Ogas komyee; oribistosi si obookyi nganaseet, eng' nganaseet ole po let; amat olooegitu miising' eng' nganasanooto, ago ochoboge okweek tugul.

⁵ Ariikyini nganaseet anee ak piik tugul che mi kobooto, ak ye mong' kobokyech, ko uu eng' tai, kemwei eng' tainnywa.

⁶ Mongu icheek koonwech kot kirete eng' nganaseet, amu mwaei koleen, ‘Kamweenech, ko uu yuginye.’ Ye kimwei ko uu nooto eng' tainnywa;

⁷ ong'eetyee eng' ribiseet ak onam nganaseet, amu indoi `Kamuktaindet ne Toroor Kamuktaindeng'wong' eunekwok.

⁸ Ye kaonam nganaseet, obeel; oyaei ko uu ng'olyootap Kamuktaindet ne Toroor; ogeero, kaang'atak”

⁹ Ki iyookto anyun `Joshua icheek koba; ak ki pa koribisyo kotebee kwenutap Bethel ak Ai, komostap cherongo ne po Ai; ago ki ru Joshua ole mi piik kemounooto.

¹⁰ Ki ng'eet Joshua karon miising' ak koyum piik, kitogosta ineendet ak poisyegap Israel kondoe piik koba Ai.

¹¹ Ki togosta piik tugul che po lugeet che ki mi kobooto ineendet ak ki pa koriikta ole pooch nganaseet ak koba koteekso eng' murot kaataam ne po Ai, ki mi atebweet kwenunnyi ak Ai.

¹² Ki imut piik `Joshua olo po eliphuusyek muut, ak konde koribisyo eng' kwenutap Bethel ak Ai eng' komostap cherongo ne po nganaseet.

¹³ Ki inde piik anyun kotebi ko uu nooto, lugeet tugul ne ki mi murot kaataam ne po nganaseet ak piikwak tugul che kiribistos che ki mi komostap cherongo ne po nganaseet. Ki wo Joshua kemounooto kot koit kwenutap atebweet.

¹⁴ Ye kingo keer laitoryatap Ai kochirchiren, kong'eetyo karon miising' ak komanda piigap nganaseet koba kobargei ak Israel, ineendet ak piikyik tugul eng' sait ne kiga kichop, eng' ole tokyingei Arabah. Ago ki ma nai kole mi piik che ribistos si kobookyi ineendet eng' nganaseet let.

¹⁵ Ak ki yaigei Joshua ak Israel tugul ko uu yo kagiterter eng' tainnywa, ak ki mwei kobun ooreetap surkwen.

¹⁶ Ak ki kiguur piik tugul che ki mi nganaseet koba koon icheek, ak ye ki oone `icheek Joshua ko ki kireto icheek kolooegitu eng' nganaseet.

¹⁷ Ki ma komi chii ne ki ng'et eng' Ai anan ko Bethel, ne ki ma wo koon Israel. Ak ki pagaach nganaseet ko seng'eng'at yeityo koon Israel.

¹⁸ Ki leenji `Kamuktaindet ne Toroor Joshua, “Tokyi Ai ng'otit ne itinye eng' euut, amu andoi eung'ung' nganasaniito.” Ak kitokyi Joshua ng'otit ne ki tinyei eng' eunnyi nganaseet.

¹⁹ Ye kingo tokyi Joshua ng'otit nganaseet, kong'eetyo pichu karibistos eng' chokyinet eng' ole kiribisye ak korwai kotokyigei yooto. Ki pa ak konam nganaseet ak kobeel kochokyi.

²⁰ Ye kingo kuskong' piigap Ai, kogeer eng' kwong'eet kotogostoi iyeto kowendi parak eng' nganaseet. Ki mata kosich kimnateet komwechi komosi anan ko komosi, amu ki week pichu kamwee kobendi surkwen koweekyigei kobookyi pichu kaonu.

²¹ Ye kingo keer Joshua ak Israel tugul kole kagonam nganaseet pichu karibistos ak kogeer kotogostoi iyeto eng' nganaseet, koweek anyun ak kobar piigap Ai.

²² Ki pwa ak icheek che ki mi nganaseet kobargei ak pichooto; kotebee anyun kwenutap `Israel piigap Ai; ki mi alak komosi, komi alak komosi. Ki par `piigap Israel icheek kot koma ituuch agot agenge ne ki ng'et anan kochilil.

²³ Ago ki nam laitoryatap Ai kosabei ak komutyi Joshua.

²⁴ Kingo kagogees Israel pareetap piik tugul che ki menyei Ai eng' warenget eng' surkwen ole ki oonee icheek, ak kingo kagobutyo tugul eng' rotwetap chok kot kogeskei, koweektagei anyun Israel tugul koba Ai, ak koba kobare Ai rotwetap chok.

²⁵ Murenik ak kwonyiik tugul che ki kibar eng' piigap Ai eng' peetuunooto ko ki eliphuusyek taman ak aeng'.

²⁶ Amu ma aruny Joshua eunnyi ne kigaiito koname ng'otit agoi kobar kogees piik tugul che ki menyei Ai.

²⁷ Ki kweri Israel tuuga ak parunenigap nganasanooto kobunji ko uu ng'olyootap Kamuktaindet ne Toroor ne ki kang'at Joshua.

²⁸ Ki peel Joshua Ai ak koyai koek tulwo ne tebyei agoi, ki ek karaatya ne mi agoi ra.

²⁹ Ki isonginin laitoryatap Ai eng' keetit kot koimen. Kingo rorokta asiista, kong'at `Joshua kechoor muustonyi eng' keetit konyo ng'wony, ak kowiirchi ole kichutei eng' kurgeetap nganaseet. Ak korurukyi yooto karurugutyet ne oo ne po koik, ne mi agoi ra.

Koleeliti Joshua

³⁰ Kiteekyi anyun `Joshua Kamuktaindet ne Toroor, Kamuktaindetap Israel, kaptisisyet eng' tulweetap Ebal,

³¹ ko uu ye ki kang'at `Musa otwogindetap Kamuktaindet ne Toroor piigap Israel ak ko uu ye ki kisir eng' bukuitap ng'atuutigap Musa, kaptisisyetap koik che ma kiwai, che mawai chii eng' karna. Ki igoochi eng' yooto Kamuktaindet ne Toroor kagoochinoik che kibeelei, ak kieng'ji kagoochinoigap kaalyeet.

³² Ak eng' yooto, eng' taitap piigap Israel, ko kisir Joshua kosirchi koik ng'atuutigap Musa, che kigagesir.

³³ Kitononso Israel tugul, ne toondet ak ne ki kisikyi kaa, kobooto poisyekwak ak kiptainikwak ak kirwoogikwak, eng' moinget komosi ak komosi eng' taitap tisiik Lawiik, kotoorchindos ak che ibei moingetap arorutyetap Kamuktaindet ne Toroor. Ki imii kebeber taitap tulweetap Gerizim, komi kebeber taitap tulweetap Ebal, ko uu ye ki kang'at Musa otwogindetap Kamuktaindet ne Toroor korook, kole kiberuure piigap Israel.

³⁴ Ye ibata kosoman Joshua ng'aleek tugul che po ng'atuutik, kaberuret ak chubisyet, ko uu tugul che ki kisir eng' bukuitap ng'atuutik.

³⁵ Ma mi ng'olyoo eng' ng'aleek tugul che ki ng'at Musa ne masoman Joshua eng' taitap tuiyet tugul ne po Israel, komi kwonyiik, lagok ak toek che ki mi kwenunnywa.