Mateus 26 - Kaxinawá Bíblia (BR)

Jesus atxishanũ ika yubakanibukiaki, na hãtxarã

¹ Hanushũ nũ hawẽ tsumabu haska dasibi Jesusũ nuku yusĩ menetã nuku ana betsa yuikĩ:

² —Ha Páscoatianã, Egito anushũ Deusũ yunua debuwanika nai tsumã nawã bakebu tenãkĩ nukũ shenipabu dũkebaini xinãmatitianã, usha dabe ma kemai misi shashama nũ pimis mã unaiĩ. Haska inũ, ẽ matũ Hutxi Kayabi Iuwa ea tenãnũ ishũ cruzki ea mastakatsi ikĩ samama ea atxitã ea hatu inãkatsis ikanikiki— nuku waya

³ habiatiãri Deusbe nukunabu hãtxashunika shanẽ ibubu inũ judeu mae shanẽ ibu betsabu bui Deusbe nukunabu hãtxashunika shanẽ ibuhaira Caifásĩ hiwe anu dasitã itxa

⁴ haska washũ Jesus beparãtã tenãtima yubakaibu

⁵ betsã hatu nemakĩ yuikĩ: —Páscoa nawaibutiã meyamayushãkãwẽ, nukunabu nukuki sinatai berukubaũtirubukirã, betsatiã nũ atirumẽkainã— hatu wa haska xinaĩbũ

Aĩbũ Jesuski sheni maukanikiaki, na hãtxarã

⁶ Jerusalém txaima Betânia anushũ Simão yuraki txamini Jesusũ kaya waimatũ hawẽ hiwetãshũ

⁷ Jesus pimaya aĩbu betsã nẽkati bixtu hushupaki sheni inĩ has karuhaira beshũ tesketã Jesusũ bushkaki mauka haki hababainaya

⁸ nũ hawẽ tsumabu hatiritũ inĩ mayai shetekĩ uĩ haki sinatai yuinamei: —Haska wakĩ ha sheni karuhaira hamẽ txakawakĩ maukashumẽ?

⁹ Hatu inãshũ hawẽ pei mirima bitã nuitapaibu merabewatibĩ!— iki aĩbuki nũ ha ikaya

¹⁰ nũ haskaibu Jesusũ nĩkatã nuku yuikĩ: —Na aĩbũ ea duawaya haskai mã hari hãtxai?

¹¹ Nuitapaibu matube hiweabu mã hatu duawapaketiruki. Hakia earã, hawẽtxaĩs mã ea duawapaketirumaki.

¹² Haskakẽ eki sheni ininipa maukakĩ na aĩbũ ẽ mawariama bebũkiri ẽ yura ea pewashuki, hau hawama ea maiwaxarashanũbunã— itã

¹³ —Shabakabi ikũ ẽ matu yuiaii. Mai hirabi anushũ kakape ekiri txanibaũkĩ na aĩbũ ea ashu xinãkĩ yuiriabaũshãkanikiki, tsua hau hakimayamashanũbunã— nuku waya

Judasĩ Jesus hatu atximashanũ ika hatube yubakanikiaki, na hãtxarã

¹⁴ hanua Jesusũ 12 tsumabu betsa pashkakaĩ Judas Iscariotes Deusbe nukunabu hãtxashunika shanẽ ibubube yubakanũ ika kashũ

¹⁵ hatu yukakĩ: —Jesus ẽ matu atximayarã, hati pei mã ea inãtirumẽ?— hatu wa habu benimakaũ habũ 30 pei heshe prata karuhaira inãbu

¹⁶ hatube haskatani hui nukuki ana nukutã: “Hatiã hanishũ Jesus ẽ hatu atximatirumẽ?” ikĩ xinãkubainaya

Bari kaya Jesusũ hawẽ tsumabubetã hawẽ xinãmati hatu pimanikiaki, na hãtxarã

¹⁷ ha bari Páscoa besi taemisbutiã habianuri misi shashama pikubaĩmisbutiã ikaya, hanushũ nũ hawẽ tsuma betsabũ Jesus yukakĩ: —Hani kashũ nawakĩ bari kaya piti bawakĩ mia pewashũtãpa?— akabu

