Mateus 16 - Kaxinawá Bíblia (BR)

Hawara tsuã atiruma fariseubu inũ saduceubũ Jesus yukanibukiaki, na hãtxarã

¹ Ana betsatiã fariseubu inũ saduceubu beshũ Jesus unãti wanũ, ikĩ parãkĩ yukakĩ: —Deus anua hawẽ unãti dami nuku ashũwẽ, mĩ hawẽ kuxipa haya nũ uĩnunã— akabu

² hatũ xinãnẽ kaneaibu unãkĩ Jesusũ hatu yuikĩ: —Ma bari hikiaya matũ yuikĩ: “Ikis nai taxipaki. Mexukiri penai bari pehairashanikiki”, mã imiski.

³ Hanua penayari yuikĩ: “Ikis nai taxipa ma nai kuĩ mexu mexuikiki. Natiã ui bekatsis ikikiki”, ikĩ haska ui inũ niwe bemis unãbiakĩ hanu hawẽ txakabu kupititiã ma kemai ẽ matu yusĩtxakayamabiakubaina hawẽ unãmati mã uĩtirumamẽ?

⁴ Nukunabu na habiatiã hiweaburã, mã txakabuki. Hamapai Deus anua unãti tsuã atiruma uĩkatsi mã ea yukabiamisrã, Deusũ Jonas bakawã sheamabiaxĩshũ ana hiwemakĩ kaĩmanirã, haska keska besti Deusũ matu uĩmakĩ matu ashũriashanikiki. Xinãkãwẽ— hatu watã henebaini

Fariseubu inũ saduceubũ yusĩa mesekiri Jesusũ hatu yusĩnikiaki, na hãtxarã

⁵ iãnẽwã kesha betsauri habe kakĩ nũ hawẽ tsumabu habe kakĩ misi buama nũ hakimakainaya

⁶ Jesusũ nuku yuikĩ: —Xinaĩrakãwẽ. Fariseubu inũ saduceubũ misi shashawati meseki. Uĩrashãkãwẽ— nuku wa

⁷ xinã pewama nũ hawẽ tsumabu yuinamei: —Nũ misi beama ishukẽ nuku haska yuikiki— nũ ikaya

⁸ Jesusũ nukũ xinã unãkĩ yuikĩ: —Haskai: “Nũ misi beama ishukẽ nuku haska yuikiki”, mã ikai? Mã ea uĩbiakĩ mã ea ikũwã txakaii.

⁹ Hawara ẽ matu yusĩa nĩkakĩ mã tapĩriamamẽ? Ha cinco misi tũkepakeshũ 5.000 hunibu ẽ hatu pimaxina inũ hawẽ teshe itxawakĩ hati kuki mã matawaxina, mã xinãmamẽ?

¹⁰ Ha inũ, sete misi tũkepakeshũ 4.000 hunibu ẽ hatu pimariaxina inũ hawẽ teshe itxawakĩ hati kuki mã matawaxina, mã xinãmarimẽ? Mã daka xinaĩ?

¹¹ Haskai fariseubu inũ saduceubũ misi shashawatikiri hãtxai haskai hatũ misi kayabikiri ẽ hãtxamabiakẽ mã xinã txakai?— nuku wa

¹² hanushũ fariseubu inũ saduceubũ misi shashawatikiri yuikĩ habũ yusĩkĩ kanemisbukiri nuku nemashu atimas tapĩtã nũ xinãkubainiki.

Mĩ nukũ Messias Cristoki, akĩ Pedrõ yuinikiaki, na hãtxarã

¹³ Hanua Jesus nũ hawẽ tsumabube kai ha mae pakea Cesaréia Filipe anu hikitã nuku yukakĩ: —Yurabunã, ẽ matũ Hutxi Kayabi Iuwarã, ẽ tsua ea yuimisbumẽ?— nuku wa

¹⁴ —Betsabũ yuikinã: “Naximanika João ana bestẽxinaki”, mia wakanikiaki. Betsabũri yuikĩ: “Elias ana butuimaki”, mia wariakanikiaki. Betsabũri yuikĩ: “Deusũ hãtxa yuishunika Jeremias kasmai hawẽ hãtxa yuishunika betsa daka”, akĩ mikiri yuimisbukiaki— nũ wa

¹⁵ —Hamẽ matũ xinãkinã, mã tsua ea wamismẽ?— nuku wa

¹⁶ Simão Pedrõ kemakĩ: —Miarã, Epa Deus hiweatũ bake mĩ nukũ mekenika Messias Cristoki— aka

¹⁷ Jesusũ yuikĩ: —Simão Barjonasĩ bakeẽ, ẽ hakẽ huni betsã mia yuiamabia ẽ Epa nai anuatũ mia unãmakĩ mia duawaikiki. Benimariwe.

