Mateus 24 - Kaxinawá Bíblia (BR)

Jesus ana huriama haska tashninũbariai bebũkiri Jesusũ hatu unãmanikiaki, na hãtxarã

¹ hanua Jesus Templo hemaĩtĩ anua kaĩkainaya nũ hawẽ tsumabu haki nukubaĩkĩ yuikĩ: “Na Deus kẽwãti Templorã, habi hawẽrua benibĩ!” nũ ikaya

² nuku yuikĩ: —Ikũki. Na mixki hiwe ewapa hawẽrua wanibu mã uĩaĩnã, hawẽruabia habianu mixki betsa ana matsama dasibi ha mixki hiwe tekekĩ purekĩ keyushãkanikiki— nuku wabaini

³ Oliveiras Mati anu mapeketã Jesus tari ka tsaukẽ nũ hawẽ tsumabũ hune yukakĩ: —Ha mixki hiwe tekekĩ purekĩ keyushanaibu mĩ nuku yuishurã, mia yukapa? Mĩ ma mai hirabi hawẽ henei keyuaitiã mĩ ana huashanai kemai taeai haskai nũ unãtirumẽkaĩ? Nuku yuiwe— nũ wa

^4-8 nuku yuikĩ: —Ẽ ka ẽ ana huriamakẽ eskai nuitapai taeshanaibu Deusũ yununi eskashãkanikiki. Shabakabi matu yuinũ nĩkakãwẽ. Ẽ kani ma ẽ hanu hua kemaya huni betsa betsapa beshũ yuikĩ: “Ẽ Deusũ Katua Messias Cristoki”, iwanã, yura itxapabu hatu parãshãkanikiki. Hau tsuabura haskariakirã matu parãyamashanũbũ uĩrashãkãwẽ. Ha inũ, yurabu nuitapai taeaitianã, nawabu nawa betsabube detenamei inũ tsakanameakeakeaibu mai patxa sakuakeakeaya bunihairai nuitapaibũ isĩ betsa betsapa teneakeakeshãkanikiki. Hakia tsakanameakeakeaibukiri bana nĩkai datei meseyamashãkãwẽ, na haskairã, isĩ betsa beai mekĩ mã uĩshanai keska bebũkiri shabakabi ẽ matu banabimairã.

⁹ Hanushũ mã ea ikũwaĩbuwẽ taeshũ matu itxakawakĩ matu bestibu tibi tenãkĩ mai hirabi anushũ ewẽ taea matuki sinatakĩ matu danãshãkanikiki.

¹⁰ Matu haska waibutiã itxapabũ ea txibaĩ beshteketã hanushũ ikũwaĩbu betsabu danãkĩ hatu atximakeakeshãkanikiki.

¹¹ Hanu haskaibutiã huni itxapabu beshũ yuikĩ: “Deusũ hãtxa matu yusĩnũ ea nĩkakãwẽ”, ikĩ txani txakakĩ yura itxapabu hatu parãshãkanikiki.

¹² Ha inũ, ikũwaĩbu itxapabu nawabũ hatu itxakawatxakayamaibũ ikũwaĩ betsabu ana abunamei nuiama ishãkanikiki.

¹³ Matu haska wabiaibũ tsuãra ea txibãkĩ heneisma hatu mekekĩ ẽ hatu pashawashanaii.

¹⁴ Ha inũ, betsarã, nawa dasibibũ hau ekiri unãnũbũ ẽ ana huriamakẽ yurabu maniakeakeabu dasibibu tsuabũra ẽ kakapekiri habũ hatu yusĩkubaũshãkanikiki. Nawa shukua tibibũ hau kakape ekiri nĩkanũbũ hatu yusĩkĩ menetanaibũs ẽ ana hushanaii.

¹⁵ Haska mã unãshanũ ha Deus danãtã txakabu kẽwaĩbukiri Deusũ hawẽ hãtxa yuishunika Daniel yuia nĩkatã bebũkiri keneni matu yusĩnũ nĩkakãwẽ— iwanã, ea ẽ Mateũs matu keneshunai tsuãra na hãtxa uĩkĩ tapĩkãwẽ, eska Jesusũ ana yuikubaĩkĩ: —Daniel haska wakẽ Templo hemaĩtĩ anu haska Deusũ danãmis ha dami itsa tashnia nia betxitã

¹⁶ ha Judéia anushũ ikũwaĩbu ha mati keyatapa anu hau pashashanũbũwẽ.

