Mateus 3 - Kaxinawá Bíblia (BR)

Hanu tsua hiweamanu Naximanika João hiwenikiaki, na hãtxarã

^1-5 Bebũkirihaira hawẽ hãtxa yuishunika Isaías Deusũ yuimakĩ: “Hanu tsua hiweabumanushũ beaibu hui kuxipawẽ txanikĩ hatu yuikĩ: ‘Nukũ Shanẽ Ibu nai anua matuki bayui ma kemaikiki. Matũ huĩtinĩ xinã pewarikãwẽ, bai kayatapia keska wakinã’ ”, ani keska wakĩ Naximanika João hunishũ Judéia anu tsua hanu hiweabumanu camelo dani tima tari sawea inũ bitxi nanesheketi sawea inũ hawẽ piti pe beshmas txãpu inũ ni meranua buna bata aki hiweshũ harishũ hatu yusĩkĩ taewai bana nĩkatã Jerusalém anua inũ Judéia anua inũ Jordão hene kesha hiweabũ nĩkanũ ika bebirã bebiranaibu hatu yusĩkĩ: “Deus nenu shanẽ ibui ma kemaikiki. Deuskiri xinãma mã txakabumis henerikãwẽ”, hatu wakubainai

⁶ habũ ikũwãkĩ hatũ txakabu Joãoki txanikĩ hatũ txakabu henekatsi ikĩ xinã betsa waibu hawẽ unãti wakĩ Jordão hene anu Joãonẽ hatu naximapakeaya

^7-8 hanua Joãonẽ hau ea naximanũ ika saduceubu inũ fariseubu bebirã bebiranaibu hatu yuikĩ: “Maturã mã paranãbuki, dunũ hatu pimis keskaburã. Mã haska keska matuki Deus sinatakĩ matu kupihairashanaiwẽ taea matũ xinã betsa wakãwẽ. Haskatã matũ txakabu mã ma beshtekea shabakabi mã ea uĩmaya ẽ matu naximashanaii.

⁹ Hamẽ matũmebi ibubis kẽkĩ mã xinãmis: ‘Nukũ shenipabu Abraão Deusbe haibunameniwẽ taea nũ hawẽ bababu nuku kupiama ishanikiki’, ikĩ, ana xinãyamakãwẽ. Hakia Abraãonẽ bababu dasibi matu yamawakĩ keyutã na mixki manibauna Deusũ damiwakĩ Abraãonẽ bababu benawashũtiruki.

¹⁰ Haskakẽ matu yuinũ nĩkakãwẽ. Hi tibi bimi pepa hayama deratã mã kuamis keska wakĩ bestibu Deusũ matu kupishanikiki. Hamẽ tsuabura Abraãonẽ baba kayabibũ hawẽ yusĩa hau txibãkubainũbũwẽ. Hakia mã haska wamakẽ matu kupinũ, iwanã, duewẽ matu dera keska watã txi anu matu urẽnũ, ishũ manaikiki”,

¹¹ iwanã, “Eãnã, hawẽ unãmati wakĩ henewẽ besti ẽ matu naximakubainaii. Hakia huni betsarã, kuxipahaira ea binũa txipu hushanikiki. Hawẽ tsumapã hawẽ daya ashũmis keska wakĩ ẽ hawẽ hawaumahairatũ eã merabewakĩ ẽ duawatirumaki, hawẽ bitxi tae meshpũ tsitsaukaĩ ẽ pekashũtirumarã. Hakia matu pepawakĩ Deusũ Yushĩ Pepa matu inãtã bika matu tenemakĩ matũ txakabu yamawashanikiki, txiwẽ hawara txakabu abuama kua keska wakinã.

¹² Ha inũ, shekiwã bimi ta keyushũ pepa arutã hawẽ shepa kuamisbu keska wakĩ dasibi hawenabuma danãkĩ hawa txi nukaisma anu urẽshũ kuanũ, iwanã, manakubainikiki”, akĩ Naximanika Joãonẽ hatu yuikubainikiaki.

Joãonẽ Jesus naximanikiaki, na hãtxarã

¹³ Hanua Galiléia anua Jesus ewatã Joãonẽ hau ea naximanũ ika Jordão hene kesha anu kashũ João yuka

¹⁴ nemanũ, iwanã, yuikĩ: —Miã ea binushũ mĩ ea naximatibia haskai eanu mĩ hushumẽ?— aka

¹⁵ Jesusũ yuikĩ: —Ea haska wama ea naximawe, Deusũ nuku yununiwẽ taeshunã— aka —Haskakenã, peki— ikaĩ, Joãonẽ Jesus naximakĩ

¹⁶ meneaya neshekei mapekekainaya nai bashnei Deusũ Yushĩ Pepa deiwã itsakirã hamamaki butuai Jesusũ uĩayã

¹⁷ yurabu nĩkamai nai anua hui tashnikĩ yuikĩ: “Narã, ẽ bakeki. Ẽ abuhairaii, ẽ Katuarã”, anikiaki.