Tito 3 - Kaxinawá Bíblia (BR)

Jesus Cristo ikũwaĩ haskai hiwekũkaĩtikiaki, na hãtxarã

¹ Ikũwaĩbu hau eskakubainũbũ ẽ mia hatukiri xinãmaii. Habũ mae yunuaibu shanẽ ibubũ hatu hawakirira yunuabu hatu nĩkatã hau ashũkubainũbũwẽ. Hawa txikixama hamapai tibi hatu yunuabu: “Hamaki”, ikama hau ashũkubainũbũwẽ.

² Tsuakira hãtxa txakabukĩ hau yuiyamakubainũbũwẽ. Ha inũ, duapa besti inũ pepahaira bestikinã, hatuwẽ nuikĩ huĩti babutã dasibibu hatu haibuwakĩ hau hatu uĩmakubainũbũwẽ.

³ Nukurã, habiaskari hatu itsari nukũ xinã betsa wariama hiweshũ Deus txibã pewama benua keska nishũ hamapai betsa betsapa mei kemui txakabũ dayarui nũ mapupaunibuki. Haskai hiwea txakabui betsa hawara haya uĩ haska hayatima hawẽ kemui hatuki sinatai inũ abunameama hatu danaĩ inũ betsabube danãnanaĩnã.

⁴ Hakia hanushũ nukũ mekenã Deus dasibi mai anuabu nukuwẽ nuikĩ nuku abukĩ hawẽ pepa nuku unãmaniki.

⁵ Nukubũ hawa wakĩ nũ peshunamabia hawẽ nui pepas hawa husiamawẽ nuku mekekĩ piskumaniki, nukũ txakabu txuka keska wakĩ. Nuku ana kaĩ bena wakĩ hawẽ hiwea bena nuku inãniki, hawẽ Yushĩ Pepawenã.

⁶ Nukũ mekenã Jesus Cristõ hawẽ pepa hawa yauxiama hawẽ Yushĩ Pepatũ kuxipa nukuki dasiwaniki.

⁷ Nukũmebi nũ Deus hawa pepa ashũtirumabiakẽ duapa nukuwẽ nuikĩ nukũ txakabu nuku buashũtã hawẽ pepawẽ hawẽ hiwekuĩti nũ bishanai nũ hawẽ manakanũ hawẽ Yushĩ Pepa nukuki dasiwaniki.

⁸ Na haskakiri yusĩanã, txanima kayabiki. Henekĩ betsa wama hakiri hatu yusĩkubaĩwẽ, habũ Deus ikũwaĩbu duapai hau hawẽri hamapai pepa akubainũbunã. Na hãtxa haska tibiwenã, haska hayatã dasibibube pepatirubuki.

⁹ Hakia Deusũ Moisés yusĩmaniwẽ taea hawẽ yunuti inũ hawẽ nemati inũ hatũ shenipabukiri hãtxai judeubu sinatai kemanamei tsua merabewatirumabia ha iki kũyã ikaibube hatube kemanamei haskayamakũkaĩwẽ, mia nĩkabumakenã.

¹⁰ Tsuãra Jesus Cristo ikũwaĩbu hatu itimaska wakĩ hatu pashkakatsi ikaibu merabewanũ, iwanã, kenatã mĩ yuia nĩkamakẽ ana ha katxu kenatã mĩ yuia nĩkamarikẽ hanushũ hau ana matube itxayamashanũ nematã hatu nitxĩwẽ.

¹¹ Ha yurabunã, hamapai txakabu wakĩ hawẽ huĩti merãshũ ana Deus nĩkabuma ibubis hamebi hatũ txakabuwẽ Deus ma kupimaikiki.

Tito dayaikiri kenekĩ keyunikiaki, na hãtxarã

¹² Uĩa, niwehairaitiã Nicópolis anu ẽ hiweyushanaii. Mĩ dayai anu Ártemas kasmai Tíquico ẽ yunua mia anu kaya hanu hawairakirã Nicópolis anu eki nukui hushãwẽ.

¹³ Nukũ haibu Zenasĩ governo yunuti inũ hawẽ nemati unãhairai inũ yusĩnã Apolo mia anu kai hikixina hanua kaya hau bui nuitapayamanũbũ ana hatũ hamapai ikũwaĩbu hatu inãmakĩ hatu merabewamashãwẽ, hau haya butanũbunã.

¹⁴ Mĩ hatu haska wamaiwẽ taeshũ nukunabũri tapĩtirubuki, hatũ hiweawẽ pe merabenameti xara hatu uĩmakĩ Deus dayashunaibu hatu merabewatirubuki, hatũ hiwea pekiri hatu xinãmakinã.

¹⁵ Dasibi nenu ebe ikabũ hatũ hãtxa mia bumakanikiki. Hari mibe iriabu anu nukũ haibu nukubetã ikũwaĩbu nuikĩ nũ hatu abuai nukũ hãtxa nũ hatu bumariaii. Deusũ hawẽ pepawẽ hau matu dasibi duawakubainũwẽ. Hatiski, ẽ hãtxarã. Paulo