JOSHUA 4 - BUKUIT NE TILIIL Sireet ne Dutero Kanon

Kiruruuchi koik che po kabwaatet

¹ Ye kingo kagolanda pororyet tugul eng' Jordan, kong'alaalji `Kamuktaindet ne Toroor Joshua koleenji,

² “Olewen anyun murenik taman ak aeng' eng' piik, chii agenge agenge kobun oor age tugul,

³ ak ong'at icheek oleenji, ‘Okwei koik taman ak aeng' eng' kwenutap Jordan ole katononie keelyegap tisiik, ak oip onde ng'wony eng' ole ip omuung'e oruitosi kemouni.’ ”

⁴ Ki kuur `Joshua pichooto taman ak aeng', che kiga kolewen eng' piigap Israel kobun ooreet age tugul,

⁵ ak koleenji, “Oba ondoe moingetap Kamuktaindet ne Toroor Kamuktaindeng'wong' kot oit kwenutap Jordan. Ingoip chii age tugul eng' okweek koita eng' tigikyennyi ko uu koitetap ortinwegap piigap Israel,

⁶ si kobiit koek niito kaboorunet eng' kwenung'wong'. Ye tuun teebenak lagokwok eng' peetuusyek che pwoonei kole, ‘Ibooru nee koichu?’

⁷ Oleenji amu kipcheigei peegap Jordan eng' taitap moingetap arorutyet ne po Kamuktaindet ne Toroor, ak ye kilong'une moingonooto Jordan, kotononso peegap ainanooto kototen. Egu koichu anyun kabwaatet eng' piigap Israel koigeny.”

⁸ Ki yai anyun piigap Israel ko uu ye ki ng'at `Joshua. Ki kwei koik taman ak aeng' eng' kwenutap Jordan, ko uu che ki mwachi `Kamuktaindet ne Toroor Joshua, che tee koitetap ortinwegap piigap Israel. Ki ip kot koit ole ki pa koruiyo, ak konde ng'wony eng' olooto.

⁹ Ki iruruuch anyun Joshua koichooto taman ak aeng' eng' kwenutap Jordan eng' ole kitonone keelyegap tisiik che ki ibei moingetap arorutyet; ak mi olooto agoi ra.

¹⁰ Kitonone kwenutap Jordan tisiik che ki ibei moinget agoi kobata tuguuk tugul che ki ng'at `Kamuktaindet ne Toroor Joshua komwachi piik, ko uu tugul che ki ng'at `Musa Joshua. Ki igirgir piik kolanda,

¹¹ ak kingo kagolanda piik tugul kogestagei, kolanda anyun moingetap Kamuktaindet ne Toroor kobooto tisiik, kogeerei piik tugul.

¹² Ki landa piigap Israel kondoe weeriigap Reuben, weeriigap Gad ak kebebertap ooreetap Manasseh, kolaachi kariik ko uu ye ki kamwachi `Musa icheek.

¹³ Ki landa piik olo po eliphuusyek artam che po lugeet eng' taitap Kamuktaindet ne Toroor, agoi warengetap Jeriko.

¹⁴ Ki itoroor `Kamuktaindet ne Toroor Joshua eng' peetuunooto eng' taitap Israel tugul. Ki iywei `ineendet piigap Israel eng' peetuusyek tugul che po sabeennyi, ko uu ye ki iywei Musa.

¹⁵ Ki ng'alaalji `Kamuktaindet ne Toroor Joshua koleenji,

¹⁶ “Ng'at tisiik che ibei moingetap paornateet kotogos eng' Jordan.”

¹⁷ Ki ng'at anyun `Joshua tisiik koleenji, “Otogosu eng' Jordan.”

¹⁸ Ye kingo togos tisiik che ki ibei moingetap arorutyetap Kamuktaindet ne Toroor eng' Jordan, ak kotyech emet ne yaamaat, koweekyigei peegap Jordan komostanywa ak kosiir ngeguusyekyik tugul ko uu eng' tai.

¹⁹ Ki togos piik eng' Jordan eng' peetuutap taman ne po arawetap tai ak koteech emaisyek eng' Gilgal, kong'asiis ne po kiwotetap Jeriko.

²⁰ Ki iruruuch Joshua koichooto taman ak aeng' eng' Gilgal, chooto ki ibune Jordan.

²¹ Ki ng'alaalji piigap Israel koleenji, “Ye tuun teebee lagokwok kwanisyekwak eng' peetuusyek che pwoonei koleenji ibooru nee koichu,

²² oarorchi icheek konai kole kilong'une Israel Jordan yu ko kagoyaam

²³ amu ki yai `Kamuktaindet ne Toroor Kamuktaindeng'wong' Araraita ne Piriir koyaam eng' tainnyo agoi kelong'u,

²⁴ si kobiit konai piik tugul che po ng'wony kole kiim eutap Kamuktaindet ne Toroor ak koywei Kamuktaindet ne Toroor Kamuktaindeng'wong' koigeny.”