Números 11 - Kaxinawá Bíblia (BR)

Israelĩ enabũ nami pikatsis ikaibu Senhor Deusũ hatu yubanikiaki, na hãtxarã

¹ Shaba betsatiã bika tenekubaini hune Senhor Deuski ha ikaibũ Senhor Deusũ hatu nĩkai hatuki sinatahairakĩ hatũ tari hiwe pũtebaunabu dapi txi here dekutã putabaunaya

² yurabu bibiski ibaũkĩ hau hatu merabewanũ Moisés yukabu hanushũ Moisĩ nĩkatã Deus hatu yukashuna nĩkatã Senhor Deusũ txi hatu nuka washuniki.

³ Hanushũ Senhor Deus hatuki sinatakĩ txi herewẽ hatu menukeãshinawẽ taeshũ hari shinãkĩ kenakĩ: “Na mae kenarã, Taberáki”, anibukiaki.

⁴ Yura betsa betsapa shuku betsa Egito anua hatube pashai beimabu Israelĩ enabube hiwekubirani piti pepa bestikiri shinãkubiranaibũ atimas Israelĩ enaburi hatubetãs shinã txakai kashai yuinamekĩ: “Uatiã nũ pimis keska tsuã nuku nami inãpainũ nũ pĩtsi ikaii.

⁵ Egito anushũ baka mirimahaira hamẽ nũ pikubainimarã, ẽ shinãhairaii, pĩtsikinã. Ha dikabi pepino inũ, melõe batapa inũ, porro inũ, cebola inũ, alho nũ hamẽ pikubaĩmis nũ shinãhairaii.

⁶ Hakia nenushũ nũ hawa piama buni tenei mawaii. Hawa betsa hayama na nai anua duru maná besti pikubaini nũ ma hatsãshinaki”, ikubainaibũ

⁷ ha piti manákiri matu yuinũ ea nĩkakãwẽ. Manárã, uĩkĩ coentro heshe keska inũ hi shuku paxinipa keskaki.

⁸ Hawẽ piarã, hawẽ nis shekiwã misi sheniyabi bawashũ pia keskaki. Ma bari keyaya nai anua duru maná binũ ika bushũ bitãshũ denekĩ kasmai tĩ tĩ akĩ pewatã ũpashki huatã kasmai misi wakĩ ũpash eskarabeyabi mishpu washũ itxawashũ tsuikĩ bawakĩ misi wakubainibukiaki.

⁹ Meshu merãri nibi itxatã hatũ mae hirabi anu tuis tuis iki nai anua duru manaũria niri ipaunikiaki.

¹⁰ Hatũ tari hiwe hikiti anu Israelĩ enabu tibi hawenabube pĩtsiaibuwẽ taea kashai keskai hune Senhor Deuski ha ikaibu Moisĩ nĩkai, Senhor Deus hatuki sinatahairaya hatũ hãtxa betxipaiamari

¹¹ Moisĩ Senhor Deus yuikĩ: —Ẽ mĩ tsumarã, haskakĩ mĩ ea itxakawai? Hawa ekiri txakabu mĩ hayamẽ? Minabu mĩ ea hatu iwemaima eas bika tenemakanikiki.

¹² Hanu hatũ shenipabu mĩ hatu yubani anu hatu iyukinã, bakeishtã txutxu akai keska ikushũ ẽ hatu iyushanũ mĩ ea yunuimamẽ? Ẽ hatũ epamẽkaĩ. Ẽ hatũ ewaraka. Ẽ haskamaki.

¹³ Hania ẽ hatu nami bishuaĩ, na yura mirimahairabũ hau pinũbũ nami hatu bishũkinã? Kashakubirani beshũ ea yuikĩ: “Nũ nami pikatsis ikai nuku bishũwẽ”, ea akeakekanikiki.

¹⁴ Na yurabu ana ẽmesti ẽ hatu iyukatsi ikamaki, ea bika tenema txakayamaibuwẽ taeshunã.

