Rute 1 - Kaxinawá Bíblia (BR)

Israelĩ enabu huni betsa Elimeleque hawenabube Moabe mai pakea betsa anu hiwei kanikiaki, na hãtxarã

^1-2 Israelĩ enabu unãti wanikabũ hatu merabewakubainaibũ habiatiãri ana ui ikamawẽ taea hatũ bai yunu beneama eskarabeswẽ taea Israel mai pakea hirabi anu dasibi bunihairabaunaibũ Judá enabu huni betsa hawẽ kena Elimeleque mae Belém anu hiwebia buniwẽ taea Hene Jordão pukebaĩkĩ hawẽ aĩ Noemi inũ hawẽ huni bake dabe Malom inũ Quiliom hatu shetukunamakĩ hatu hiwemayunũ ika Moabe maiwã pakea betsa anu bui hikimabu Belém anua buimabu hatube hiweabuwẽ taeshũ: “Efrata nawabuki”, iwanã, hatu kenakubainibukiaki.

³ Hari kaima hawẽ bene Elimeleque mawakĩ Noemi inũ hawẽ huni bake dabe hatu shunuĩma hiweyuabũ

⁴ hanua hawẽ huni bake dabe ewatã habiaria Moabe aĩbu dabe bimabu hatũ kenarã, Orfa inũ Rute inikiaki. Hanua hatu haska waimabu ma 10 ano kaya

⁵ habiatiãri Noemi huni bake dabe Malom inũ Quiliom mawashinabũ Noemi beneuma inũ bakeuma inũ babauma nuitapai hawẽ babawã dabebe besti hiweyuabũ

Noemi Rutebe Belém anu txĩtunikiaki, na hãtxarã

⁶ hawẽ mae Belém anu Senhor Deusũ yunu ma hatu ana pawashunima Moabe anushũ Noemi bana nĩkatã

⁷ hawẽ mae Belém Judá mai pakea anu ana txĩtuĩ huaya hawẽ babawã dabetũ txibaĩ hatũ mae anua kaĩbaini bui

⁸ habetã bai tanabainaibu Noemi niti itã hawẽ babawã dabe yuikĩ: —Ebe kama txĩtũbaini matũ ewã hiwe anu hiwei burikãwẽ. Ea inũ ẽ huni bake dabe mã nuku duawaima keska wariakĩ hau Senhor Deusũ matu duawariakubaĩshanũwẽ.

⁹ Senhor Deusũ matu merabewaya huni pepa benewatã mã unanuma habe hiwetiruki— hatu watã nitxĩkĩ hatu tãtsu arabebia ha dabe kashai taekĩ

¹⁰ Noemi yuikĩ: —Haskamaki. Mĩ mae anu mibe nũ kaii— akabu

¹¹ nĩkamas Noemi hatu nemahairakĩ: —Mã ẽ bake keskabũ, haskamaki. Txĩtũribaĩkãwẽ. Haskai mã ebe huai? Ana ẽ bake bitirumaki, habu mã benewatirurã.

¹² Matũ ewã hiwetã txĩtũbaini burikãwẽ. Ẽ ma yushabuwẽ taea ẽ ana beneyatirumaki. Hakia mã haska shinãkĩ manatirurã, na habiatiã tsuãra ea bitã barikis ea txuta huni bake ẽ matu bishũtirurã, ẽ haskayarã, mã manakeanaii.

¹³ Ha dabe ewaibũ hatu bene wakatsi mã manatirumẽ? Mã beneumas hiweshũ mã manakubaĩtirumẽ? Haskamahairaki, ẽ bake keskabũ, Senhor Deusũ ea nuitapawakĩ ea bika tenemaikiki. Haska enas ẽ tenepanã matu dikabi mã nuitapai uĩ ẽ bika tenekatsi ikamaki— hatu wa

¹⁴ habu ana hawẽ nui kashakubaini nesetã atimas Orfã shinã betsawatã henebaĩkatsi Noemi tãtsu abaini kaya hakia Rute ha kama bashikutã habe kaya

¹⁵ Noemi ana Rute yuikĩ: —Uĩwẽ. Mĩ dai ẽ babawã betsa hawenabu anu inũ hawẽ mekenika yushibubu anu ma txĩtũkainikiki. Miari habe karitãwẽ— aka

¹⁶ nĩkamas Rute kemakĩ yuikĩ: —Mia dapashkakĩ ẽ mia henebaĩtanũ ana ea yunuyamawe. Mĩ hanu kai anu ẽ mibe kaii. Hanu mĩ hiweai anu ẽ mibe hiweriashanaii. Minabu enaburi ishanikiki. Mĩ mekenika Deusrã, ẽ Deus iriashanikiki.

¹⁷ Mĩ mawai anuari eari ẽ mawariashanaii. Hanu mia maiwaibu anu habianuri ea maiwatirubuki. Nũ mawai anu besti nũ pashkatiruki. Hakia ha ẽ mia yubashu ẽ akamakẽ ea itxakahairawakĩ hau Senhor Deusũ ea kupishanũwẽ— atã

¹⁸ haska Rute shinã pewashu Noemi unãtã hau habe kanũ ana hawa yuiama habe kai

¹⁹ haska wabaini habetã bai tanakubaini atimas hawẽ mae Belém anu kematã hikikaini kaya tsuãra uĩtã kakabaunaibũ aĩbuaibũ yuikĩ: —Harã, habiamẽ, Noeminã?— ikeakeaibũ

²⁰ hatũ hãtxa nĩkatã Noemi hatu yuikĩ: —Ana ea Noemi wãkĩ kenama ea kenakinã, “Mara” ea wakãwẽ, “Muka Aĩbu” wakinã, Deus kushipahaira dasibi binuatũ muka keskawẽ ea bika tenemakĩ mata waimakirã.

²¹ Nenua beneya inũ bake dabeya ẽ kaĩkainiki. Natiã nenu ana huirã, haska Senhor Deusũ betxipaikĩ ea akima beneuma inũ bakeumari ẽ txĩtũkiranaii. Haska wakĩ Senhor Deus kushipahaira dasibi binuatũ ea nuitapawakĩ yumãwãkĩ ea kupiniwẽ taeshũ mã ea ana “Noemi Batapa” wakĩ kenatirubumaki— hatu wa

²² haskakũkirani hawẽ babawã Moabe nawa Rutebe Moabe anua txĩtũkiranirã, hanu hatũ shekiwã betsa cevada tsekakĩ taewaibutiã hawẽ mae Belém anu Noemi hikitushi haskanikiaki.