JOEL 3 - BUKUIT NE TILIIL Sireet ne Dutero Kanon

Kirwookyin Pororyosyek

¹ Amu, ogeero, tuun ayumi pororyosyek tugul eng' peetuusyechooto, ak eng' peetuunooto, ye tuun aweech kogeny che kiga keluul che po Judah ak Jerusalem,

² ak amut icheek koba atebweetap Jehoshaphat; ak arwookyi icheek eng' olooto amu piikyuk ak amu porotennyu Israel, che ki koseerchi pororyosyek, ak kopchei emennyu.

³ Ak kigoseer parbareek agobo piikyuk: ak ki kogoito ng'etet agobo chepkugoniot, ak ki alda chepto agobo divaik, si kobiit koe.

⁴ Ee Tyro, ak Sidon, ak komoswek tugul che po Philistia, otile nee eng' anee? Tos ogeerwo kiy ne po kageeret? Ak ngot ogeerwo, aweekwok kioto konyo meting'wong' eng' yooto, eng' chokyinet.

⁵ Amu ko uu ye ki oip fedhaisyekyuk ak thahabusyekyuk, ak oip tuguukyuk che korooron miising' koba hekalusyekwok;

⁶ ki oalde kogeny lagogap Judah ak lagogap Jerusalem oaldochi weeriitap Yunanik, si kobiit omut kolooegitu eng' kiwotennywa:

⁷ ogeero, ang'eeti icheek komong' eng' ole ki oaldochi, ak aweekwok konyo meting'wong' kioto ogeerunena;

⁸ ak aalde weeriikwok ak tiibiikwok koba eutap lagogap Judah, ak koaldochi icheek piigap Sabe, pororyet ne loo: amu kagomwa Kamuktaindet ne Toroor ng'olyoondoniito.

⁹ Omwaite ng'olyoondoni eng' pororyosyek; ochop lugeet: oong'et piik che nyigoonen; ingorik murenik tugul che po lugeet, ingotogos.

¹⁰ Otany mogomboikwok che po tuuga koek rotoogap chok, ak otany chepkesokwok koek ng'otwek: ingomwa ne nyalulat, kole, aa kiim.

¹¹ Ochogu, obwa, okweek pororyosyek tugul che omi komoswek tugul ak oyumgei: ee Kamuktaindet ne Toroor, igoochi cheguuk che nyigoonen kochoorgei kobwa yu.

¹² Ingong'eetkei pororyosyek, ak kobwa atebweetap Jehoshaphat: amu atebye eng' olooto ak arwookyi pororyosyek tugul che mi komoswek tugul.

¹³ Ogese chepkeswet, amu kagoruryo: obwa, otyech; amu kagonyi ole kitue divaik, ing'irtogei eng' ole itendenjin, amu oo yaityennywa.

Tuun saru `Kamuktaindet ne Toroor piikyik

¹⁴ Piik che chaang', piik che chaang' che mi atebweet ne kitilee ng'aleek! Amu kagoriikyi peetuutap Kamuktaindet ne Toroor eng' atebweet ne kitile ng'aleek.

¹⁵ Imenitu asiista ak arawet, ama kooluu kecheik,

¹⁶ ak pooriseni Kamuktaindet ne Toroor eng' Zion, ak kotwek eng' Jerusalem; ak potandos kipsengwet ak ng'wony: ago egu Kamuktaindet ne Toroor ole mwechin piikyik, ak koek irimeet eng' piigap Israel.

¹⁷ Onai anyun ole aa Kamuktaindet ne Toroor Kamuktaindeng'wong', amenye Zion tulweennyu ne tiliil: tiliiliitu anyun Jerusalem, ama kobunei toek kogeny.

¹⁸ Ak saune peetuunooto divaik che anyiny tuloonook, ak rootune cheego tuloonook che mengeechen, ak koroot peek che chaang' eng' kereruusyek tugul che po Judah; ak komong' kondametutap peek eng' kootap Kamuktaindet ne Toroor, ak koobis atebweetap Shitim.

¹⁹ Kuberi Misiri, ak koek Edom surkwen ne kigoguber, amu koroomnateet ne ki kiyachi lagogap Judah, amu ki kotumda korotiik che ma tinyei tengek eng' emennywa.

²⁰ Ago tebyei Judah koigeny, ak kotebyei Jerusalem eng' ibinwek tugul.

²¹ Ak aanyiny korotiikwak che tomo aanyiny: amu menyei Kamuktaindet ne Toroor Zion.