¹⁸ Jesusũ hawẽ tsuma dabe nitxĩkĩ yuikĩ: —Bui Jerusalém anu hikitã ha huni betsa nũ unaĩ anu hawẽ hiwe anu kashũ yuikĩ eska watãkãwẽ: “Nukũ yusĩnã nuku yuishurã, mia yuipa? Ma ẽ mawa kemashũ mĩ hiwe anushũ Páscoatiã nawakĩ xinãmati piti ẽ tsumabubetã pinũ ika huikiaki. Hanishũ bawakĩ pewashũpa?” akĩ ea yuishũtãkãwẽ— hatu wa

¹⁹ hawẽ tsumabu kaĩbaini Jerusalém mae ewapa anu hikitã haska Jesusũ hatu yuishu hiwe ibu yukatã hanushũ nawakĩ Páscoa piti bawa menetã txĩtũbaina

²⁰ ibai ma bari kai mexuaya Jesus nũ hawẽ 12 tsumabube kai hikitã tapu anushũ nũ hatubetã piaibũ

²¹ Jesusũ nuku yuikĩ: —Ikũ ẽ matu yuiaii. Haratutũra mã ea hatu atximai kaii— nuku wa

²² nuku haska wai nĩkatã nũ hawẽ tsumabu huĩti nixmai keyutã yukakĩ: —Shanẽ Ibuũ, habia ẽ eamẽ?— nũ iaketãyã

²³ Jesusũ nuku yuikĩ: —Na habias kẽtxaki ebetã misi pukushũ mã piaitunã, hatũ ea hatu atximai kaikiki.

²⁴ Haska ekiri kenenibu txibaĩ matũ Hutxi Kayabi Iuwa ẽ haskai mawai kaii. Hakia ha hunĩ ea hatu atximai kairã, pemahairaki! Haskakẽ ha huni kaĩyãma inirã, pepakeanaii— nuku waya

²⁵ Jesus hatu atximai kabiakatsi Judasĩ beparãkĩ yukakĩ: —Yusĩnaã, habia ẽ eamẽkaĩtsa?— aka Jesusũ yuikĩ: —Hawaikika! Habiari mĩ yuiaii— akaya

²⁶ nũ piaibũ Jesusũ misi betsa tsumashũ Deus kuxipa yukatã tũketã inãkĩ nuku yuikĩ: —Na misi betsarã, ẽ nami keskaki. Bibaũkĩ pikãwẽ— nuku wa ture betsa bitã metesh atãkĩ nũ pibaunaibũ

^27-28 hanushũ kẽtxa vinho mata tsumashũ Deus kẽwãriatã nuku inãkĩ yuikĩ: —Yura itxapa merabewakĩ hatũ txakabu Deus hatu buamai ẽ mawaya ẽ himi ea ikũwaĩbu hatu dasibi habashũshanikiki. Na vinho ẽ himi keskaki, hawẽ ẽ yubakai bena xinãmatirã, akãwẽ— nuku wa bitã tusa nũ nushabaunaibũ

²⁹ —Ikũ ẽ matu yuiaii. Ẽ Epa Deusbe shanẽ ibui ẽ ana huriama na uva vinho ẽ ana matubetã ayuama ishanaii. Abaũkãwẽ— nuku waya

Pedro haki dakei kaikiri Jesusũ yuinikiaki, na hãtxarã

³⁰ habianuari Salmos Davĩ keneni betsa betsapa nukũ huiwẽ nawai menetã hanua ma Judasĩ nuku pashkabaĩkẽ Oliveiras Mati anu nuku iyushũ

³¹ Jesusũ nuku ana yuikĩ: —Hawẽ hãtxa yuishunika ekiri Deusũ yuikĩ: “Txashuwã hatũ mekenika ẽ tenãyã hawẽ txashuwã datei pashai keyushãkanikiki”, aka nĩkatã kenenikẽ na habia mexutiã habiaskariai matu dasibibũ ea xinãma mã ea henebaini pashariaii, txashuwã keskairã.

