JOSHUA 24 - BUKUIT NE TILIIL Sireet ne Dutero Kanon

Ng'aleegap Joshua che po let

¹ Ki iyum anyun `Joshua pororyosyek tugul che po Israel koba Shekem, ak koguur poisyegap Israel, pounikwak, kirwoogikwak ak kiptainikwak. Ki pwa anyun ak kotononso eng' taitap Kamuktaindet.

² Yeityo kong'alaal `Joshua ak koleenji piik tugul, “Kamwa ko uu ni Kamuktaindet ne Toroor, Kamuktaindetap Israel kole, Ki menyei kwanisyekwok keny aineet pitoniin; che icheeget ko Tera kwandap Abraham ak kwandap Nahor ak kiotei kanamonik.

³ Ki amutu kwandang'wong' Abraham eng' aineet pitoniin ak amutate eng' emet tugul ne po Kanaan ak ates iyotennyi agoochi Isak.

⁴ Ki agoochi `Isak Jakobo ak Esau, ak ki agoochi `Esau tulweetap Seir kobunji ak ko ki rekto Jakobo ak lagokyik koba Misiri.

⁵ Ki ayookte `Musa ak Aron, ak abire Misiri korotwek ko uu kiit ne ki ayai eng' kwenunnywa, ak ye ibata amutwak omong'u.

⁶ Yeityo anyun amutu kwanisyekwok komang'une Misiri ak ki obwa agoi nyanjet. Ki oon Misiriik kwanisyekwok eng' kariisyek ak piik che ketei paraisisyek kot koit Araraita ne Piriir.

⁷ Kingo riirchi Kamuktaindet ne Toroor konde mesundeito kwenung'wong' ak Misiriik ak koip nyanjet komaaluuch icheek ak kotuch. Ki keer iman konyekwok kiit ne ki ayai eng' Misiri. Eng' let ko ki omeny surkwen peetuusyek che chaang'.

⁸ Yeityo amutwak oitu emetap Amorik che ki menyei Jordan pitoniin. Ki yai lugeet ak okweek ak ki ande icheeget eunekwok ak ki onam emennywa kobunjook, ak ki abar icheek eng' taing'wong'.

⁹ Ki ng'eet anyun Balak weeriitap Sipor laitoryatap Moab ak kobargei ak Israel. Ki iyookto ineendet keguur Balaam weeriitap Beor konyo kochubok.

¹⁰ Ago ma acham agas ng'aleegap Balaam. Eng' nooto anyun, nganda ki uu nooto, ko ki iberuurok, ak ki asarwok anyun eng' eunnyi.

¹¹ Ki olong'une `Jordan obwa Jeriko ak ki yai lugeet ak okweek piigap Jeriko, Amorik, Perisik, Kanaanik, Hitik, Girgasik, Hibik ak Jebusik, ak ki ande icheek eunekwok.

¹² Ki ayookte kaaraamyet kondoenak eng' taing'wong' ne ki oon laitorinichooto aeng' po Amorik; ma eng' rotweng'ung' po chok anan kwangeng'ung'.

¹³ Ki agoonok emet ne kimaoyai kiy, nganasook omeny che kimaoteeche; oame che po mbareenigap sabibuk ak che po mseituni che ki ma omiine.

¹⁴ “Oiywei anyun Kamuktaindet ne Toroor ak oboisyechi ineendet eng' muguleldo ne ma tinyei keniisyet ak eng' imanit. Oiste kanamonik che kiotei kwanisyekwok eng' aineet pitoniin ak eng' Misiri, ak oboisyechi Kamuktaindet ne Toroor.

¹⁵ Ago ngot ogeere ko ya oboisyechini Kamuktaindet ne Toroor, olewen rani ne oboisyechini; ngo kanamonik che kiotei kwanisyekwok eng' aineet pitoniin anan kanamonigap Amorik che omenye emennywa; ago aboisyechini anee ak koonnyu Kamuktaindet ne Toroor.”

¹⁶ Ki wol pichooto kole, “Achicha, Ma kibagaaktoi Kamuktaindet ne Toroor ak keoot kanamonik.