¹⁵ Mĩ haskas ea dayamakĩ hatu iyumairã, ẽ betxipaiamaki. Haskakenã, hawaira ea tenãriwe. Mĩ ma ea tenanã, ana ẽ bika teneai mĩ ea uiãma ishanaii— aka

¹⁶ Senhor Deusũ Moisés kemakĩ yuikĩ: —Tsuabura ha habũ hatu yunua hatũ hãtxa nĩkamisbu 70 shanẽ ibubu unanepa katutã ea hatu itxawashũbirãwẽ. Hanu Deuski nukuti tari hiwe anu hatube huwe, mibetã hau ea manai benũbunã.

¹⁷ Uiaĩbu bututã ẽ mibe hãtxai kaii. Hau habuã mia merabewakĩ ha yubabu mibetã hau mekekubaĩshanũbũ ẽ yushĩ mĩ hayarã, pashkashũ hatu tibi ẽ inãbaũshanaii, mawaira ana mimesti bika teneama hatube mĩ merabenãshanunã, minabu hatu merabewakĩ iyuirã.

¹⁸ Minabu eskaibu ẽ nĩkaii. Pĩtsihairai kashakubirãkĩ yuikĩ: “Egito anushũ nami pikubaini nũ pe hiweimaki. Hakia nenu nũ huima tsuã nuku nami inãmaki, nũ pinũbunã”, ikaibu ẽ Senhor Deusũ ma ẽ hatu nĩkawẽ taeshũ meshukiri ẽ hatu nami inãshanaii. Haskawẽ taeshũ hatu yunuwe, hau hatũ txakabu henei shinã betsai nashinũbunã, meshukiri nami ẽ hatu inã pikatsirã.

^19-20 Ea Senhor Deus matube kakĩ ẽ nĩkayamaya keska haskai mã ea danã paepawai? Kashai yuinamei: “Haskatanũ ika nũ tashnikiranimamẽ, Egito anushũ pikĩ pewabiairã?” iki “Ikis mã hãtxakũkainaiwẽ taeshũ shaba bestitxaima, inũ shaba dabemari inũ, 5 shabama inũ, 10 shabama inũ, 20 shaba bestima hatiã besti mã nami piama ikubaĩshãkanaii. Hakia ushe bestitxai mã nami pikubaĩshãkanaii. Pikubaini hatsãtã hanãkatsis iki mã katsa hanãkũkaĩshãkanaii, dekĩ shuiwẽ dikabi hanã beirã”, akĩ ea hatu yuishũwẽ— aka

²¹ Moisĩ kemakĩ yuikĩ: —Na yurabu mirimahaira aĩbu inũ bake mishtĩbu tanama 600.000 hunibu besti ebe beaibũ ha hati yurawanã, mĩ nuku pimai? Miã yuikĩ: “Ẽ hatu nami inã ushe bestitxai pikubaĩshãkanikiki”, mĩ ishuki.

²² Hania hatira nukũ txashuwã inũ nukũ ina awa detekubaĩkĩ dasibi nũ hatu pimakubaĩshanai? Ushe bestitxai nũ hatu pima keyutirumaki. Damaki. Ha dikabi ianẽwã anua baka dasibi bikĩ neshe keyushũ nũ hatu pima keyua damariki— aka

²³ Senhor Deusũ Moisés ana kemakĩ yuikĩ: —Mĩ ea shinanã, ẽ kushiparã, pesheishta dabanẽ mĩ ea shinaĩ ikai? Natiã haska ẽ mia yuiai ẽ mia ashũtirumẽkaĩ, ẽ mia ashũtirumamẽkaĩ, mĩ uĩshanaii— aka

Israelĩ enabu 70 shanẽ ibu betsabu hawẽ hãtxashunikabu Deusũ hatu wayunikiaki, na hãtxarã

