Mateus 22 - Kaxinawá Bíblia (BR)

Shanẽ ibũ hawẽ bake aĩyãwãkĩ hatu pimatirukiri miyuiwẽ Jesusũ hatu yusĩnikiaki, na hãtxarã

¹ hanushũ Jesusũ miyui betsawẽ ana hatu yusĩkĩ:

² —Haskai Deus shanẽ ibumiskiri ana matu yusĩnũ nĩkakãwẽ. Shanẽ ibuhairatũ hawẽ huni bake aĩyãwãkatsi hawenabu shanẽ ibu betsa betsapa hau habe nawai besi benũbũ, iwanã,

³ hawẽ tsumabũ hau hatu itanũbũ hatu yunua bushũ hatu yuibiatanabu beabumakẽ

⁴ ana hawẽ tsuma betsabu yunukĩ: “Ẽ hatu ikatsis ikairã, eska ea yuishũtãkãwẽ: ‘Nukũ tsumapã ina awa inũ hawẽ yuinaka ina tibi shuarãwã deteshũ ma matu bawakĩ shui pewashunabuki. Haskakẽ hawẽ bakebe nawai bekãwẽ’, ea hatu washũtãkãwẽ”, hatu wa bui hatuki txanikubaũbiabu

⁵ hawa bekatsi ikama betsa hawẽ bai anu katanũ betsa hawẽ mabu hiwe anu dayai kakẽ

⁶ hanushũ hatiritũ shanẽ ibũ tsumabu atxishũ itxakawakĩ betsabu hatu tenaĩbũ

⁷ hanua shanẽ ibu sinatahairakĩ hau hawẽ soldadobũ ha sinatapabu tenãtã hatũ mae tibi hau kuabaũtanũbũ hatu yunutã

⁸ hanushũ hawẽ tsuma betsabu yuikĩ: “Hanu nawati ma dasibi pewabuki. Hakia ẽ hatu kenaxina txakabui beabumakẽ ẽ ana hatu ikatsi ikamaki.

⁹ Haskakẽ ha bai putxinĩ hiwekubainabu anu bui hatuki nukushũ hau nawai benũbũ hatu yuiriatãkãwẽ”, hatu wa

¹⁰ bui bai tanabaini hatuki nukuaibu tibi hatu yuikubaĩkĩ txakabubu inũ pepabu hatu kenatã hatube itxai hiwe teke shaka betsa anu hunĩ kaiã teshke ikabũ

¹¹ hanua hatũ shanẽ ibuhaira hushũ hikikaĩ nawaibu uĩkĩ huni betsa haya nawati tari danãkĩ saweama betxitã

¹² yuikĩ: “Baa, ẽ tari haya nawati haskakĩ mĩ saweama hikiamẽ?” aka dakei hawa hãtxamakẽ

¹³ hanushũ shanẽ ibũ ha habũ hatu piti inaĩbu hatu yuikĩ: “Na huni txakabu huneshkĩ meneshtã bukĩ hanu mexuhaira merã urẽtãkãwẽ, hau hari hiwea bika tenei kashai sheta yẽsh yẽsh ashanunã”, hatu waniki.

¹⁴ Deus shanẽ ibuaitianã, habiaskari washanikiki. Itxapabu Deusũ hatu kenabiapakeaya itxapamatũ nĩkatã ikũwaĩbu ha hawenawakĩ hatu katumiski— hatu waya

Nawa shanẽ ibu pei inãtikiri Jesusũ hatu yununikiaki, na hãtxarã

¹⁵ hanua fariseubu Jesusũ hatu haska yuia nĩkatã bua: “Hawawẽ taeshũ haska washũ Jesus parãtã Romano shanẽ ibu anushũ nũ txitetirumẽkaĩ”, ika yubakatã

¹⁶ hanushũ hatuki txiti ika betsabu inũ shanẽ ibu Herodeski txiti ika betsaburi hau Jesus unãti watanũbũ hatu yunuabu Jesus anu bushũ yuikĩ: —Yusĩnaã, huni betsabu miki sinatabiaibũ hawa hatuki dakekĩ habu daewama ikũ hãtxa besti yusĩkĩ haska wakĩ Deus txibãtirubu besti mĩ shabakabi hatu yusĩkubaĩmis nũ unaiĩ.

