Marcos 1 - Kaxinawá Bíblia (BR)

Hanu tsua hiweabumanushũ Naximanika Joãonẽ hatu yusĩkĩ hatu naximanikiaki, na hãtxarã

¹ Ha dukũ bebũkiri Deusũ hawẽ bake Jesus Messiaskiri hatu yubani haska hawẽ kakape tashnimakĩ taewani matu yuinũ nĩkakãwẽ.

^2-3 “Naiurishũ Deusũ hawẽ bake yuikĩ: Mĩ kariama mia bebũ ẽ hãtxa yuishunika hau mikiri bebũkiri txanishanũ ẽ mia yunushũshanaii. Hatũ hanu tsua hiweabumanushũ hui kuxipawẽ hatu yuikĩ: ‘Nukũ Shanẽ Ibu nai anua matuki bayui ma kemaikiki. Matũ huĩtinĩ xinã pewarikãwẽ, bai kayatapia keska wakinã’, hatu wakĩ mia hatu yuishũshanikiki”, ayama Deusũ hawẽ hãtxa yuishunika betsakiri haska yuini txipu Isaíasri haska Deusũ yuia nĩkatã hawẽ hãtxa yuishunika Isaíasĩ keneniki.

⁴ Hanua haska yuini keskai hari tsua hiweabumanu Naximanika João kaima hiwea tashnituxitã hatu yuikĩ: “Matũ xinã betsa watã matũ txakabu Deusũ hau matu buashũshanũ nĩkatã hawara txakabuwẽ mã benua hiwea henerikãwẽ. Matũ xinã maewatã mã ea uĩmaya ẽ matu naximashanaii”, iwanã, hatu yusĩkubainaya

⁵ Judéia mai pakeanu hiweabu inũ Jerusalém mae ewapa anu hiweabu dasibi beshũ Joãonẽ hatu yusĩaĩ nĩkakĩ habũ ikũwãkĩ hatũ txakabu Joãoki txanikĩ hatũ txakabu henekatsi ikĩ xinã betsa waibu hawẽ unãti wakĩ Jordão hene anushũ Joãonẽ hatu naximapakekubainikiaki.

⁶ Hanua Joãonẽ tari inũ hawẽ pitikiri matu yuinũ nĩkakãwẽ. Camelo dani tima tari sawea inũ, bitxi nanesheketi sawea inũ, hawẽ piti pe beshmas txãpu inũ ni meranua buna batapa aki hiwekũkainikiaki.

⁷ Hanushũ yurã kaiã hatu banabimakĩ: —Shanẽ ibu kuxipahaira betsã ea binũa ea katxu dama hushanikiki. Haskawẽ taeshũ mawaira ẽ kuxipa hayamatũ kakaĩ ẽ hawẽ hawaumahairatũ hawẽ bitxi tae meshpũ tsitsaushũ pekashũkĩ akawakĩ ẽ duawatirumaki.

⁸ Hamẽ eãnã, henewẽ besti ẽ matu naximakubainaii. Hakia hatunã, Deusũ Yushĩ Pepawẽ matu unãti wakubaĩshanikiki, naxima keska wakinã— akĩ Joãonẽ hatu yuikubainikiaki.

Joãonẽ Jesus naxima kaxĩkẽ Satanásã Jesus parãpai inikiaki, na hãtxarã

⁹ Ha haskaitiã Jesus hawẽ mae Nazaré Galiléia mai pakeanua kaĩkirani João anu ka Jordão hene anushũ Joãonẽ naximakĩ meneaya

¹⁰ neshekei mapekekirãkĩ Jesusũ uĩayã nai uria Deusũ Yushĩ Pepa deiwã keska hamamaki butuaya

¹¹ nai urishũ Deusũ yuikĩ: —Miarã, mĩ ẽ bakeki. Ẽ mia abukĩ katunirã, ẽ miwẽ benimahairaii— anikiaki.