³² Hakia ea tenãbiabu ana bestẽtã hanu matuki nukunũ ika bebũkiri Galiléia anu ẽ matu kashũshanaii— nuku waya

³³ Pedrõ yuikĩ: —Miwẽ datei dasibi pashai keyuaibũ eãnã, ẽ mia hawa henekĩ putamaki— ikaya

³⁴ Jesusũ Pedro yuikĩ: —Haskamaki. Txanima ẽ mia yuiaii. Na habia mexu merã takara keuriamakẽ: “Ẽ ha unãmaki”, iki dabe inũ bestiki eki dakekĩ mĩ yui kaii— aka

³⁵ nĩkamas hãtxa kuxipawẽ Pedrõ ana yuikĩ: —Haskamaki. Ẽ mibe mawabiai kai haskai ẽ miki dakeamaki— ikaya nũ hawẽ tsuma dasibibũ xinãma habiaskasri nũ yuirianibuki.

Getsêmani anu ka Jesus Deusbe hãtxanikiaki, na hãtxarã

³⁶ Hanua Jesus nũ hawẽ tsumabube kai mibã shuku betsa hawẽ kena Getsêmani mixkiwẽ kenenibu anu hikitã nuku yuikĩ: —Nenu habianu tsauyukãwẽ, ẽ Deusbe hãtxai kairã— ikaĩkĩ

³⁷ Pedro inũ Zebedeũ bake dabe Tiago inũ João besti iyui kai punu nuka hawẽtxaĩs huĩti meteshekei niti itã

³⁸ hatu yuikĩ: —Ẽ yurawẽ mawakĩ ẽ matu shunũbaĩshanai xinaĩ ẽ punu nukahairaki. Na habianushũ ushama ea manakãwẽ— hatu wabaini

³⁹ hanua kai txaima ka beuwa maiki beti ishũ Deus yukakĩ: —Ẽ Epa Deusuũ, hamapai dasibi mĩ atiru ẽ unaiĩ. Hau ea tenãyamanũbũ mĩ hatu nematirubia haska ẽ xinaĩwẽ akama mĩ xinã bestiwẽ ea ashãwẽ— atã

⁴⁰ hanua hawẽ tsuma dabe inũ besti anu txĩtũkirã ushabuki nukutã hatu datekĩ Pedro yuikĩ: —Hawai mã ushamẽ? Ushama hora bestitxai beru mestẽwãtã mã ea manatirumamẽ?

⁴¹ Txanima matũ xinã pebia matũ yura babuwẽ taea mã punu nukaya matuki txakabu hikia mã kaneyamanũbũ Deusũ hau matu merabewanũ ushama habe hãtxakãwẽ— hatu awani

⁴² ana Deusbe hãtxai kashũ yuikĩ: —Ẽ Epa Deusuũ, ẽ yumãyamanũ ea unãti wakĩ mĩ henekatsi ikamarã, peki. Mĩ xinãnẽ besti ea ashãwẽ— atã

⁴³ ana hua ma usha paẽ hatu atxia ushabuki nuku wani

⁴⁴ hawa hatu yuiama ana txĩtũkaĩ Deusbe hãtxai kashũ habias hãtxa yuitã

⁴⁵ hanua hawẽ tsumabu anu ana hushũ hatu yuikĩ: —Haskaira mã usha nĩkama usha bestia mã huĩrukũsi ikanai? Uĩkãwẽ. Ẽ Deusũ bake matũ Hutxi Kayabi Iuwa huni txakabubũ ea atxi bei ma kemakanikiki.