²⁴ hanu Deuski nukuti tari hiwe anua Moisés tashnikirã haska Senhor Deusũ yuishu hawenabu itxawashũ dasibi hatu yuitã hanushũ haska Senhor Deusũ yunushu keska wakĩ Israelĩ enabu 70 shanẽ ibubu itxawabaĩ hanu Deuski nukuti tari hiwe dapi hatu kekũbauna

²⁵ hanua nai kuĩwẽ Senhor Deus bututã Moisésbe hãtxai menetã hanushũ ha Yushĩ Moisés inaĩma haya pashkatã ha 70 shanẽ ibubuki inãbaunaya ha Yushĩ hatu merã hikikĩ hatu atxia Deusũ hãtxa yuishunikabu keska hatu hãtxamatã ana haska hatu hãtxamama inikiaki.

²⁶ Ha 70 shanẽ ibubu hatu katua shanẽ ibu dabe Eldade inũ Medade hanu Deuski nukuti tari hiwe anu buama hatũ mae anua niti itã bashikubiabũ ha Yushinẽ hatu atxiria haburi Deusũ hãtxa yuishunika keska hãtxai taeaibũ

²⁷ haska hãtxaibu berunã nĩkatã kushikaĩ Moisés yuikĩ: —Ũ unu nũ ika anuarã, Eldade inũ Medade Deusũ hãtxa yuishunikabu keska hãtxakanikiki— akaya

²⁸ hanushũ Numnẽ bake Josué berunãbiatũ Moisés merabewakĩ taewabiranimatũ Moisés yuikĩ: —Ẽ shanẽ ibu Moisĩ, hatu nemawe, hau ana haska hãtxayamanũbunã— aka

²⁹ hakia Moisĩ Josué kemakĩ yuikĩ: —Haskakĩ mĩ ea yaushimai, hatu nemakatsis ikinã? Ẽ shinanã, hawenabu dasibi hawẽ hãtxa yuishunika wakĩ Senhor Deusũ hawẽ Yushĩ hau hatu atximakĩ keyunũwẽ— atã

³⁰ hanua hatũ mae anu Israelĩ enabu shanẽ ibubube Moisés txĩtuaĩbũ

Kuma itxapahaira Senhor Deusũ hatu yununikiaki, na hãtxarã

³¹ Senhor Deusũ ianẽwã beshũ akĩ niwe yunua kuma shuku tibi mirima niwe kushipatũ shũku abirã abirãkĩ hatũ tari hiwe pũtebaunabu anu inũ hatũ mae hirabi kesukauna anu butubauni hatishũra shaba bestitxai huni katirutishũ kuma mirima butukĩ mai atxikĩ keyubainabu hanus matsamanabaini buspu tsaua hawẽ keyatapa 1 metrotia kesuabũ

³² ha shabatiã inũ meshu hirabi inũ shaba ha katxu betsatiãri yurabũ kuma atxitãtãkĩ betsabũ itxapa bikĩ inũ hatiritũ eskarabes bikĩ 10 kuki ewapa matawakĩ ha kuma detetã pewakĩ txapatã tsusĩwãkĩ hatũ hemaĩtĩ anu dasibibũ barĩwãkĩ mãtxĩbaũshũ

³³ ha dukũtũ nami pirinũ, iwanã, kuma bawashũ pikĩ Israelĩ enabũ nasa nasa akaibũ haska waibũ Senhor Deus hatuki sinatahairakĩ kupikĩ yura mirima isĩ txakabuwẽ hatu hawaira tenãkĩ keyunikiaki.

³⁴ Pĩtsiwẽ taea besti kemukĩ shinãkubirani mawakãshuwẽ taeshũ ha mae kenakĩ: “Quibrote-Hataaváki”, anibukiaki, nukũ hãtxawẽ yuiarã, “Pĩtsiwẽ taea besti mawabu hanu maiwatiki”, akinã.

³⁵ Quibrote-Hataavá anua Israelĩ enabu ana maei bui Hazerote anu hikia hanu bashikua maniabũ