¹⁷ Ha inũ, betsabu na mai bawa hiwe sapa sheni manaũri maniaburã, butushũ hawẽ hamapai bikatsis ibiakĩ hau hawẽ hiwe anu hikiama hau hawaira pashariashanũbũwẽ.

¹⁸ Ha inũ, ikũwaĩ ha bai anu dayaiburã, mexu merã hawẽ dakukuti bikatsis ibiai hau ana txĩtũbiranama hau habiariari pashariashanũbũwẽ.

¹⁹ Hamẽ ha yumaĩbutianã, tuyabu inũ ha txutxu amamisburã, nuitapahairashãkanikiki.

^20-21 Haska inũ, Deusũ mai damiwani anua yumaĩbutiã haskashanai anu tsuã haska teneriama inũ ana teneama ishanai tenei dasibibu nuitapatxakayamashãkanikiki. Haskashanaiwẽ taea hau uitiã inũ huĩrukũtitiã mã pashayamashanũbũ Deus ea akĩ yukakubaĩshãkãwẽ.

²² Ha haskaibutiã Deusũ hawa nemakĩ tsua pashawatirumabia ma hawenabu hatu katuniwẽ taeshũ hatuwẽ nuikĩ hau dasibibu debui keyuyamashanũbũ yumaĩbutiã Deusũ bari ana txai wama txaima shekashanikiki.

^23-25 Habiatiãri huni betsabu hushũ hatu parãkĩ yuikĩ: “Earã, Deusũ ea yunua ẽ hawẽ hãtxa yuishunikaki. Ea nĩkairakãwẽ”, ikaibũ betsabũri yuikĩ: “Earã, Deusũ Messias Cristo matu anu ana ẽ hushuki”, ikaibu betsabũ nĩkatã hatu yuikĩ: “Uĩa. Nuku anu Cristo ma hushukiaki”, ikaibu nĩkatã ana betsabũ yuikĩ: “Uĩa. Hanu ma hushukiaki, Cristorã”, ikaibũ hanushũ habũ hamapai betsa betsapa yura betsabũ atirubuma habũ akĩ yura itxapa parãkĩ Deusũ hawena wakĩ hatu katuriani parãkatsis iriashãkanikiki. Haskaibu nĩkatã ikũwãkĩ mã kaneyamashanũbũ bebũkiri shabakabi ha parananãshanaibukiri ẽ matu besuũbi bana bimai nĩkakãwẽ

²⁶ Haskakẽ paranũ, iwanã, matu yuikĩ: “Uĩa. Unu hanu tsua hiweabumanu Cristo ma huaki”, ikaibũ buyamashãkãwẽ. Ha inũ, matu paranũ, iwanã, matu yuikĩ: “Uĩa. Cristorã, nenu dĩtu merã huneaki”, ikaibu hawa ikũwãyamashãkãwẽ.

²⁷ Hakia ẽ matũ Hutxi Kayabi Iuwa ẽ ana eskakirãshanai matu yuinũ nĩkakãwẽ. Hawaira uke bukũ kana beri iki bakamis keskatã ẽ ana huai dasibibũ ea uĩshãkanikiki.

²⁸ Hanu yura mawa daka pisi mayai shetẽ shetebirã hanu itxai nuyabaũmis keskai ishãkanikiki— iwanã,

Nukũ Hutxi Kayabi Iuwa ana huirã, eskakiranũbarikiaki, na hãtxarã

²⁹ hanushũ nuku yusĩkĩ meneriama ana nuku yuikĩ: —Yumaĩ keyuaibu binukainaya nai anua dasibi betsa betsapashanikiki. Bari ana pesheama nukai taeaya usheri ana txashama mexuaya bixi niri iki keyui dasibi nai taka taka iki txuruãyã

³⁰ nai anua haskai yurabũ uĩ mai hirabi anua datehairai kashai keyubaunaibũ ẽ matũ Hutxi Kayabi Iuwa shanẽ ibui kuxipahairai txashahaira nai anua nai kuĩ meranua ẽ huai uĩaĩbũ

³¹ Deusũ hawẽ nai tsumabu yunua hawẽ trombeta txaã akĩ hawẽ katuabu mai hirabi anu manibaunabu hatu itxawashãkanikiki.

³² Haskakẽ figueira hiwẽ mã unãtirubukiri miyuiwẽ ana matu yusĩnũ nĩkakãwẽ. Hi mebi hawẽ pei petakatã metubistã peiyai uĩkĩ ma bari kemai mã unãmis keskai

³³ hawara ẽ matu yuishu betxitã ẽ samama huai mã unãshanaii.