¹² Hanua hari tsua hiweabuma benãta yuinaka mese pianãbu anu Deusũ Yushĩ Pepatũ Jesus iyuxina

¹³ 40 dia Satanásã Jesus paranũ, iwanã, unãti wakeakeaya kakũkaũkĩ Jesusũ Satanás maemakubaunaya Deusũ nai tsumabũ merabewakubainibukiaki.

Galiléia mai pakea anushũ Jesusũ hatu yusĩkĩ taewanikiaki, na hãtxarã

¹⁴ Hanushũ bitxiti hiwe anu João ma bitxixinabũ Galiléia mai pakeanu kashũ Deusũ kakapekiri Jesusũ hatu yusĩkĩ

¹⁵ taewakĩ: —Na habiatiã Deus ma nenu shanẽ ibuikiki. Haskakẽ mã Deuskiri txakabumis henetã ẽ kakape ekiri ikũwãkubaĩkãwẽ— hatu wanikiaki.

Baka neshenikabu dabe inũ dabe Jesusũ hatu katunikiaki, na hãtxarã

¹⁶ Hanua kai Galiléia iãnẽwã kesha Jesusũ ketãkubaini kakĩ baka neshenika dabe Simão inũ hawẽ betsa Andrẽ hatũ hisĩ ewapa pũteaibu hatu betxishũ

¹⁷ Jesusũ hatu katukĩ yuikĩ: —Ea txibãkãshũ matũ daya henekãwẽ. Mã haska dayamisburã, ana baka nesheama hakia mã baka neshemis keska wakĩ yurabu ẽ matu itxawamashanaii, hau ea ikũwãshanũbunã— hatu wa

¹⁸ hanushũ hatũ shashu inũ hatũ hisĩ hatũ haibu betsa yunu keyutã hawaira henebaini Jesusbe buaibũ

¹⁹ hanua Jesus ana ketãkubaĩkĩ Zebedeũ bakebu Tiago inũ Joãonẽ shashũshũ hatũ hisĩ taras ika hunukĩ kesheaibu betxishũ

²⁰ Jesusũ haturi katukĩ yuikĩ: —Ea txibãkubaĩkãwẽ— hatu wa nĩkatã habianu hatũ ibu Zebedeube shashu namaki habũ merabewamisbube baxibaini Jesus txibaĩ burianibukiaki.

Huni yushĩ txakabu haya Jesusũ kaĩmanikiaki, na hãtxarã

²¹ Hatu haska wabaina Jesusbe bui mae betsa Cafarnaum anu hikixinabũ sábado huĩrukũtitiã hanu itxamisbu anu Jesus hikishũ hatu yusĩaĩ

²² Deusũ hãtxa kenenibu habũ hatu yusĩkĩ xinã txãkãwaĩsma keskama Jesus shanẽ ibu kayabi kuxipakĩ hatu yuiai yurabũ nĩkai e itã: “Haskamẽ?” iki benimakubainaibũ

²³ habianuri huni yushĩ txakabuya tsauwa yushinẽ unãshubima bis imakĩ

²⁴ yuimakĩ: —Jesus Nazaré anuaã, haskai nuku anu mĩ hushumẽ? Nũ yushĩ txakabu nuku yamawanũ ika mĩ huaraka? Ẽ mia unaiĩ, mĩ Deusũ bake pepa meribirã— ikaya

²⁵ yushĩ txakabu Jesusũ nemakĩ yuikĩ: —Hanua haskama nesetã ha huni anua kaĩrikaĩtãwẽ— aka

²⁶ ha huni anua yushĩ txakabu kaĩkaĩkĩ unãshubimahaira bis imatã mai pusamatã dushku imatã kaĩkainaya

²⁷ dasibibũ uĩ —Habaa!— ike ikei yuinamekĩ yuikĩ: —Narã, yusĩa betsa hayaki. Shanẽ ibu keska kuxipahairaki. Hawẽ hãtxa paepaki, yushĩ txakabu shũska yunua nĩkai hawẽ datei kaĩkanikikirã— itã

²⁸ samama bui hakiri hatu banabimai txaniakeakeaibũ Galiléia mai pakeanushũ Jesuskiri kakaibu dasibibũ nĩkabaunibukiaki.

