ISAIAH 44 - BUKUIT NE TILIIL Sireet ne Dutero Kanon

Israel ne lewenot

¹ Kas anyun nguno, ee otwogindennyu Jakobo; ak Israel ne ki alewen:

² Mwaei Kamuktaindet ne Toroor ne kiyain, ne kimimiin eng' moet, ne toretin, kole, meiywei, ee otwogindennyu Jakobo; ak inyee Jesurun, ne ki alewen.

³ Amu aroong'jini peek ne amei melel, aroong'jini ainoosyek emet ne yaamaat: aroong'jini Kabuusennyu iyoteng'ung', ak aroong'jini perurtanyu lagoguk:

⁴ ak kobiityo eng' ole mi susweek, ko uu keetiik che piitos eng' ole roote peek.

⁵ Mwaei age kole, aa po Kamuktaindet ne Toroor; ak koguuregei age kainetap Jakobo; ak kosirchi age eunnyi kainetap Kamuktaindet ne Toroor; ak komwaitoegei kainetap Israel.

⁶ Mwaei Kamuktaindet ne Toroor, Laitoryatap Israel, ak ko katyagindennyi Kamuktaindet ne Toroor ne po lugoosyek, kole, aa ne po tai ak ne po let; ama mi Kamuktaindet age kobatena.

⁷ Ak ng'oo ne uu anee, ne kuurei, ak komwaita, ak kotetwa, kobooch ngap ande piigap keny? Ak ingomwa icheek tuguuk che pwoonei, ak che ta kosuldoi.

⁸ Amoiywei, anan oaragense: tos ma amwaun niito keny, aboorun? Oo paorinikyuk. Tos mi Kamuktaindet age kobatena? Ee, ma miitei Rwandet; mangen age.

Berberindap saaetap kanamonik

⁹ Puch icheeget tugul che yaei kanamonik che kiwaei; ak ma tinyei keljinet tuguukwak che iboiboegei: ak ma keertoi paorinikwak, ama naei; si kolilaanso.

¹⁰ Ng'oo ne ki yai kamuktain, anan kotany kanamwet ne kiwaei, ne tinyei keljinet ne po puch?

¹¹ Ogeero, ililandos choronokyik tugul; ak po piik musogik: ingoyumgei tugul, ingotononso; iyweisyei, ililandos tugul.

¹² Itanyi kitang'indet aiywet, ak koboisyee nesek, ak kotang'e kiriswet, ak koboisyee eunnyi ne kiim: ee, amei rubeet, ak petei kimnateennyi; ma eei peek, ak kotanui.

¹³ Iitoe musogindetap pagoinik porowet; ak komare kalamit; site rotonik, ak komare yiemutyet kariik che kimarse, ak kowai koigei itoondap chiito, ko uu karaaranindap chiito, si kobiit kotebee ko.

¹⁴ Iluuljingei taragonik, ak koip piribiryet ak keetit age, ak koriipchigei age eng' keetiigap timiin: minei tarakwet ne sabul, ak koner amu ropta.

¹⁵ Egu anyun keetoto ne ilaali chiito; ak ibei kweenikyik, ak kwo koyu; ee, ilaali, ak kobeele magatiinik: ee, yaei kamuktain, ak kosa; yaei koek kanamwet ne kiwaei, ak kogutung'ji.

¹⁶ Ilaali alak; amei alak panyeek: watani pendo, ak kobiyo: ee, yue maat, ak kole, haa, kalalang'itu, kaageer maat:

¹⁷ ak koyae che ng'etu kamuktain, nooto kanamwennyi ne kiwaei: ibutyin ak kogutung'jin, ak kosaaei, kole, sarwo; amu ii kamuktaindennyu.

¹⁸ Ma ingen icheek, ama ibwaati: amu ki kogeer konyekwak, si ma keerto; ak koger mugulelwekwak, si ma iguiyo.

¹⁹ Ama mi ne ibwaati, ama mi naet anan kaguiyet ne mwaei kole, Kaabeel alak eng' ma: ee, kaabeele magatiinik nesekyik kogeny; kaawatane panyeek ak aam: ak tos ayai ne kang'et koek kiit ne kiwechei? Tos abutyini kiit ne kiyae keetit?

²⁰ Amei oreek: kagomaas ineendet muguleldo ne iberberat, kot koma imuuchi kosar saboondanyi, anan komwa kole, tos ma mi lembeita eunnyu ne po tai?

²¹ Ibwaat tuguuchuuto, ee Jakobo, ak Israel; amu ii otwogindennyu: ki ayain; ii otwogindennyu: ee Israel, mautyenen.

²² Ki aiste pistaosyeguk, ko uu pooldet ne oo, ak ki aiste tengekwogiguk, ko uu pooldet: weekyage; amu ki atyachin.

²³ Ee okweek kipsengwet, Otyense, amu ki yai Kamuktaindet ne Toroor nooto; owaach okweek, komoswek che po oriit che po ng'wony; otyense, okweek tuloonook, ee timiin, ak keetit age tugul ne mi yooto: amu kagotyach Kamuktaindet ne Toroor Jakobo, ak kotoroorgei eng' Israel.

²⁴ Mwaei Kamuktaindet ne Toroor, katyagindeng'ung', ineendet ne kimimiin eng' moet, kole, aa Kamuktaindet ne Toroor, ne yaei tuguuk tugul; aneege ne aiitoi kipsengwet; ne aiitoi ng'wony; ng'oo ne mi kobooto?

²⁵ Ne walei tartetap kiplembechonik koek puch, ak kogoochin che ng'oorsei koiiywenso; ne weechi piik che utaatiin koba let, ak koyaei naennywa koek perberyo:

²⁶ ne igimiti ng'olyootap otwogindennyi, ak kosuldoi kirwoogetap chechiik che kiyooktoi; ne mwaei agobo Jerusalem kole, tuun ki menyei; ak komwaei agobo nganasoogap Judah kole, tuun kiteechei, ak ang'eet komoswekyik che ki koek karatwek:

²⁷ ne mwachin rireet koleenjin, Yaam, ak ateenyi ainoosyeguk:

²⁸ ne mwaei agobo Cyrus kole, ineendet ko mestowondennyu, ak koyaei ineendet tuguuk tugul che achame: mwaei kogeny agobo Jerusalem kole, tuun kiteechei, ak komwachin Hekaluut koleenjin, Tuun kilumei lumeiyweguk.