2 ATEPTAP PEETUUSYEK 13 - BUKUIT NE TILIIL Sireet ne Dutero Kanon

Lugeet eng' kwenutap Abijah ak Rehoboam

¹ Ki toi kolaitoran Abijah eng' Judah eng' kenyiitap taman ak sisiit ne po laitornatetap Jeroboam.

² Ki laitoran kenyiisyek somok eng' Jerusalem. Ki kiguure kamet Mikaia cheptap Uriel ne po Gibea. Ki tinyei lugeet Abijah ak Jeroboam eng' kwenunnywa.

³ Kitet lugeet Abijah kobooto lugeetap murenik che nyigoonen che po lugeet, murenik eliphuusyek pogol ang'wan che ki kilewen, kitet agine Jeroboam lugeet kotinyei murenik eliphuusyek pogol sisiit, che ki kilewen, piik che kiimeen, che nyigoonen, kobargei ak ineendet.

⁴ Ki tonon anyun Abijah eng' tulweetap Semaraim ne mi emetap tuloonook ne po Ephraim, ak kole, “Ogasa, ee Jeroboam ak Israel tugul!

⁵ Tos manyoljok onai ole ki igoochi `Kamuktaindet ne Toroor, Kamuktaindetap Israel `Daudi pounateet koboi Israel koigeny ak weeriikyik eng' kayomisetap muunyuk?”

⁶ Ago king'eet Jeroboam weeriitap Nebat, otwogindetap Solomon weeriitap Daudi, kongelelji kiptaiyandennyi.

⁷ Ki iyumjigei ineendet piik che yaach weeriigap Belial che ki igimitkei kobargei ak Rehoboam weeriitap Solomon, ye kita ko ming'in Rehoboam ak kotinyei riirge, ak ma imuuch kogirinda icheek.

⁸ “Ak nguno oleen omuuchi ogirinde laitornatetap Kamuktaindet ne Toroor ne mi eunegap weeriigap Daudi, ak oo tuiyet ne oo, ak otinye moek che po thahabu che ki itang'wok Jeroboam koek kanamonik.

⁹ Tos ma oonu tisiigap Kamuktaindet ne Toroor, weeriigap Aron, ak Lawiik, ak olewenjigei tisiik, osubi pitonwegap piigap emotinwek alak? Si age tugul ne nyoonei koanyinyegei kirgit anan mengichik tisap, koegu nooto tisiindetap tuguuk che ma tilei kiy.

¹⁰ Ago Kamuktaindet ne Toroor ko Kamuktaindennyo acheek, ak tomo kebagaakte ineendet. Ki tinyei tisiik che poisyechin Kamuktaindet ne Toroor, weeriigap Aron, ak Lawiik che yaei poisyennywa.

¹¹ Peeljin `icheek Kamuktaindet ne Toroor kagoochinoik che kibeelei, ak nyamdutik che ng'uu ne anyiny, karonet age tugul ak koskoleng'ut age tugul, tetei magatiinik che itabaanatiin eng' meset ne tiliil, ak keldap tait ne po thahabu kobooto taisyekyik, si kolal koskoleng'ut age tugul; amu kiriibe acheek poisyetap Kamuktaindet ne Toroor, Kamuktaindennyo, ago ki omete ineendet.

¹² Ogeero, mi Kamuktaindet kobootech, kondoiywech, ak tisiikyik che tinyei iryagook che po waagaat si koguutwak ne po waagaat. Ee piigap Israel, amat obargei ak Kamuktaindet ne Toroor, Kamuktaindetap kwanisyekwok; amu mo poore.”

¹³ Ago ki chop Jeroboam piik kobwa koribisyo eng' let, ki mi icheek taitap Judah ak kimi let che kiribistos.

¹⁴ Ak kingo keer piigap Judah let, kogeer komi lugeet tainnywa ak let. Ki riirchi Kamuktaindet ne Toroor ak ki kuut tisiik iryagook,

¹⁵ ak kowaach anyun piigap Judah. Ak ye kita kowaachei piigap Judah, kobar Kamuktaindet Jeroboam ak Israel tugul eng' taitap Abijah ak Judah.

¹⁶ Kimwei piigap Israel eng' taitap Judah, ak ki inde `Kamuktaindet icheek eunekwak.

¹⁷ Ki par `Abijah ak piikyik icheek eng' pareet ne oo; kobek anyun piik che ki kilewen eliphuusyek pogol muut.

¹⁸ Ki kiming'in ko uu nooto piigap Israel eng' peetuusyechooto, ak ki iterteeris lagogap Judah amu kitiegei Kamuktaindet ne Toroor, Kamuktaindetap kwanisyekwak.

¹⁹ Ki oon `Abijah Jeroboam, ak korebe ineendet nganasook, Bethel ak nganasookyik, Jesana ak nganasookyik ak Epron ak nganasookyik.

²⁰ Mata konyoor kimnateet kogeny Jeroboam eng' peetuusyegap Abijah. Ki par `Kamuktaindet ne Toroor ineendet.

²¹ Ago kitesak Abijah kogimit. Ki itun osotik taman ak ang'wan, ak ki sich weeriik tiptem ak aeng' ak tiibiik taman ak lo.

²² Ki kisirchi poisyonik che ng'etunotiin che po Abijah, ak ortinwekyik, ak ng'aleekyik, kitabuutap maotyot Ido.