JOSHUA 10 - BUKUIT NE TILIIL Sireet ne Dutero Kanon

Kotononi asiista

¹ Kingo kas Adoni-sedek laitoryatap Jerusalem kole ki konam Joshua Ai ak kong'em kogees; ko kogoyachi Ai ak laitoryandennyi ko uu ye kigayachi Jeriko ak laitoryandennyi, ak ko uu ye ki yai kaalyeet piigap Gibeon ak Israel ak komi kwenunnywa.

² Ki iywei miising' amu ki nganaseet ne oo Gibeon, ko uu age eng' nganasoogap kaplaitoryat, ak amu ki oo kosiir Ai ak ko ki kiimeen murenik tugul che po nganasanooto.

³ Ki iyookto anyun Adoni-sedek laitoryatap Jerusalem, ng'olyoo koyookyi Hoam laitoryatap Hebron, Piram laitoryatap Jarmut, Japia laitoryatap Lakish ak Debir laitoryatap Eglon koleenji,

⁴ “Otogosu oldanyu obwa otoreta si kibookyin Gibeon, amu ki koyai kaalyeet ak Joshua ak piigap Israel.”

⁵ Ki iyumgei anyun laitorinik muutu che po Amorik: laitoryatap Jerusalem, laitoryatap Hebron, laitoryatap Jarmut, laitoryatap Lakish ak laitoryatap Eglon ak kotogosta. Ki togosta icheek ak lugosyekwak tugul ak koteech taitap Gibeon ak kobookyi nganasanooto.

⁶ Ki iyookto `piigap Gibeon Joshua eng' nganaseet eng' Gilgal, koleenji, “Amebagaakte otwogiguk; nyoo togosu ichogu ak isarwech! Toretech amu kagoyumjeigei laitorinik tugul che po Amorik che menyei emetap tuloonook.”

⁷ Ki togosta anyun Joshua eng' Gilgal ak piik tugul che po lugeet, kobooto murenik tugul che kiimeen che nyigoonen.

⁸ Ki leenji `Kamuktaindet ne Toroor Joshua, “Meiywei icheek, amu kande icheek euneguk. Ma mi chii eng' icheek ne imuuchi kotonon eng' taing'ung'.”

⁹ Kiche anyun Joshua icheek, amu kiga kotogosta eng' Gilgal kemout komugul.

¹⁰ Ki iyeesta `Kamuktaindet ne Toroor icheek eng' taitap Israel ak kobar icheek eng' pareet ne oo eng' Gibeon. Ak koon icheek kobun ooreet ne togostoi Beth-horon ak kobarat kot koit Aseka ak Makeda.

¹¹ Ye ki mwee eng' taitap Israel, ye kichoortaegei Beth-horon, kowiir `Kamuktaindet ne Toroor icheek eng' koik che eecheen che punu kipsengwet kot koit Aseka, ak ki pek icheek; ki chaang' che ki pek eng' koigap ropta kosiir che ki par piigap Israel eng' rotwetap chok.

¹² Eng' peetuut ne ki igoito Kamuktaindet ne Toroor Amorik kogoochin piigap Israel, koleenji `Joshua Kamuktaindet ne Toroor eng' taitap piigap Israel, “Ee Asiisi, tonon eng' Gibeon, ee Arawet, telel eng' atebweetap Aijalon.”

¹³ Ki tonon asiista ak kosiis arawet, kot koyaaktochigei mugetuut pororyet eng' puunikwak. Tos ma ki sirchi niito bukuitap Jasar? Ki tonon asiista mata kwo eng' kwenutap kipsengwet, ak mata kwo kochaakta kororokto ne tee peetuut komugul.

¹⁴ Kitom kobiitu peetuut ne uu nooto eng' tai amata kobiit eng' let ne ki kas Kamuktaindet ne Toroor kutitap chii. Amu ki yai Kamuktaindet ne Toroor lugeet agobo Israel.

¹⁵ Ki week Joshua anyun kobooto Israel tugul koba nganaseet eng' Gilgal.

¹⁶ Kimwei anyun laitorinichooto muutu ak kounygei eng' kebeneet eng' Makeda.

¹⁷ Ki kimwachi Joshua keleenji, “Kagenyoor laitorinichooto muut kounyegei eng' kebeneet eng' Makeda.”

¹⁸ Kole Joshua, “Omilji koik che eecheen kurgeetap kebeneet ak onde piik yooto koriip.

¹⁹ Amat otebi okweeget, oon puunikwok ak obar che mi let, amat ochamji koba nganasookwak oriit. Amu kagonde Kamuktaindet ne Toroor Kamuktaindeng'wong' icheek eunekwok.”

²⁰ Kingo kagobar Joshua ak piigap Israel icheek kogees eng' pareet ne oo miising' kot koek tutigin che ki ng'et ak koba nganasook che ng'ootaatiin.

²¹ Ki week anyun piik tugul eng' kaalyeet koba nganaseet ole mi Joshua eng' Makeda. Ma piit chii ne kitwek komwa ng'olyoo ne ya agobo piigap Israel.

