Lucas 23 - Kaxinawá Bíblia (BR)

Pilatos anu ana Jesus iyushũ txitenibukiaki, na hãtxarã

¹ shanẽ ibu dasibibũ haska wakĩ unãti wakĩ menetã hanua benibaĩkĩ Romano governador Pilatos anu Jesus iyushũ

² hakiri txitekĩ Pilatos yuikĩ: —Na huninã, txakabu betsa betsapa hatu yusĩkĩ nukunabu itimaska wakĩ hatu paraĩkiki. “Mĩ shanẽ ibu César hau pei inãyamanũbũ nukunabu hatu nemamiski”. Habiari: “Ẽ Shanẽ Ibu Messias Cristoki”, imiskiaki— akĩ hakiri yuiaibu

³ Pilatõs nĩkakĩ Jesus uĩkĩ yukakĩ: —Miarã, mĩ judeu shanẽ ibubu binu keyuamẽ?— aka Jesusũ yuikĩ: —Hawaikika! Habiari mĩ ea yuiaii— ikaya

⁴ hanushũ judeubu Deusbe hawenabu hãtxashunika shanẽ ibubu inũ yurã kaiã Pilatõs hatu yuikĩ: —Hawa txakabu akamaki. Hawawẽ taeshũ kupiti hayamaki— hatu wabia

⁵ Pilatõs hãtxa nĩkama hawẽtxaĩs unãshubima yuikĩ: —Judéia anushũ hatu yusĩakeakekĩ hatu itimaska wamiski. Galiléia anushũ taewaima nenushũri hatu yusĩriaikiki— akaibu

Herodes anuri Jesus iyushũ txitenibukiaki, na hãtxarã

⁶ haska yuiaibu Pilatõs nĩkatã hatu yukakĩ: “Aa, ha hunirã, Galiléia anuaraka?” ikaya

⁷ “Haa, Galiléia anuaki”, akabu Pilatõs tapĩtã ha Galiléia shanẽ ibu Herodes na habia mae Jerusalém anu bai huxĩkẽ hawẽ soldadobu yunukĩ shanẽ ibu Herodes anu Pilatõs Jesus hatu yunua iyuabu

⁸ haska Jesusũ hamapai damiwakĩ betsa betsapa wai kakai Herodesĩ nĩkamis haska hawẽ berubi dami betsa ashuaĩ uĩnũ ishũ manahairamis atimas Jesus uĩ shanẽ ibu Herodes benimahairakĩ

⁹ haska wamis keska yukatxakayamabiaya Jesusũ hawa yuiamahairakẽ

¹⁰ habianuri Deusbe hawenabu hãtxashunika shanẽ ibubu inũ Deusũ hãtxa kenenibu yusĩnanãmisbũ Herodes yuiriakĩ hakiri Jesus txitekĩ ha akeakeaibũ

¹¹ Jesusũ hawa ha yukaikiri hatube hãtxama kutashna nikẽ hawẽ soldadobubetã Herodesĩ Jesus itxakawakĩ kashe wakĩ betsa betsapa watã shanẽ ibu keska wakĩ tima tari hawẽrua sawematã hawawẽ haska watima ana hawẽri Herodesĩ Pilatos anu Jesus yunua iyuabu

¹² Romano shanẽ ibu Pilatos inũ judeu shanẽ ibu Herodes uatiã sinatanamebianibu na habiatiã daenamei haibunamei taenibukiaki.

Pilatõs Jesus hau mastanũbũ hatu yununikiaki, na hãtxarã

¹³ Pilatos anu Jesus ana txĩtuãbiranabu uĩkĩ Deusbe hawenabu hãtxashunika shanẽ ibubu inũ mae shanẽ ibubu inũ yurã kaiã Pilatõs hatu itxawashũ

¹⁴ yuikĩ: —Na huni ana ea anu iweshũ matunabu parãkĩ hatu itimaska wamis yuikĩ mã txiteshuki. Hakia dasibi mã uĩayã Jesus yukakĩ unãti wakĩ hawa txakabuwakĩ mexina ẽ betxiamaki.