⁴⁶ Benirikãwẽ, nũ kanunã. Ea hatu atximai hatube ma huikiki— hatu wai

Jesus unãmamabaĩ atxinibukiaki, na hãtxarã

⁴⁷ Jesus hãtxa meneriamakẽ Deusbe nukunabu hãtxashunika shanẽ ibubu inũ mae shanẽ ibubu betsabũ hatu yunua huni itxapa nupe txaipayabu inũ kuxati hiyabube Jesusũ 12 tsuma betsa Judas Iscariotẽ hatu iwekĩ

⁴⁸ Judasĩ bebũkiri hatu yubakĩ yuikĩ: —Ha ẽ tãtsu akairã, haki. Atxishũ iyukãwẽ— hatu abirãshuwẽ taeshũ

⁴⁹ Judas Iscariotes Jesuski nukutuxikĩ yuikĩ: —Yusĩnaã, ẽ miki ma nukuyuaii— iwanã, tãtsu akaya

⁵⁰ Jesusũ yuikĩ: —Peki, ẽ haibuũ. Ea haska wanũ ika mĩ hatube yubakakiranairã, ea hatu amariwe— akaya —Hakiaki. Akãwẽ— ibaĩ atxiaibũ

⁵¹ Jesusũ tsuma betsã hatu mepãmanũ ika naxui ikaĩ hawẽ nupe txaipa sitã Deusbe nukunabu hãtxashunika shanẽ ibuhairatũ tsuma mapeshpaikĩ maebaĩ pashteaya

⁵² Jesusũ hawẽ tsuma nemakĩ: —Ana hatu meama mĩ nupe ana hawẽri usũwẽ. Tsuabura nupe txaipawẽ detenameaibu habiawẽri mawashãkanikiki.

⁵³ Na ea eska waibu ẽ Epã hau ea merabewanũ ẽ yukaya samama hawẽ nai tsumabu 12.000 ea merabewamai hawaira niri ibirã ea ashũtirubu mĩ unãmamẽ?

⁵⁴ Hakia Deusũ haska waya hawẽ hãtxa yuishunikabũ ekiri keneama iniburã, ea haska wabuma ikeãkanaii— iwanã,

⁵⁵ mapuabu uĩkĩ hatu yuikĩ: —Uatiã shaba tibi Templo hemaĩtĩ anushũ ẽ matu yusĩkubainai mã ea shabakabi atxiama ikubaĩxinabuki. Haskai natiã mexu merã yumetsu atximisbu xinaĩ hawẽ deteti nupe txaipaya inũ hawẽ kuxati hiya mã bekãshumẽ?

⁵⁶ Eskawẽ taea mã ikaii. Deusũ hãtxa bebũkiri ekiri kenenibu haska yuiniwẽ taeshũ mã ea atxiaii— hatu waya hanua dasibi nũ hawẽ tsumabu datekĩ Jesus besti henebaini pashai nũ hunei keyubainaibũ

Shanẽ ibubu Sinédrio anu Jesus iyunibukiaki, na hãtxarã

⁵⁷ hanua atxitã iyukĩ Deusbe nukunabu hãtxashunika shanẽ ibuhaira Caifásĩ hiwe anu hanu mae yununika shanẽ ibu betsabu inũ, Deusũ hãtxa kenenibu yusĩnanãmisbu habu dasibibu habu dukũ bua itxa maniabu anu Jesus iyukĩ hanu bitxiaibũ

⁵⁸ hanua Pedro datei benãta kakĩ txibãkubaina Caifásĩ hiwe hemaĩtĩ mixki kenebaunibu anu hikiriatã haska wakanimẽkaĩ? uĩnũ ika Templo mekenikabube tsaushũ uĩayã

⁵⁹ hanushũ Deusbe nukunabu hãtxashunika shanẽ ibubu inũ Sinédriobu dasibi itxashũ Jesus hau tenãnũbũ hakiri txakabuhaira yuiaibuwẽ txani hãtxa ikũ keska watã hawẽ unãti watã tenãkatsi benai maniabũ

⁶⁰ huni betsa betsapabũ hakiri txani txitebiakĩ hakia huni dabetũ habias txani yuiabumakẽ atimas huni daberi haki txani txakakĩ

⁶¹ yuikĩ: —Nukũ nĩkakinã, Jesusũ eska yuiai nũ nĩkaxinaki. Matu yuinũ: “Na mixki Templo hunibũ anirã, tekekĩ purekĩ keyutã usha dabe inũ besti kaya hunibũ akamakẽ ana ẽ benishanaii”, ikai nũ nĩkaxinaki— hatu wabu

