Números 21 - Kaxinawá Bíblia (BR)

Canaã nawabu dete keyutã hatũ mae Horma ibu wanibukiaki, na hãtxarã

¹ Ha Neguebe mai ewapa kesukaunanu Canaã nawa shanẽ ibuhaira hawẽ mae ewapa Arade anu hiweshũ Israelĩ enabu Atarim baiwẽ beaibu haki txaniabu nĩkatã hawẽ detenamenikabuya kaĩbaĩ hatube detenamekĩ Israelĩ enabu hatu maemakĩ hatiri atxitã hatu bitxishinabũ

² hanushũ Israelĩ enabũ Senhor Deus yubakĩ: “Mĩ nuku merabewaya nũ hatu maemakĩ hatũ mae tibi anua nũ hatu detekĩ keyubaũtiruki. Miauma nũ atirumaki”, akabu

³ haska yukabu nĩkashũ Senhor Deusũ hatu yuikĩ: “Peki”, ishũ hatu yunushũ hau hatu maemanũbũ itã hatu merabewaya Israelĩ enabũ hatu detekĩ Canaã nawabu dasibi debuwakĩ keyushũ hatũ mae tibi kuakĩ yamawakĩ keyunibukiaki. Haska watã ha maewã kenakĩ: “Hormaki”, anibukiaki, nukũ hãtxawẽ kenakĩ: “Hatu Keyunibu Maeki”, akinã.

Moisĩ mane bronze dami wakĩ dunu wanikiaki, na hãtxarã

⁴ Edom nawabũ mai pakea dũkebaũkatsi Mati Hor anua sulkiri bui Ianẽwã Tashipa derũkebauni bari huaikiri dũkebauni hĩ hĩ ikama bebiashina bai itimaskawẽ taea sinatakĩ

⁵ Senhor Deus inũ Moiséski hãtxa txakabukĩ ana Moisés yuikĩ: —Nenu hanu tsua hiweabuma anua nũ mawashanũ Egito anua Senhor Deusbetã mĩ nuku iweniki. Uĩwẽ. Piti kayabi nũ hayamaki. Hawẽ neshuti ũpash nũ hayamariki. Penaya tibi besti ha maná duru nũ bimis ha besti piti txakabu pi nũ mã hatsãki— akĩ kũyã akabu

⁶ hatu kupikĩ dunu paepahaira itxapa Senhor Deusũ hatu yunua beshũ hatu pikĩ bishakubauna Israelĩ enabu itxapa mawakubaunaibũ

⁷ hatiri isĩ tenei Moisés anu itxashũ yuikĩ: —Senhor Deus inũ mia itxai nũ kanehairashinaki. Dunu hau nitxinũ Senhor Deus nuku yuishũwẽ— akabu Moisĩ hatu yukashuna

⁸ nĩkatã Senhor Deusũ Moisés yuikĩ: —Ha dunũ hatũ hatu piai keska hatu dami washũtã txibu keyatapa mamaki hatu dũtãshũwẽ. Dunu paepahairatũ tsuara hatu pikĩ bisha isĩ tenei hushũ ha mane dunu uĩ mekei shushashãkanikiki— aka

⁹ nĩkashũ bronze mane tashipa dami wakĩ dunu keska Moisĩ ashũ txibu keyatapa mamaki anu puẽtã nitxĩkĩ dũtãkẽ tsuabura dunũ pikĩ bisha ha dunu dami dunua uiĩ shushakubainibukiaki, ana mawamarã.