³⁴ Haska inũ, yurabu dasibi hiwebaunabu yamariabuma ikũ dasibi ẽ matu yuishu haskai taeshãkanikiki.

³⁵ Hakia habiaskariai nai anua inũ mai anua Deusũ damiwani habu keyushãkanikiki. Hakia ẽ hãtxawẽ bebũkiri ẽ matu yusĩaĩnã, binuama menepakeshanikiki.

³⁶ Hanua hawatiãra ẽ ana hushanai tsuã unãmaki. Deusũ nai tsumabũ unãma inũ ea Deusũ bakẽ ẽ hawa unãmariki. Hakia Epa Deus ha bestitũ unaĩkiki.

³⁷ Haska inũ, Noé hiwekẽ txakabui hiwekubainibu keskariaibũ matũ Hutxi Kayabi Iuwa ẽ ana txĩtũkirãshanaii.

³⁸ Eskanibuki. Hawẽ nunutiwẽ Noé hikiriamakẽ yurabũ pikĩ mabesh aki aĩyãkĩ hatũ bakebu beneyawakĩ Deuskiri hawa xinãma hiwekubainaibu Deusũ yunua Noẽ txibaĩ hawenabubes hawẽ nunuti menetã hikiaya

³⁹ henẽ hatu atxiaya Deusũ yunua nĩkaisbuma hatũmebi debui hasai keyunibuki. Habiaskariai matũ Hutxi Kayabi Iuwa ẽ huai yurã kaiãnẽ ea xinãkĩ manabumakẽ ẽ hatu haskari wakĩ kupishanaii.

⁴⁰ Ha inũ, na habiatiã bai anu huni dabe dayaibu betsã ea txibãmis iyukĩ betsã ea txibaĩsma Deusũ nai tsumã henebaĩshanikiki.

⁴¹ Ha inũ, aĩbu dabetã deneaibu betsã ea txibãmis iyukĩ betsã ea txibaĩsma heneriabaĩshanikiki. Haska wakĩ Deusũ nai tsumabũ bestibu hatu katushãkanikiki.

⁴² Haskakẽ hatiãra ẽ ana hushanai mã unãmabia hawa txikixama ea manakakĩ heneyamashãkãwẽ.

⁴³ Ha inũ, ikũ hatiara yumetsu huai bebũkiri unãkĩ hiwe ibũ beshtekatsi manatiruki, hau hikiyamanunã.

⁴⁴ Haska keskariai hatiãra ẽ matũ Hutxi Kayabi Iuwa ẽ ana hushanai tsuã unãmakẽ matunã, matũ hiwea pewakĩ keyutã ea manakubaĩshãkãwẽ— iwanã,

Hawẽ hãtxa habũ nĩkashanaibu inũ nĩkama ishanaibukiri Jesusũ hatu yusĩnikiaki, na hãtxarã

⁴⁵ hanushũ nuku xinãmakĩ nũ hawẽ tsumabu nuku ana yusĩkĩ: —Shanẽ ibu txai kakĩ hawẽ tsuma unãnepa yunubaĩmiskiri matu yuinũ nĩkakãwẽ. Hawẽ tsuma betsabu pimakĩ hau hawẽ hiwe mekeshũkubainũ hatũ shanẽ ibũ hawẽ tsuma unãnepa yunubaĩmiski.

⁴⁶ Hanua shanẽ ibu ana txĩtũkirã haska yunubainima ashũkubainaya ha shanẽ ibu haki nukutuxitã benimahairashanikiki.

⁴⁷ Txanima ha shanẽ ibũ hawẽ tsuma dasibi hawẽ hamapai mekemashanikiki, hawẽ hiwe inũ, hawẽ bai betsa betsapa inũ, hawẽ inabu inũ, hawẽ tsumabu betsarã.

⁴⁸ Hakia hawẽ tsuma xinã pema ha shanẽ ibũ yunubainima xinãtxakakĩ yuikĩ: “Ẽ shanẽ ibu yane huamaki. Uatiã hui kaimẽkaĩ”, iki

⁴⁹ dayanika betsabu huni inũ aĩbu itxakawai inũ nawatxakayamai pãekĩ

⁵⁰ hatiã hawẽ shanẽ ibu huai xinãkĩ manama shanẽ ibu hui hikituxitã

⁵¹ manaka txakabube kupihairashanikiki, beparamemisbubetã hau bika tenehairai kashai sheta yẽsh yẽsh anunã— iwanã,