¹⁸ Eã mia kenakinã, mia Pedro wakĩ mixki kuxipa keska ẽ mia waii. Mĩ haska hãtxakĩ yuishuwẽ taeshũ yurabu mĩwẽri itxapa ẽ hatu ikũwãmashanaii. Yura mema mawatirubiakẽ Satanásã datemakĩ ea ikũwaĩbu maematirumaki, hatu nemakinã.

¹⁹ Haska inũ, ikũwaĩbu mĩ hatu mekekubaĩshanũ naiuria kuxipa ẽ mia yunushanaii. Nenushũ yusĩkĩ mĩ hawara nemaya Epa Deusũri nemashanikiki. Hawara nenushũ mĩ nemamakẽ Epa Deusũri nemama ishanikiki— atã,

²⁰ Jesusũ nuku nemakĩ: —Ẽ Messias Cristoki tsua banabimayamayushãkãwẽ— itã,

Mawashanaikiri Jesusũ hatu banabimanikiaki, na hãtxarã

²¹ hanua Jerusalém anu ka haska washanaibu nuku yusĩkĩ taewakĩ: —Eki sinatakĩ ea itxakawakĩ judeu shanẽ ibubu inũ, Deusbe nukunabu hãtxashunikabu inũ, Deusũ hãtxa kenenibu yusĩnanãmisbũ ea danãkĩ itxakawakĩ ea hatu tenãmabu shaba dabe inũ bestitiã ẽ ana bestẽshanaii— akĩ

²² nuku shabakabi yuiaya Pedrõ ha mesti pashkabaĩ nemakĩ yuikĩ: —Shanẽ Ibuũ, haskamaki. Deusũ mia haska yunuama iniki. Hau tsuã mia tenãyamashanũbũwẽ— akaya

²³ Jesus hawẽ tsumabukiri nasauketã uĩkĩ Pedro nemakĩ yuikĩ: —Satanásã xinãwẽ mĩ ea teawakatsis ikai ana hari haskayamawe. Hawara Deusũ uĩaĩ keska mĩ uĩyamaki, eska xinãkinã, haska yurabũ uĩmis keskawẽ mĩ ea nemairã— abaĩ

²⁴ hanua Jesusũ nũ hawẽ tsumabu nuku yuikĩ: —Tsuara eki txiti ikatsis ikirã, haska hamebi xinãmis hakimatã: “Ẽ habe mawatiruki”, ikĩ hau ea txibãkubainũbũwẽ.

²⁵ Ha inũ, tsuãra hatũ hiwea ibubis mekekatsi ikamarã, hau benunũbũwẽ. Hatũ hiwea ewẽ benubiaxinaburã, ea anua ana hiwekuĩa bishãkanikiki.

²⁶ Hamẽ tsuãra mabu mirimawẽ kemu bestikĩ itxawashũ ea ikũwãkĩ txibãma hatũmebi hatũ hiwekuĩa benushãkanikiki, eauma mawairã. Ha inũ, hatũ hiwea pakatã tsuã ana bitirumahairaki.

²⁷ Hamẽ ẽ matũ Hutxi Kayabi Iuwarã, ẽ Epã kuxipaya Shanẽ Ibui hawẽ nai tsumabube ana hushũ tsuabũra ea txibaĩ hiwei pemisbu inũ txakabumisbu habu tibi ẽ hatu manakushanaii, pepa inũ txakabuwenã— iwanã

²⁸ —Ikũ kayabi ẽ matu yuiai nĩkakãwẽ. Na habia mã ebe mapuaburã, mã betsa betsapa mawariamakẽ ẽ matũ Hutxi Kayabi Iuwa ẽ matu Shanẽ Ibui taeshunai mã uĩshanaii— nuku aniki.