¹⁵ Hanushũri hau Herodesĩ unãti watã haskara wanũ, iwanã, ẽ yunua unãti wakĩ hawa txakabuwaxina betxiamari ea anu Herodesĩ ana yunushuki. Hawa haskaxinawẽ taeshũ hau tenãnũbũ ẽ yunutirumaki.

¹⁶ Haskakẽ kuxa kuxa a bestitã hau hawama kanũ ẽ hatu yunuaii— ikaya

^17-19 bari tibi Páscoa besiaibutiã Romano soldadobũ hatu atxishũ bitximabu hau bestitxai tashnimanũbũ yurabũ katua Romano shanẽ ibũ hatu kaĩmashũpakemiskẽ habiatiãri huni betsa Barrabás huni betsabube detenamekĩ hatũ shanẽ ibu detepaikĩ hatubetã huni betsabu tenãkẽ habube atxishũ bitximabũ ha xinãkĩ hanushũ yurã kaiãnẽ unãshubima yuikĩ: —Hau Jesus tenãnũbũ yunuwe. Haska watã Barrabás kaĩmatã nuku nitxĩshũwẽ— ikaibũ

²⁰ Pilatos Jesuswẽ nuikĩ hawa wama nitxĩkatsis ikĩ ana hatu yuikĩ: —Haskamaki. Matũ shanẽ ibu Jesus matu kaĩmashũpa?— hatu wabia

²¹ nĩkakatsi ikama unãshubimahaira ana yunukĩ: —Cruzki hatu mastamawe! Cruzki hatu mastamawe!— akeakeabu

²² Pilatõs ana hatu nemanũ, iwanã, yuikĩ: —Hawa txakabuwaxinamẽ? Hau tenãnũbũ unãti wakĩ hawara txakabuwaxina ẽ betxiamaki. Hatu kuxa kuxa ama bestitã ẽ henekatsis ikaii, hau hawama kanunã— hatu wabia

²³ nĩkamas yura itxapabũ unãshubima ana yuikĩ: —Cruzki nuku mastashũwẽ— akĩ haska xinaĩbu keska hau hatu ashunũ yunukĩ heneabumakẽ

^24-25 atimas haska xinaĩbu keska hau hatu ashunũbũ hawẽ soldadobu Pilatõs yunutã ha huni Barrabás detenameawẽ taeshũ bitximabu yurabũ katua kaĩmatã hanushũ Jesus hau mastatanũbũ hatu yununikiaki.

Cruzki Jesus mastanibukiaki, na hãtxarã

²⁶ Hanushũ Romano soldadobũ cruz Jesus haki mastanũ, iwanã, iamabaĩkĩ iyukĩ huni betsa Simão Cirene anua ewani Jerusalém anu hikiai atxishũ hau Jesusũ cruz iashũbainũ yunuabu Jesus bebuaya

²⁷ yura itxapabũ Jesus txibãbainaibũ aĩbuaibu hawẽ nui kashai bis ikubainaibu

^28-31 Jesusũ hatu uĩkĩ yuikĩ: —Jerusalém anua aĩbuaibuũ, ewẽ nui kashayamakãwẽ. Hakia hanu nuitapaibutiã nenuabũ yuikĩ: “Aĩbũ habũ bake bisbuma besti benimashãkanikiki”, ikaibũ hanushũ yura itxapabũ habũ txakabuwẽ datekĩ mawa yuikĩ: “Nukuki matekei di ikĩ nuku hunewe”, ashãkanikiki. Haska inũ, ea ẽ hawa wama nibiakẽ ea itxakawakanikiki. Hamẽ habũ ea itxakawaibu Deusũ haburi itxakawatxakayamariakĩ hatu kupihairashanikiki. Haskawẽ taea ana ewẽ nui kashama matũmebi inũ matũ bakebuwẽ taea nui kashakãwẽ— hatu wabainaya

³² hanua huni yumetsu dabe Jesusbe tenãnũ, iwanã, iyui

³³ Bushka Shau Mati anu mapematã Jesus cruzki mastatã hanushũ huni yumetsu daberi habianuri habe mastakĩ betsa hawẽ yusiuri betsa hawẽ yusmauri mastashũ nitxĩkĩ