⁶² haska waibu nĩkabaikĩ Deusbe nukunabu hãtxashunika shanẽ ibuhaira Caifás namakis dasiabube tsauwa benitã nishũ Jesus yukakĩ: —Na hunibũ mikiri txakabu yuiaiburã, miarã, haskai mĩ hatube kemanameamamẽ?— aka

⁶³ Jesus pes hawa yuiama nikẽ Deusbe nukunabu hãtxashunika shanẽ ibuhairatũ ana yuikĩ: —Deus hiweatũ mia nĩkaya hau mĩ txanitxakayamanũ ẽ mia yunuai, ikũ nuku yuiwe. Habia mĩ miamẽ ikairã, mĩ Deusũ bake nukũ mekenã Messias Cristorã?— aka

⁶⁴ Jesusũ yuikĩ: —Habiari mĩ yuiaii. Hamẽ eã ẽ mia yuiairã, ẽ Epa Deus kuxipahairatũ yusiuri ẽ tsauwa matũ Hutxi Kayabi Iuwa nai kuĩwẽ ẽ huai mã ea uĩshanaii— akaya

⁶⁵ Deusbe nukunabu hãtxashunika shanẽ ibuhaira haki sinatahairakĩ hawẽ tima tari uxnitã yuikĩ: —Deus itxaikiki. Ana hatira hãtxai ẽ nĩkakatsi ikamaki.

⁶⁶ Na haska hãtxayarã, haskara hakiri mã xinaĩ?— hatu wa habũ yuikĩ: —Deus ma itxawẽ taeshũ hau tenãnũbũwẽ— iake iaketã

⁶⁷ itxakawakĩ taewakĩ betsabũ besuki kemu mitxukĩ kuxaibũ betsabũri tãpais akĩ

⁶⁸ kashe wakĩ yuikĩ: —Mĩ Deusũ Messias Cristorã, tsuã mia kuxaimẽkaĩ? unãtã nuku yuiwe— akaibũ

Pedro Jesuski dakei kaikiri yuibirana haskanikiaki, na hãtxarã

⁶⁹ hanua hemaĩtĩ anu Pedro tsauwa shanẽ ibu dayashũmis aĩbu betsã betxitã yuikĩ: —Miarã, Jesus Galiléia anuabe mĩ nimiski. Ẽ mia unaiĩ— aka

⁷⁰ Pedrõ parãkĩ habube itxabu bebũshũ yuikĩ: —Haskamaki. Ha mĩ hari yuiairã, ẽ ha unãmaki— abaini

⁷¹ hanu hemaĩtĩ kenekawana hikiti shui anu ka nikẽ aĩbu betsãri hanu nia uĩkĩ hatu yuikĩ: —Ha hunirã, Jesus Nazaré anuabe nimiski— hatu waya

⁷² hanushũ Pedrõ ana hatu yuikĩ: —Haskamaki. Deusũ ea kupitiruwẽ taea ẽ txani txakamaki. Ha hunirã, ẽ ha unãmaki— hatu wa

⁷³ hanua habianu manishũ betsabũri Pedro uĩriakĩ haki kemashũ yuikĩ: —Ikũki. Galiléia anuabu mĩ hawẽ hãtxaki. Mĩ Jesusũ tsuma betsaki. Hari mã hãtxamisbĩ nũ mia nĩkai— akabu

⁷⁴ hanushũ Pedrõ hatu ana parãkĩ yuikĩ: —Ha huni mã yuiairã, ẽ ha unãmahairaki. Ẽ txani txakayarã, hau Deusũ ea kupinũwẽ— hatu waya hakimamari takara keuai

⁷⁵ nĩkatã haska Jesusũ Pedro yuikĩ: “Dabe inũ bestiki: ‘Ẽ ha unãmaki’, akĩ takara keuriama mĩ yuishanaii”, abirana Pedrõ xinaĩ tashnikaĩ kashatxakayamanikiaki.