1 PETERO 3 - BUKUIT NE TILIIL Sireet ne Dutero Kanon

Manong'otoik ak osotik

¹ Uu nooto, osotichu, ogas iit manong'otaikwok; si nganda ma kase iit alak ng'olyoot, kimuuch kichuut icheek eng' atebeet ne myee ne po osotikwak ama eng' ng'olyoot,

² ye keerei atebeeng'wong' ne tiliil ne pooto kaiyweisyet.

³ Amaek lelestanywa lelesta ne po saang', ne po laetap suumeek, ak kalaagetap kariigap thahabu, ak kalaagetap ngoroik;

⁴ ago ingoek chiito ne ung'aat ne tinyei muguleldo ne po sabeet, ne tinyei lelesta ne ma ng'emaksei, ne tala ak kosiisei, ne eng' taitap Kamuktaindet ko po kamanuutyet ne oo.

⁵ Ki uu nooto kwonyiik che tiliileen chu ki po keny che ki imang'u Kamuktaindet, ki yaei lelesta icheeget ak kogase iit manong'otaikwak.

⁶ Ko uu ye ki kase iit `Sara Abraham, koguuree ineendet kiptaiyat. Oo lagokyik ngot oyae ne myee, amoiywei kamuiset age tugul.

⁷ Okweek manong'otaichu, otebi ko uu nooto kobooto osotikwok eng' ng'omnateet, ogoochini kwondo teegisto, amu ineendet ko nyalulat eng' muren, ko uu ye tuun onyooru tugul myeeindap saboondo; si ma kiger saautikwok.

Nyaliilda ye iyae ne myee

⁸ Ne po let anyun, ko oegu tugul che po kabwaatet agenge, che rireegei, che chamdos ko uu che tupcho, che ng'arng'ar mugulelwek, che iming'inegei:

⁹ che mayaaktoi yaityo eng' yaityo, anan ko ng'emetap kuut eng' ng'emetap kuut; ago oegu che iberuurisyei; amu ki kiguurchok niito, si onam kaberuret.

¹⁰ Amus, “Ineendet ne chamei saboondo, ak kogeer peetuusyek che myachen, ko ingoriip ng'elyeptanyi si ma mwa yaityo, ak kutinnyi si ma mwa ng'aalseet.

¹¹ Ingoistoegei yaityo, ak koyai ne myee; Ingocheeng' kaalyeet ak koosup.

¹² Amu tokyingei konyegap Kiptaiyat che po imanda, ak kogasei iitiikyik soomennywa. Ago kirindoi togeetap Kiptaiyat che yaei yaityo.”

¹³ Ak ng'oo ne yaiywok ne ya, ngot omache miising' kiit ne myee?

¹⁴ Ago ngot onyalili agobo imanda, ko oo poiboen: amoiywei kamuisennywa, anan oiimge:

¹⁵ ago ogonyit Kristo koek Kiptaiyat ne tiliil eng' mugulelwekwok: ak oegu che chobootiin kotugul owolji chii tugul ne teebenok ng'olyoo agobo kamang'unet ne miitei eng' okweek, ago eng' talasyet ak kaiyweisyet:

¹⁶ otinye kabwaatet ne myee; si ye kitaamok, kigoochin kolilaan icheek che mwaitae ng'aleek che yaach atebeeng'wong' ne myee eng' Kristo.

¹⁷ Amu kaigai ngot ko nooto mageetap Kamuktaindet, onyalilye amu oyae ne myee kosiir ye oyae ne ya.

¹⁸ Amu kime Kristo agine konyil agenge agobo tengekwogik, ineendet ne po imanda agobo che ma po imanda, si kobiit komutyech Kamuktaindet; ne ki kibar eng' poorto, ago ki kisoop eng' saboondo;

¹⁹ ki wo eng' nooto agine koamji saboonwek che ki mi korgoreet,

²⁰ che ki ma kogase iit eng' tai, ye kiganyei muitaetap Kamuktaindet eng' peetuusyegap Noah, ye ki ngeyaei moinget, ne ki kisaruunee che ng'ering' eng' peek, chooto ko ki piik sisiit:

²¹ kergeindap tuguuchuuto ko kabatisanet, ne sarwok agine eng' peetuusyechu, ma keele istoetap simdap poorto, ago waluunetap kabwaatet ne myee ne tokyingei Kamuktaindet, eng' ng'eetyeetap Jeso Kristo;

²² ne kikwa kipsengwet ak komi eutap tai ne po Kamuktaindet; ak ki kiyai malaikaisyek ak pounatosyek ak kimnatosyek kogas iit ineendet.