Simaõ dais aĩbu isĩ teneai Jesusũ shushawanikiaki, na hãtxarã

²⁹ Hanu itxamisbu hiwe anua Jesus kaĩkaini Simão inũ Andrẽ hiwe anu Tiago inũ Joãobe buaibũ

³⁰ Simãonẽ dais aĩbu yuna tenei daka anu hikitã haska isĩ teneaikiri habũ Jesus yuiabu

³¹ haki kemashũ metsũshũ benituxia hawẽ yuna damaĩtã benimakĩ hatu duawakĩ bawashũ hatu pimaya

Isĩ betsa betsapa teneaibu Jesusũ hatu shushawanikiaki, na hãtxarã

^32-33 hanua ma bari kai mexuaya dasibi ha mae anu hiweabu Simão inũ Andrẽ hiwe anu itxai bekĩ dasibi isĩ teneaibu inũ yushĩ txakabu hayabu Jesus anu iweaibũ

³⁴ isĩ betsa betsapa teneaibu itxapa shushawakĩ yushĩ txakabu itxapayari yurabu anua kaĩmapakenikiaki. Haska wakĩ yushĩ itxapatũ Jesus unaĩbuwẽ taeshũ Jesusũ hatu hãtxamamakĩ nemapakenikiaki.

Hatũ itxati hiwe tibi anushũ Jesusũ hatu yusĩnikiaki, na hãtxarã

³⁵ Hanua ushaxini ma penabiai mexuyukẽ Jesus butukaina mae dapi benãta Deusbe hãtxai ka habe hãtxaya

³⁶ Simão bestẽkãwã hawẽ haibuaibubetã Jesus benabaũkĩ

³⁷ atimas haki nukutã yuikĩ: —Dasibibũ mia benakanikiki— akabu

³⁸ Jesusũ hatu yuikĩ: —Deusũ hãtxa yusĩbaunũ ika ẽ kaĩkirãxinaki. Haskawẽ taea mae betsa urama hanuri yusĩ burinãkãwẽ— hatu wabaini

³⁹ Galiléia mai pakea dasibi anu kakũkaũkĩ hanu Deusũ hãtxa nĩkakatsis iki hanu itxamisbu hatũ hiwe tibi anushũ kakape yusĩkĩ yushĩ txakabu yurabu anua kaĩmakubaunikiaki.

Huni hawẽ yura dasibiki txami betsani Jesusũ kaya wanikiaki, na hãtxarã

⁴⁰ Hanua huni hawẽ yuraki txami betsani Jesuski nukutã dãti ishũ yuikĩ: —Ea kayawakatsis ikĩ mĩ ea kayawatiruki— aka

⁴¹ hawẽ txamiwẽ datekĩ danãkĩ tsuã metsakatsi isbumabiakẽ Jesus hawẽ dabanã ikĩ meshũkaĩ mekĩ yuikĩ: —Ẽ mia kaya waii— akaya

⁴² hawẽ txami sakara iki dashnukui keyuaya

⁴³ Jesusũ nitxĩkĩ nemakĩ:

⁴⁴ —Ẽ mia yuiai nĩkairawe. Hawara ẽ mia ashukiri tsua yuiyamayukubaĩtãwẽ. Hari dukũ kakĩ Deusbe nukunabu hãtxashunika mĩ yura mĩ ma kayashu uĩmatãwẽ. Haska mĩ ma kayashu hau dasibibũ mikiri unãnũbũ hawẽ hatu beparãbaĩkĩ habiaskari inãkuĩ Moisés yununi hatu anu buritãwẽ. Mĩ haska buaya mĩ kayashu habũ unãshãkanikiki— abia

⁴⁵ nĩkama kashũ haska Jesusũ ashũshu huneama tsuaburaki nukuakeakekaini dasibibuki txaniaya shabakabi hamapai mae anu Jesus ana hikitiruma hari tsua hiweabumanu besti niaketanaya mae tibi anushũ yurabũ Jesus uĩnũ ika “Hanimẽ?” iki yuka ibirã ibirani haki itxanibukiaki.