¹⁷ Amu Kamuktaindet ne Toroor, Kamuktaindennyo, ko ineendet ne ki imutwech ak kwanisyekyok kemang'une emetap Misiri eng' kootap otwoknateet ak ko ineendet ne ki yai kaboorunoichu kieechen eng' tainnyo ak koriibonwech eng' ooreet tugul ne ki kibunu ak eng' kwenutap piik tugul che ki kibunu kwenunnywa.

¹⁸ Ki oon `Kamuktaindet ne Toroor piik tugul koba eng' tainnyo, chooto Amorik che ki menyei emoniito. Nooto anyun kiboisyechini Kamuktaindet ne Toroor agacheek, amu ineendet ko Kamuktaindennyo.”

¹⁹ Koleenji `Joshua piik, “Momuuchi oboisyechi Kamuktaindet ne Toroor, amu ineendet ko Kamuktaindet ne Toroor ne tiliil. Ineendet ko Kamuktaindet ne Toroor ne amei ng'etkong'; ma nyoiywok kaat eng' pistoeng'wong' anan ko eng' tengekwogikwok.

²⁰ Ngot omete Kamuktaindet ne Toroor ak oot kamuktaik che too, koweeksei anyun ak koyaiywok ne ya ak kogeswok, ago kiga koyaiywok ne myee.”

²¹ Ak ki leenji `piik Joshua, “Achicha, kiboisyechini Kamuktaindet ne Toroor.”

²² Ak ki leenji `Joshua piik, “Oo paorinik che obaoryanjinigei ole kaolewen Kamuktaindet ne Toroor, oboisyechi ineendet.” Ak ki mwa kole, “Ki paorinik.”

²³ Ara anyun, oiste kanamonik che too che mi kwenung'wong' ak otokyi mugulelwekwok Kamuktaindet ne Toroor, Kamuktaindetap Israel.

²⁴ Koleenji `piik Joshua, “Kiboisyechini Kamuktaindet ne Toroor, Kamuktaindennyo ak kegas iit kutinnyi.”

²⁵ Koyomiskei `Joshua anyun ak pichooto peetuunooto, ak koyachi ng'atuutyet ak kayomisutyet eng' Shekem.

²⁶ Ki sir ng'aleechuuto `Joshua eng' bukuitap ng'atuutigap Kamuktaindet. Ki inem koita ne oo ak konde kotonon eng' keetitap alayet keel ne ki mi ye po ole-tiliil ne po Kamuktaindet ne Toroor.

²⁷ Yeityo komwachi `Joshua piik tugul koleenji, “Ee, egu kooi paoryat agobo acheek. Amu kagogas ng'aleek tugul che po Kamuktaindet ne Toroor che kimwaiwech, ko egu anyun paoryat agobo okweek, si moeesye Kamuktaindeng'wong'.”

²⁸ Ki leenji anyun Joshua piik koba, ak ki wo chii tugul ye mi porotennyi.

Meetap Joshua

²⁹ Kingo pata tuguuchuuto, kome Joshua weeriitap Nun otwogindetap Kamuktaindet ne Toroor ko po kenyiisyek pogol ak taman.

³⁰ Kitup `icheek ineendet anyun eng' kiwotetap porotennyi eng' Timnat-sera ne mi emetap tuloonook ne po Ephraim, eng' murot kaataam ne po tulweetap Gaas.

³¹ Kiboisyechi Israel Kamuktaindet ne Toroor eng' peetuusyek tugul che po Joshua ak eng' peetuusyek tugul che po poisyek che kita komi ko kagome Joshua, che ki ingen poisyet tugul ne po Kamuktaindet ne Toroor ne kiga koyai agobo Israel.

³² Kitup icheek kawegap Joseph eng' Shekem che ki ibu piigap Israel eng' Misiri eng' kebebertap emet ne kigaal Jakobo eng' weeriigap Hamor kwandap Shekem eng' fedhaisyek pogol, ak ki ek chooto poroteetap lagogap Joseph.

³³ Kime agine Eleazar weeriitap Aron, ak kitup `icheek ineendet eng' tulweetap Phineas weeriinnyi, ne kiga kigoochi ineendet eng' emetap tuloonook ne po Ephraim.