Maak 3 - Jola-Kasa

Yéesu li afaken an ata kaŋen kakete

¹ Nan fúlum tómuu, Yéesu li alaañen ajow boot li eluufayi yata kal̥awaku. Muñeˈe li baj dó ánayine ata kaŋen kakete.

² Bukanabuku kalako dómuu li kufañ min kul̥oof Yéesu, li kulasowool min kujuk mantee fan afaken ánayinaawu ummu li húyiiyaayahu hooliil.

³ Muñeˈe Yéesu li aan ánayinaawu ata kaŋenaku kaketumuu: — Uyito, ulako taatu hákil ésukayi feh.

⁴ Ban li agel̥l̥en bukanabuku kalako dómuu aaniil: — Waa eluwaayi elobe kakaan li húyiiyaayahu hoololaal? Mantee an layilo akaan wah wajake, mantee wah wajakut? Mantee foof an layilo afaken an, mantee amukool li húyiiyaayahu? Li kulu to sub.

⁵ Yéesu li ajukeliil foofiil feh mawuñete. Li jokool foof ŋáa’ min kubajumuu uyinoo wajakut. Muñeˈe li aan ánayinaawu: — Ulaaw kaŋenaku kooli! Mal̥egen ánayinaawu li alaaw kaŋenaku, li kuyaan kufak.

⁶ Muñeˈe Kufaaliisiyeŋaku li kuyaan kúfulul li eluufayi yata kal̥awaku, kujow kujoj li bukanabuku kata Elod, min kujamoo buu kommuu li kukaan min kumuk Yéesu.

Búsuk báamak li bubil butook Yéesu

⁷ Muñeˈe Yéesu li ajow li kúgoomaku koola ló boot bata katantaku kata húwajahu hata Gálile. Bukan kameeŋe li kunabenool bo. Bukanabuku umbuku li etaamayi yata Gálile li yata Súde kubilumulo,

⁸ li Yeelusalem, li etaamayi yata Idúme, li etaamayi yammuu kageb kaaka katunkaku kaaneyimuu Suuludeŋ, li halaabahu hata Tiil li Sidoŋ. Búsukabu umbu li bubil bata Yéesu mata bujanjam wahawu feh wan akaanumuu.

⁹ Muñeˈe Yéesu li aan kúgoomaku koola kujok jisaana kukatool to min ájufo ló, jakum bil búsukabu buñuññool!

¹⁰ Emmuu Yéesu lafakenfaken bukan kameeŋe, bukanabuku feh kásomutumuu li kulako buñuññoo mantee li kugolool.

¹¹ Muñeˈe nan uyinumawu wajakutumuu ujukumuu Yéesu, li ulo hákilool ban li unaak úlobul butiya woon: — Awu ommuu Añiilawu ata Ateemit.

¹² Bale Yéesu li anuuloo wo li sembe jakum bil uheb ésukayi akila ammuu ayi.

Yéesu li al̥us kúfootal kuŋen li kúl̥uba

¹³ Muñeˈe nan fúlum tomuu, Yéesu li ajow aŋito li huyuuy. Li ahooñ bukanabuku kan afañumuu, ban li kujow boot tan alakomuu.

¹⁴ Yéesu li al̥us to li buko bukan koono kuŋen li kúl̥uba [kan kuhooñemuu foof Kufootal] boot min kulako li akila min aboñiil foof kujow kuwaale Hulimahu Hásuumaahu hata Ateemit,

¹⁵ min aseniil foof sembe sata kakesoo uyinum wajakut úfu’ li bukanabuku kan újufomuu.

¹⁶ Ujawawu wata bukanabuku kan Yéesu al̥usumuu wo wommuu unwe: Simoŋ an Yéesu ahooñemuu Fiyeel,

¹⁷ Saak ata Sebede li atuyool Saŋ, kan Yéesu ahooñemuu Bowaluges: yo yommuu kuñool hufalajaj,

¹⁸ Andele, Fílib, Baatilime, Máciya, Toma, Saak ata Alife, Tade, Simoŋ ata hujojahu haaneyimuu Selot,

¹⁹ li Sudaas Isikaaliyot abetumuu Yéesu li kuŋen kata bukan.

Butoŋabu bata Yéesu li bulako huŋes min bujow li akila lóyi búsukabu

²⁰ Muñeˈe nan fúlum tómuu, Yéesu li alaañ bóot. Búsuk báamak li bumit búbil buwonnoo to li eluufayi, gay Yéesu li kúgoomaku koola kuyilaat kutiñ.

²¹ Nan bukanabuku kata butoŋabu bata Yéesu kujamumuu loon muñaˈa, li kubil kuŋalool, mata kunaanaak koon: — Yéesu húkowool húsuumut.

Yéesu li abag kámalumuu kul̥oofool

²² Muñeˈe bukanabuku kaliikenumuu ésukayi eluwaayi yata Móyiis káfulumulomuu li ésukayi yata Yeelusalem, li koon: — Bélusebul ammuu Sayitaane anokene Yéesu. Li akila ammuu anahaanawu ata uyinumawu wajakutumuu Yéesu ákesoolumemuu uyinumawu wajakutumuu úfu’ li bukanabuku kan újufomuu.

²³ Muñeˈe Yéesu li áhooñuliil aban li aŋa’ bukittenoolum min alob li buko aaniil: — Buu Sayitaane ayilo akesooloolo akila humumool?

²⁴ Jáyii jilakomuu, ban bukanabuku kata jo li kutiikoo ló, fan jiyiisoo.

²⁵ Bukan kata butoŋ bano kutiikoomuu, butoŋabu let bufiyo.

²⁶ Nokoomuu loon kama Sayitaane atiikenoolowe akila humumool, mantee foof jáyiiyaju joola jitiiloole, let alaañ abaj sembe. Hoola li huban.

²⁷ «An ayilaat ahaat kámbii kata eluuf yata an ata sembe, min ajow ákuwetul ebajayi yoola, akila bajandut ajenkool. Bale ajenkumuu anawu ata sembaasu aban, li akit ayili ákuwetul wahawu wan abajumuu feh li eluufayi.

²⁸ «Li mal̥egenamu boot min ilobuul, Ateemit fan abonket bukanabuku uhoofoolawu wooliil wan kukaanumuu feh, li ugelawu feh wan kugelewoolumuu.

²⁹ Bale an agelumuu Buyinumabu Banabaabu, Ateemit let abonketool maayeet, mata lakankaan kahoofoo kata boot nanoonan.»

³⁰ Yéesu lalobiilob loon muñaˈa, mata kunaanaak koon: — Buyinum bajakut bújufowool.

Kutuyaayaku kata Yéesu li jaawool

³¹ Muñeˈe nan kutuy Yéesu li jaawool kúliiŋulomuu, li kuyito tíyaŋ eluufayi min kuboñ an ajow áhooñuliil Yéesu.

³² Emmuu bukan kameeŋe buko babahe kúwooñen Yéesu, akee li abil aanool: — Jaawi li kutuyi kumbuka min kuyitowe tíyaŋ, ban kufañe min kujuki.

³³ Yéesu li aan: — Kama ayi ammuu jaawom? Bukay kommu kutuyom?

³⁴ Muñeˈe Yéesu li ajuke bukanabuku feh kabahumuu kúwooñenool, ban li aan: — Jaawom li kutuyom buko kommuu umbuku.

³⁵ Mata an akaanumuu loon Ateemit afañumuu, anawu ummu okila ammuu atuyom, áliinom li jaawom.