Provérbios 2 - Kaxinawá Bíblia (BR)

Unanepairã, habiawẽ pepai hiwekubaĩtirubukiaki, na hãtxarã

¹ Epaã, mĩ ẽ huni bakewẽ taeshũ ẽ hãtxa nĩkatã hakimama ẽ yunuti inũ ẽ nemati hãtxa txibãkubaĩshãwẽ.

² Unanepabũ mia yusiaĩ nĩka pewakĩ txanima hãtxa tapĩtã hakimama haskai hiwekũkaĩshãwẽ.

³ Haskai mĩ unanepatiru inũ mĩ hawara pehaira unãti watiru tapĩkatsirã, mĩ kushipa hirabiwẽ Deus yukakubaĩshãwẽ.

⁴ Pei inũ mabu pepa hunea binũ, iwanã, benamisbu keska wakĩ unanepati hãtxa tapinũ, iwanã, benahairakubaĩshãwẽ.

⁵ Mĩ haska benaiwẽ taea haska Senhor Deus duawai mĩ dayashũtiru inũ mĩ hakiri tapĩkĩ unãhairashanaii.

⁶ Senhor Deusũ yusiã tsuãra pe tapĩkubaĩkinã, haska unanepatiru inũ haska betsa betsapakiri tapĩhairatiru Senhor Deusũ yusĩkĩ hatu inãshanikiki.

⁷ Tsuãra hawa kaneama inũ hawa txanitxakama pepa besti hiwekũkainairã, Senhor Deusũ merabewakĩ hatu mekekubaĩmiski.

⁸ Tsuãra hatu paraĩsma inũ Senhor Deusũ hãtxa ikũwaĩ txĩtuĩsma Deusũ habu yaushikĩ mekekubaĩmiski.

⁹ Pepai hiweabu Senhor Deusũ hatu mekekubaĩmiswẽ taeshũ miari hawa txanitxakama inũ hawa parananãma dasibi mĩ pe besti hiwekũkainai mĩ tapĩshanaii.

¹⁰ Unanepa hãtxa unãkĩ tapĩtã mĩ huĩti merã mĩ benima txakayamashanaii.

¹¹ Hawara bika hawaira tapĩtã hakimama mĩ bebũkiri pe shinãkubainaya tsuã mia parãtiruma ishanikiki.

¹² Deusũ shinã mĩ tapĩhairaiwẽ taea hunibu txakabu anua inũ hiwei peabuma anua unanepai mĩ piskukaĩtiruki.

^13-15 Deusũ mia mekeaya tsuara hawẽ hiwea bai pepa henebaini kaima bai atimapa yushtu keska txibãkĩ daketapai txakabu mei beyuskĩ yura betsa isĩ tenemai hunibu txakabu nawai besi atimapaibu keska mĩ hawa hatu txibãma ikũkaĩshanaii.

^16-17 Deusũ mia unanepa waya txipash Deusbe yubakatã beneyabiani Deuskiri hakimatã hawẽ bene ma henebainima mĩ hakiri hawa unãma ha aĩbu hininipatũ hãtxa hawẽruawẽ mia hawẽ kemumakĩ mia yubakatsi ikaya pe shinãkubaini txakabukatsi ikama mĩ hawaira putabaĩtiruki.

¹⁸ Ha aĩbu hininipatũ hiwe anu tsuara kairã, ha baiwẽ yura mawai bumis keskabuki.

¹⁹ Hawẽ hiwe anu hikitã ana txĩtũkirãtirubumaki, hawẽ hiwea bai pepa ana betxitã txibãmarã.

^20-21 Hakia tsuabũra hawa kaneama inũ hatuki txanitxakama pe besti hiwekubaini na mai anu hiweyukubaĩmisbuwẽ taea miari pe hiwekĩ bai pepa txibãkubaĩshãwẽ, pepabũ amisbu keska akubainirã.

²² Hamẽ habu parananãmisbu inũ hunibu txakabukubaĩmisbu mibã betsea keska wakĩ Senhor Deusũ hatu urẽshanikiki, na mai anu ana hatu hiwemamarã.