¹⁷ Haskawẽ taeshunã, haskara mĩ xinaĩmẽkaĩ mia yukapa? Ha Romano shanẽ ibu Césarn nuku pei yukamisrã, haska wanãshãpa? Ana pakanãshãpa? Ana pakatimaraka?— aki

¹⁸ haki beparameaibu Jesusũ unãkĩ hatu yuikĩ: —Beparamenikabuũ, hãtxa pewẽ mã ea beparanũ ika ikanai?

¹⁹ Hawẽ governo imposto pakati pei heshe betsa ea uĩmakãwẽ— hatu wa hawẽ pakamisbu pei heshe betsa beshũ tsumashũ uĩmabu

²⁰ uĩkĩ Jesusũ hatu yukakĩ: —Narã, tsuã besu inũ tsuã kena neamẽ? Ea yuikãwẽ— hatu wa

²¹ habũ yuikĩ: —Romano shanẽ ibu Césarnaki— akabu hanushũ Jesusũri hatu yuikĩ: —Césarnawẽ taeshũ matũ shanẽ ibu César duawakĩ hawẽ governo dayashũmisbu pei hatu inãshũkubaĩkãwẽ. Hakia Deusri duawakĩ hawẽ yusĩa txibãkĩ hawara abuai ashũriakubaĩkãwẽ— hatu wa

²² nĩkai e itã: —Nũ haska washũ parãtirumaki— itã henebaini dabekebainaibũ

Mawanibu bestẽshanaikiri Jesus yukanibukiaki, na hãtxarã

²³ hanua saduceubu judeubu pashka betsa: “Ha mawabu hawẽ yura tsua ana besteĩsmaki”, imisbu Jesus anu haburi beshũ yukakĩ:

²⁴ —Yusĩnaã, Moisés yusĩkĩ: “Huni betsa aĩyãbia huni bakewariama mawakẽ hanua hawẽ betsã aĩ hanubi aĩwãtã huni bakewashũtiki, hawẽ betsa mawaimatũ kena dabikĩ hawena washũkinã”, nuku waniki.

²⁵ Haskakiri ha hawẽ sete betsabukiri mia yuinũ nĩkawe. Betsatiã ha dukũ iuwatũ aĩbu betsa aĩwãshũ huni bakewariama mawakẽ

²⁶ ha katxukeatũ hawẽ betsã habias aĩwãshũ huni bake wariamari mawakẽ ana ha katxukeatũ hawẽ betsã aĩ habiari aĩwãriatã huni bake wariamari mawaniki.

²⁷ Hanua ha sete hawẽ henekĩ habias aĩburi bishũ habu tibitũ hawa huni bake wabuma mawai keyuabũ hanua hawẽ henei aĩbu huni bake biamas mawarianiki.

²⁸ Ha haskaniburã, mawabu ana besteaĩbutiã ha aĩbu bestitxai ha huni setebũ aĩwaniburã, haratutũ kaya ana ha aĩbu bishanimẽkaĩ?— akabu

²⁹ Jesusũ hatu kemakĩ: —Matunã, Deusũ hãtxa kenenibu unãma hawẽ kuxipa mã unãmariki. Haska wakĩ mã kanemiski.

³⁰ Shabakabi matu xinãmanũ nĩkakãwẽ. Mawanibu ana bestẽshanaibutianã, hawa ana aĩyaĩ inũ ana beneyai ikama ishãkanikiki. Haria Deusũ nai tsumabu keska beneuma inũ aĩyuma hiweshãkanikiki.

