JOSHUA 1 - BUKUIT NE TILIIL Sireet ne Dutero Kanon

Keng'atei Joshua

¹ Kingo kagome `Musa otwogindetap Kamuktaindet ne Toroor, kong'alaalji `Kamuktaindet ne Toroor Joshua weeriitap Nun kiboityotap Musa koleenji,

² “Kogome otwogindennyu Musa. Ara ng'eet anyun nguno inyee ak pichu tugul, olandae ainooni po Jordan, ak obe emet ne agoochini icheeget, piigap Israel.

³ Komosta age tugul ole katyech keelyekwok, ko kaagoonok ko uu ye ki amwachi Musa.

⁴ Kobooch surkwen ak Lebanon agoi aineet ne oo, nooto ko aineet ne po Yufrets, emet komugul ne po Hitik agoi nyanjetap Mediterenian ne tokyingei cherongo ko egu koreng'wong'.

⁵ Ma piitu chii ne imuuchi kotonon eng' taing'ung' peetuusyek tugul kotee isabe. Ko uu ye ki ami kobooto Musa, ko uu nooto ami kobooten. Ma meteen anan abagaakteen.

⁶ Kimitu ak inyiganitu amu igoochini pichu konam emet ne ki ayosyechi kwanisyekwak ale agoochini.

⁷ Kimitu ak inyiganitu miising', keer iman ile keyai ko uu ng'atuutik tugul che king'atin otwogindennyu Musa. Amemaste iwe eutap tai anan ko murot kaataam si kobiit kiberuurin miising' eng' oldo age tugul ole iwendi.

⁸ Amat komanda bukuini po ng'atuutik eng' kuting'ung', ago ibwaat peet ak kemoi si iriip ak iyai ko uu tugul che ki kisirchi bukuiniito. Ngiriip, iyaei anyun oreng'ung' kotunen ak kiberuurin miising'.

⁹ Tos ma anee ne ki ang'atiin? Kimitu ak inyiganitu. Meiywei anan itoptoben amu mi Kamuktaindet ne Toroor Kamuktaindeng'ung' kobooten eng' ui tugul ole iwendi.”

Chobetapkei si kolandae Jordan

¹⁰ Ki ng'at anyun `Joshua kiptainigap piik koleenji,

¹¹ “Obun kwenutap nganaseet ak ong'at piik oleenji, ‘Ochop amitwogik, amu kotom kogeskei peetuusyek somogu, olandoe Jordan si onam emet ne koonok Kamuktaindet ne Toroor Kamuktaindeng'wong' kobunjook.’ ”

¹² Ki ng'alaalji `Joshua ooreetap Reuben, ooreetap Gad ak kebebertap ooreetap Manasseh koleenji,

¹³ “Obwaat ng'olyoot ne ki ng'ataak `Musa otwogindetap Kamuktaindet ne Toroor kole, ‘Koonok Kamuktaindet ne Toroor Kamuktaindeng'wong' kamuung'et ak koonok emoni.’

¹⁴ Tebee osotikwok, lagokwok ak kiyagiik emet ne ki koonok Musa eng' Jordan pitoniin. Ago olandoi okweek nyigoonik tugul ondoe tupchosyekwok ko kaolaach kariik si otoret icheek.

¹⁵ Otoret icheek agoi kogoochi `Kamuktaindet ne Toroor tupchosyekwok kamuung'et ko uu okweek, agoi konam ak icheek emet ne igoochin Kamuktaindet ne Toroor Kamuktaindeng'wong'. Ye ibata oweege obwa emeng'wong' ak onam kobunjook, emet ne ki koonok Musa otwogindetap Kamuktaindet ne Toroor eng' Jordan pitoniin ole chorunee asiista.”

¹⁶ Kowolji `icheek Joshua koleenji, “Kiyae chooto tugul keng'atech, ak kibendi olda age tugul ole keyooktech keebe.

¹⁷ Ko uu ye ki kigase iit Musa eng' tuguuk tugul, kegasin iit aginye ko uu nooto. Ingotep kityo Kamuktaindet ne Toroor Kamuktaindeng'ung' kobooten, ko uu ye ki mi kobooto Musa.

¹⁸ Chii age tugul ne kabisto chooto ing'ate, ama kas iit ng'aleeguk, kiy age tugul ne keng'at, kebarei. Kimitu ak inyiganitu miising'.”