²² Komwa Joshua anyun kole, “Oyat kurgeetap kebeneet, ak omutwaa laitorinichooto muut.”

²³ Ki yai ko uu nooto, ak ki imutyi ineendet laitorinichooto muut; laitoryatap Jerusalem, laitoryatap Hebron, laitoryatap Jarmut, laitoryatap Lakish ak laitoryatap Eglon.

²⁴ Kingo kagomut laitorinichooto kagomutyi Joshua, koguur `Joshua murenik tugul che po Israel ak komwachi pounigap lugeet che kigaba kobooto ineendet koleenji, “Obwa oriigu onde keelyekwok kaatwegap laitorinichu.” Kobwa anyun koriik ak konde keelyekwak kaatwegap pichooto.

²⁵ Koleenji `Joshua icheek, “Amoiywei anan otoptoben, ogimegitu ak onyiganitu amu yachin ko uu nooto Kamuktaindet ne Toroor puunikwok tugul che obaregei.”

²⁶ Ye ibata, kokweerot `Joshua icheek ak kobar ak kosonginine keetiik muut. Ki tebee keetiik kosonginindos agoi koimen.

²⁷ Ye kimachei kororokto asiista, kogoon Joshua ng'atuutyet kechoor eng' keetiik kobwa ng'wony ak kowiirchi kebeneet ole kigaung'egei, ak konde koik che eecheen kurgeetap kebeneet, ne mi agoi ra.

Kitertere nganasoogap murot tai.

²⁸ Ki nam `Joshua Makeda peetuunooto, ak ki par kobooto laitoryandennyi eng' rotwetap chok, ak kobar kowong' tugul che ki mi oriit. Ki ma pagaakta agot agenge. Ak ki yachi laitoryatap Makeda ko uu ye kigayachi laitoryatap Jeriko.

²⁹ Ak kisiirto Joshua eng' Makeda ak Israel tugul koba Libna ak kobookyi olooto.

³⁰ Ki igoito Kamuktaindet ne Toroor nganasanooto agine kobooto laitoryandennyi konde eunegap Israel. Ki par nganasanooto ak piik tugul che ki mi oriit eng' rotwetap chok. Ki ma pagaakta agot agenge eng' oriit. Ak ki yachi laitoryandennyi ko uu ye kigayachi laitoryatap Jeriko.

³¹ Ki pa Joshua ak Israel tugul eng' Libna koba Lakish; ki teech taitap nganasanooto ak kobargei.

³² Ki inde `Kamuktaindet ne Toroor Lakish eunegap Israel ak ki nam eng' peetuut ne po aeng'. Ki par kobooto piik tugul che ki mi oriit eng' rotwetap chok, ko uu tugul che kigayachi Libna.

³³ Kigatogos Horam laitoryatap Gezer koleen kotoret Lakish, ago ki par `Joshua ineendet kobooto piikyik, ak ma pagakyi agot agenge.

³⁴ Ki isiptogei Joshua eng' Lakish kobooto Israel tugul koba Eglon ak koteech taitap nganasanooto, ak kobargei.

³⁵ Ki nam eng' peetuunooto ak kobar eng' rotwetap chok piik tugul che ki mi oriit. Ki par kogeskei eng' peetuunooto, ko uu tugul che kigayachi Lakish.

³⁶ Ki togosta Joshua ak Israel tugul eng' Eglon koba Hebron ak ki par olooto.

³⁷ Ki nam ak kobar eng' rotwetap chok piik tugul che ki mi oriit kobooto laitoryandennyi ak nganasookyik tugul, ma pagaakta agot agenge. Ko uu tugul che kigayachi Eglon, koging'em kogees kobooto piik tugul che ki mi oriit.

³⁸ Ki week anyun Joshua kobooto Israel tugul koba Debir ak kobar olooto.

³⁹ Ak ki nam kobooto laitoryandennyi ak nganasookyik tugul ak kobar eng' rotwetap chok ak piik tugul che ki mi oriit kowong'. Ma pagaakta agot agenge. Ki yachi Debir ak laitoryandennyi ko uu ye kigayachi Hebron kobooto laitoryandennyi, ak ko uu ye kigayachi Libna agine ak laitoryandennyi.

⁴⁰ Ki par anyun Joshua emet tugul; emetap tuloonook, komostap murot tai, warenget ak chepkeigeusyek kobooto laitorinikwak tugul. Ma pagaakta kong'et agot agenge. Ki par kogees tugul che ki tinyei kabuuset, ko uu ye ki ng'at Kamuktaindet ne Toroor, Kamuktaindetap Israel.

⁴¹ Ki par `Joshua icheek kobooch Kadesh-barnea agoi Gaza ak emet komugul ne po Goshen agoi Gibeon.

⁴² Ki nam `Joshua laitorinichooto tugul ak emotinwekwak eng' peetuusyechooto, amu ki yai Kamuktaindet ne Toroor, Kamuktaindetap Israel lugeet agobo Israel.

⁴³ Kiweektagei Joshua kobooto Israel tugul koba nganaseet eng' Gilgal.