^31-32 Mawakubainaibu besteĩ ana hiweshanaibukiri matu xinãmanũ nĩkakãwẽ. Hi mashu kua here hi ikai anushũ Deusũ Moisés hãtxa wakĩ: “Earã, natiã ẽ Abraãonẽ mekenikaki. Ẽ Isaquẽ mekenikaki. Ẽ Jacõ mekenikariki”, ikai nĩkayamashũ Moisés kenenirã, mã uĩkĩ yuismamẽ? Deusrã, mawabunamaki. Hakia hiweabunaki. Haskakẽ Abraão inũ Isaque inũ Jacõ hatũ yushĩ hiweabuki. Txipu ana yura bena Deusũ hatu inãshanai xinãma mã kanehairamiski— hatu wai

³³ Jesus saduceubube yuinameai yurã kaiãnẽ nĩkabaikĩ Jesus haskakiri yukabu hatu yui pewashukiri nĩkai: “Habaa!” ikaibũ

Deusũ yununirã, haratu bestitũ binu keyuamẽ? ikaikiri Jesusũ hatu yusĩnikiaki, na hãtxarã

³⁴ hanushũ saduceubũ Jesus yukabu hatu yusĩkĩ hatũ beparãti hãtxa hatu nesewawẽ taea hawa ana yuiama mapuabũ hanua fariseubũri nĩkatã haburi itxa yubakanametã

³⁵ habũri unãti wanũ ika yuinamebirã Jesus anu bushũ habu betsa Deusũ hãtxa kenenibu yusĩnanãmis betsã unãti wanũ, iwanã, yukakĩ:

³⁶ —Yusĩnaã, haratu yunua kuxipa binua Moisés nuku keneshuniwẽ besti nũ txibaĩwẽ taeshũ Deusũ nuku mekekubaĩtirumẽ?— aka

³⁷ Jesusũ yuikĩ: —Na eska yununi betsa betsapa tibi dasibi binuhairarã, na hãtxaki nĩkawe. “Yavé mĩ Mekenika Deus duawakĩ abukĩ mĩ huĩti hirabiwẽ inũ, mĩ yushĩ hirabiwẽ inũ, mĩ xinã hirabiwẽ txibãkĩ duawakubaĩwẽ”, ani

³⁸ txibãkĩ na eska bestiwẽ mĩ Deus benimahaira wakubaĩtiruki.

³⁹ Ha inũ, ana ha katxu yunua betsarã, habiaska dabeski. Nĩkawe: “Mĩ habube hiweabu duawariakubaĩkãwẽ, ibubis mã nui mekemis keskairã”,

⁴⁰ ani ha dabe txibaĩ mã haki txiti imiswẽ taea dasibi Deusũ yunua Moisés keneni inũ Deusũ hãtxa yuishunikabũ kenenibu haki tsamia keskawẽ taea ha txibãkĩ dasibi mã xinãriatirubuki— atã

Messias Cristorã, tsuã babamẽ? iwanã, Jesusũ hatu yukanikiaki, na hãtxarã

⁴¹ hanu Templo hemaĩtĩ anu fariseubu itxa buriabumakẽ

⁴² Jesusũ hatu yukakĩ: —Nukũ Mekenika Messias Cristokirirã, haskara hakiri mã xinãmismẽ? Tsuã babamẽ?— hatu wa habũ yuikĩ: —Davĩ baba ishanikiaki— akabu

⁴³ Jesusũ ana hatu yuikĩ: —Deusũ Yushĩ Pepatũ Davi yusĩa nĩkatã haskakĩ hawẽ Mekenika Messias Shanẽ Ibu wanimẽ? Matu yuinũ nĩkakãwẽ. Davĩ yuikĩ:

⁴⁴ “Deus Mekenikatũ ẽ Shanẽ Ibu Messias yuikĩ: ‘Miki sinataibu ẽ hatu maemariama manai ẽ yusiuri tsauyuwe’ ”, aniki. Haska watã keneniki.

⁴⁵ “Messias ẽ shanẽ ibuki”, Davĩ abianikẽ haskatã hawẽ shanẽ ibu hanubi hawẽ baba itirumẽ? Ea yuikãwẽ— akĩ hatu unãtimaska wa

⁴⁶ hanushũ tsuã hawa ana hãtxa betsa yuitiruamahaira dakekĩ hawẽ beparãkĩ yukatiwẽ ana hawẽtxaĩs hawa yukama nesea mapuabũ