JOSHUA 22 - BUKUIT NE TILIIL Sireet ne Dutero Kanon

Koweektogei kaa pororyosyegap kong'asiis

¹ Ki kuur anyun `Joshua piigap Reuben, che po Gad ak kebebertap pororyetap Manasseh,

² ak koleenji icheek, “Ki oriip tuguuk tugul che king'ataak `Musa otwogindetap Kamuktaindet ne Toroor ak ki ogas iit kutinnyu eng' tugul che ki ang'ataak.

³ Ma omete tupchosyekwok eng' peetuusyechu chaang' agoi peetuuni ago ki oriip kayomisetap ng'atuutyetap Kamuktaindet ne Toroor Kamuktaindeng'wong'.

⁴ Ak nguno ko kagogoochi `Kamuktaindet ne Toroor Kamuktaindeng'wong' tupchosyekwok kamuung'et ko uu ye ki mwachi. Oweeige anyun nguno ak obe emaisyekwok agoi emet ne kibunjok ne ki koonok Musa otwogindetap Kamuktaindet ne Toroor eng' Jordan pitoniin.

⁵ Ago oriipkei miising' oyai kayomisutyet ak ng'atuutyet che king'ataak Musa otwogindetap Kamuktaindet ne Toroor, ocham Kamuktaindet ne Toroor Kamuktaindeng'wong' ak obendate ortinwekyik tugul ak oriip ng'atuutikyik onamge ak ineendet ak oot eng' mugulelwekwok tugul ak saboonwekwok tugul.”

⁶ Ki iberuur anyun `Joshua icheek ak koleenji koba, ak ki pa emaisyekwak.

⁷ Kiga kogoochi `Musa kebebertap pororyetap Manasseh poroteet eng' Bashan: ak ki igoochi `Joshua kebeberta age ne po pororyonooto poroteet eng' kwenutap tupchosyekwak eng' Jordan pitoniin ole tokyingei cherongo. Ak kingo machei `Joshua komwachi icheek koba emaisyekwak koberuur,

⁸ ak kong'alaalji koleenji, “Oweeige emaisyekwok ak mogornateet ne oo, tuuga che chaang', fedha, thahabu, sugunonik, kariik ak ngoroik che chaang' miising'. Opchei parunenichuuto ki po puunikwok kobooto tupchosyekwok.”

Keteechei Kaptisisyet eng'ye neegitee Jordan

⁹ Ki week anyun lagogap Reuben, lagogap Gad ak kebebertap pororyetap Manasseh, koba eng' ole mi piigap Israel komanda eng' Shiloh, ne mi emetap Kanaan koba emetap Gilead, emet ne nenywa, ne kiga konam kobunji ko uu ng'atuutyetap Kamuktaindet ne Toroor eng' eutap Musa.

¹⁰ Ye kingo it emet ne neegit Jordan, ne mi emetap Kanaan, lagogap Reuben, Gad ak kebebertap pororyetap Manasseh, koteech kaptisisyet ne oo ne taagu eng' olooto, eng' ye po Jordan.

¹¹ Kingo kas piigap Israel kemwaei koleen kogoteech kaptisisyet lagogap Reuben, lagogap Gad ak kebebertap pororyetap Manasseh eng' taitap emetap Kanaan, eng' kooret ne neegit Jordan, eng' komosta ne po piigap Israel,

¹² koyumgei tuiyet komugul ne po piigap Israel eng' Shiloh kole koba kobargei ak pichooto.

¹³ Ki iyookto piigap Israel piik che ki indochin Phineas weeriitap Eleazar tisiindet koba emetap Gilead ole mi lagogap Reuben, Gad, ak kebebertap pororyetap Manasseh.

¹⁴ Ki mi kobooto Phineas pounik tamanu; kobunu pounindet age tugul kootap kwanisyek eng' pororyetap age tugul ne po pororyosyegap Israel ak age tugul ko ki ne oo eng' kootap kwanisyekwak eng' eliphusyegap Israel.

¹⁵ Ki pwa anyun ole mi lagogap Reuben, lagogap Gad ak kebebertap pororyetap Manasseh eng' emetap Gilead ak kong'alaalji koleenji,

¹⁶ “Kamwa ko uu ni tuiyet komugul ne po Kamuktaindet ne Toroor kole, ‘Nee chalwogi kooyachi Kiptaiyat Kamuktaindetap Israel, kot omaste rani eng' kasubet ne osubi Kamuktaindet ne Toroor amu kooteekyigei kaptisisyet ak ongelelji Kamuktaindet ne Toroor rani?’

¹⁷ Tos mayamech tengektap Peor ne tomo kitiliilgei eng' tengegoto agoi ra, nganda ki nyoonji koroito tuiyetap Kamuktaindet ne Toroor?

¹⁸ Ago kaomaste rani eng' kasubet ne osubi Kamuktaindet ne Toroor? Amu kaongelelji Kamuktaindet ne Toroor rani, ko mutai konereekyin ineendet tuiyet komugul ne po Israel.

