Provérbios 7 - Kaxinawá Bíblia (BR)

Aĩbu beneyabiatũ mia txutamakatsis ikai unãmatikiaki, na hãtxarã

¹ Epaã, ẽ hãtxa nĩkakĩ ẽ yunuti hãtxa shinaĩrakubaĩshãwẽ.

^2-3 Haska mĩ beru yaushikĩ mĩ pe mekemis keska wakĩ ẽ yunuti hãtxa inũ ẽ yusĩti hãtxa mĩ mekẽ anu dispiwẽ nea keska wakĩ mĩ shinã uke merã netã pewatã shinãkubaini mĩ pe hiwetiruki.

⁴ Unanepa hãtxakiri shinãkĩ: “Unanepa hãtxawẽ mĩ hawẽ hãtxatirurã, mĩ pui keska wawe. Hawaira tapĩtikiri shinanã, mĩ haibu aĩbu keska wawe.

⁵ Mĩ hatu haska warã, aĩbu beneyabũ hãtxa hawẽruawẽ mia txutamakatsi ibiaibũ unanepati hãtxa inũ hawaira tapĩti shinã mĩ hayawẽ mĩ pashatiruki.

⁶ Shaba betsatiã ẽ hiwe hanu uĩti shui bepẽshũ hune ẽ uiãyã

⁷ berunãbu hawa shinã pepa biriabuma ea daĩbainaibu hatube berunã betsa unaĩsmapahairari kai ẽ betxia

^8-9 ma bari kai meshuaya ha berunã bai tanabaini bai betsa ketãbaini kapukebaini aĩbu paranananikatũ hiwekiri kayãbis kaya

¹⁰ ha aĩbu hawẽ hiwe anua ha berunãki nukunũ ika tashnikirani hawẽ batxi inũ hawẽ besu hawẽrua hininipa beneuma keska

¹¹ bebũkiri hawa shinãma hawaira hãtxai inũ hawẽ hiwe anu dayaisma

¹² mae ewapa anu bai inũ praça bai kesha tibi anu nikũkaĩkĩ ha dukũ huni huai atxikatsi manakubaĩmis ha berunãki nukutã

¹³ ikushũ hãtsu hãtsu atã hawa dakeama yuikĩ:

¹⁴ “Haska ẽ yubakashina ikis ẽ yushĩ deus daewati ina sheni ẽ hatu kuamakĩ keyushuki. Ẽ ma piti hayaki.

¹⁵ Haskawẽ taea miki nukunũ ika ẽ tashnikiranaii. Haska betxitanũ ika hukirã ẽ ma miki nukushuki.

¹⁶ Egito anua tari hawẽruawẽ ẽ dakati bebekãkĩ pewatã

¹⁷ mirra inũ aloés inũ canela sheni inihairawẽ ẽ txa abirãshuki.

^18-20 Ẽ bene hanumaki. Nãta txai kashiãki. Pei itxapa bushiãwẽ taea ushe babekeriamakẽ txĩtũriamawẽ taea ẽ hiwe anu kanãwẽ, haria penariama meshu hirabi txutanamei betxipainamei nũ benimanunã”, akĩ

²¹ hãtxa hawẽruawẽ yuikubaĩkĩ heneama ha berunã hawẽ shinã betsa wa

²² ana hawa shinãma habe ha itxũ kaimaki. Ina awa tesenũ ishũ hawa unãma dispiwẽ neshashũ ninibaĩkĩ iyumisbu keska inũ txashu birũ merã hikia

²³ pia kuĩwẽ tsakakĩ pishtxakash amisbu keska inũ peiyabu hui hisĩ txaipa biruãbuki hikimisbu keskairã, ha berunãtũ aĩbu hininipa txibaĩ mawai kaikiki, hawa unãmarã.

²⁴ Haskakẽ epaã, ea nĩka pewakĩ ẽ hãtxa shinãkubaĩshãwẽ.

^25-27 Ha aĩbu hininipã hiwe anu kai hawẽ bai tanabaini itxapa mawamisbuki. Aĩbu hininipã hatu iyushũ txakabuwaya huni itxapa ma debuabuwẽ taeshũ haska aĩbu hininipã hatu amisbu shinãkĩ miãri kanei hatxũ kayamashãwẽ, ha baiwẽ kai mawai benukatsi ikamarã.