ISAIAH 15 - BUKUIT NE TILIIL Sireet ne Dutero Kanon

¹ Maotenet agobo Moab. Amu king'emei Ar ne po Moab eng' kemout agenge, kiwong'; amu king'emei Kir ne po Moab eng' kemout agenge, kiwong'.

² Katogosta Bayit, ak Dibon, kot koit komoswek che torooreen, koba koriir; riirchin `Moab Nebo, ak agobo Mediba. Mi pooswek metowekwak, ki ketil tamnet age tugul.

³ Kermenegei kuniok eng' ortinwekwak. Iteei age tugul ak koriirei miising', eng' kooriikwak parak ak eng' komoswekwak che paraen.

⁴ Riirei Hesbon ak Eleale, kigasei kutusweekwak eng' Jahas. Waaktos anyun murenigap Moab che ilaachi kariik; potani saboondanyi.

⁵ Riirei muguleldanyu amu Moab; mwechin Zoar piik che mweoti mwechin agoi Eglatselisiya. Amu togostoe Luhit koriiryoti; amu iteitos kateiyet ne po ng'emisyet eng' ooreet ne wendi Horonaim.

⁶ Amu teng'dos peegap Nimrim; amu kagoresyo susweek, ma kobitoos susweek che ng'orng'or, ma komi kiy age tugul ne tuon.

⁷ Ibei anyun chaang'indap tuguuk che ki konyoor, kobooto che ki kogonor, koba ole mi kereruut ne mi keetiik.

⁸ Amu ki koit riirek kiwotosyek tugul che po Moab; kiit kateiyennyi Eglaim, ak kiit kateiyennyi Beer-elim.

⁹ Amu nyiitaat korotiik peegap Dimon, amu ta aipchini alak Dimon, amutyini ng'etundo ineendet ne chililee Moab, ak che ng'etu eng' emet.