¹⁹ Ago ngo ma ianyinyat emet ne neng'wong', olande emet ne po Kamuktaindet ne Toroor ole menyei kootap Kamuktaindet ne Toroor, ak obwa onam emet eng' kwenunnyo kobunjook. Amat ongelelji Kamuktaindet ne Toroor anan ongeleljech oteekyigei kaptisisyet age ne ma kaptisisyetap Kamuktaindet ne Toroor, Kamuktaindennyo.

²⁰ Tos ki ma ibutyi nereegek tuiyet komugul ne po Israel amu ki yai Akan weeriitap Zerah chalwokto eng' kiit ne ki itabaanat ak tos kimalus chiichooto ineegei eng' tengektanyi?”

²¹ Ki wol anyun lagogap Reuben, Gad ak kebebertap pororyetap Manasseh ak kong'alaalji kandoigap eliphusyegap Israel koleenji,

²² “Ingen Kamuktaindet ne Toroor, Kamuktaindet ne pou kamuktaik, ak ta konaei Israel agine, ngot ko eng' ngelelnateet anan ngot ko eng' kachililutyet ne kagichililji Kamuktaindet ne Toroor, (ko mat isarwech rani,)

²³ keteekyigei kaptisisyet kemaste eng' kasubet ne kisubi Kamuktaindet ne Toroor anan ngot kemache kigoite kagoochinet ne kibeelei anan ngot ko kagoochinetap peek anan ngot kigoite korosegap kagoochinoik che po kaalyeet ko ingoyaakta Kamuktaindet ne Toroor ineegei.

²⁴ Anan ngot ko ki kiyai kii eng' riibetapkei agobo kiy keele, Ma nai chii ngot ko tuun ng'alaaljin lagokwok lagokyok eng' peetuusyek che pwoonei kole, ‘Oting'egei nee ak Kamuktaindet ne Toroor, Kamuktaindetap Israel?’

²⁵ Amu ki yai `Kamuktaindet ne Toroor Jordan koek kiwotennyo ak okweek lagogap Reuben ak lagogap Gad. Motinye kebeberta eng' Kamuktaindet ne Toroor, koyai anyun lagokwok lagokyok kobagaakta kayweet ne iywei Kamuktaindet ne Toroor.

²⁶ Nooto anyun ko kogimwa keele, Ongechoboge keteekyigei kaptisisyet ne ma po kagoochinoik che kibeelei anan ko tiseiywek,

²⁷ ago si koek paornateet eng' kwenunnyo acheek ak okweek ak eng' kwenutap ibinwek che piitu let eng' acheek si kobiit keyai poisyetap Kamuktaindet ne Toroor eng' tainnyi eng' kagoochinoikyok che kibeelei ak eng' tiseiywekyok ak eng' kagoochinoikyok che po kaalyeet, si ma tuun leenji lagokwok lagokyok eng' peetuusyek che pwoonei, Motinye kebeberta eng' Kamuktaindet ne Toroor.

²⁸ Amu nooto, ko ki kimwa anyun keele, ‘Ye tuun kamwaiwech ko uu nooto anan komwachi ibinwekyok eng' peetuusyek che pwoonei, kemwa anyun keele, Ogeer kergeindap kaptisisyetap Kamuktaindet ne Toroor ne ki yai kwanisyekyok ne ma po kagoochinoik che kibeelei ama po tiseiywek ago paornateet eng' kwenunnyo acheek ak okweek.

²⁹ Ingolooit eng' acheek ama kingelelji Kamuktaindet ne Toroor, ama kimaste rani eng' kasubet ne kisubi Kamuktaindet ne Toroor kot keteech kaptisisyet ne po kagoochinoik che kibeelei ak ko po kagoochinoigap peek anan ko ne po tiseiywek, age ne ma kaptisisyetap Kamuktaindet ne Toroor, Kamuktaindennyo ne mi taitap koonnyi.’ ”

³⁰ Kingo kas Phineas tisiindet, pounigap tuiyet ak kandoigap eliphusyegap Israel che ki mi kobooto ineendet ng'aleek che ki mwa lagogap Reuben, Gad ak lagogap Manasseh, kobaibai icheek miising'.

³¹ Ki wolji Phineas weeriitap Eleazar tisiindet lagogap Reuben, lagogap Gad ak lagogap Manasseh, Kaginai rani keele mi Kamuktaindet ne Toroor kwenunnyo, amu mata ochalwogenji Kamuktaindet ne Toroor eng' kiito. Kaosaru anyun piigap Israel eng' eutap Kamuktaindet ne Toroor.

³² Eng' yooto koweek Phineas weeriitap Eleazar tisiindet kobooto pounik eng' ole mi lagogap Reuben, ak lagogap Gad ak koba eng' Gilead agoi emetap Kanaan ole mi piigap Israel, koipchi icheek ng'aleek kogeny.

³³ Ki ibaibai kioto piigap Israel, ak ki ilas piigap Israel Kamuktaindet, amata komwa kogeny kole koba kobargei ak icheek kong'em emet ne ki menyei lagogap Reuben ak lagogap Gad.

³⁴ Ki kuure anyun lagogap Reuben ak lagogap Gad kaptisisyonooto Ed, amu ki le, “Niito ko paornateet eng' kwenunnyo ne kagimwa keele Kamuktaindet ne Toroor ko Kamuktaindet.”