³⁴ meneabũ soldadobukiri Jesusũ yuikĩ: —Epaã, ea haska waiburã, hawa hatu kupiyamawe, hawa unãma iki ikanikikirã— ikaya hanushũ soldadobũ hawẽ beyustiwẽ maemanãkĩ hawẽ tari pashkanũ iwanã: “Tsuã dukũ hawẽ tari bimẽkaĩ? Akãwẽ”, ikaibũ

³⁵ habianuri shanẽ ibubu inũ yura itxapabũ uĩkĩ kashe wakĩ yuikĩ: —Huni betsabu merabewamiski. Hamebiri hau pasharianũwẽ. Haska Deusũ Katua Messias kayamẽkaĩ cruz anua na habiatiã butuai uĩkĩ nũ ikũwãtiruki— ikaibũ

^36-38 hi besha sapaki kenekĩ: “Narã, judeubũ shanẽ ibuhairaki”, akĩ kenea Jesus mamaki mastashũ soldadobũ txaima ha dapishũ kashe wakĩ vinho hene muka amapaikĩ yuikĩ: —Mĩ judeu shanẽ ibu kayabimẽkaĩ? Nuku unãmai mimebi pashai buturikaĩtãwẽ— ariaibũ

³⁹ hanua yumetsu dabe habe mastaburi betsa hãtxa txakabukĩ yuãkĩ: —Mĩ Deusũ Messias Cristomẽkaĩ? Mimebi bututã nukuri buteriwe, nũ pashanunã— akaya

^40-41 hanua betsã kũyã akĩ nemakĩ yuikĩ: —Nukunã, nũ txakabuwaxinawẽ taeshũ atxishũ itxakawakĩ nuku tenãkanikiki. Hakia na huni pepatũ hawa txakabuwaismabiakẽ itxakawakĩ nukube tenãriakanikiki. Deuski meseama na huni pepa mĩ hatubetãs haska wai? Ana haska yuiyamawe— iwanã,

⁴² hawẽ txakabuwẽ datekĩ Jesus yuikĩ: —Jesusuũ, mĩ shanẽ ibui taeaitianã, ewẽ nui ea hakimayamashãwẽ— akaya

⁴³ Jesusũ yuikĩ: —Txanima ẽ mia yuiaii. Mĩ xinã betsa waiwẽ taea na habiatiã pe besti anu ebe ka mĩ hiwepakeshanaii— ikaya

Haskatã Jesus mawanikiaki, na hãtxarã

^44-45 hanua bari mananãbibiakẽ bari nuka mexua itsa daka manaibũ ma bari kai nai putxinĩ dakakẽ bepenakainaya Templo merã dĩtu wakĩ ha tariwẽ kebẽnibu hamebi manaũria namakis dis iki keyuaya

⁴⁶ hanua Jesus bis ikĩ yuikĩ: —Epaã, mia anu ẽ yushĩ ẽ nitxiaĩ ea mekewe— akĩ haska yuitã mawaya

⁴⁷ hanushũ Romano soldado capitão Jesus haskai uĩtã Deus kẽwãkĩ yuikĩ: —Ikũki. Na huni txakabumaki— akaya

⁴⁸ ha dapi yurã kaiã mapubaunabũ haskashu dasibibũ uĩ hawẽ nui huĩti nixmai shutirĩ shutirĩ ibainaibũ

⁴⁹ hanua hatiri Jesusũ haibuaibu inũ aĩbuaibu Galiléia anua habe bexiãburi benãta nishũ haskai uĩnibukiaki.

Jesus cruzkia mawa butebaĩ maiwanibukiaki, na hãtxarã

^50-54 Hanua ma bari kaya habiatiãri judeubu huĩrukũkatsi bebũkiri piti pewakĩ dasibi menea bari hikiaya ana dayatirubumawẽ taea hanu Judéia anua José hawẽ mae Arimatéia anua ewai yumeni, huni pepa inũ duapatũ Deus shanẽ ibushanaitiã manakĩ judeu shanẽ ibubiakĩ hau Jesus tenãnũbũ shanẽ ibu betsabube Sinédrio hatube ha yubakama ixiã José Romano shanẽ ibu Pilatos anu kashũ Jesus maiwatanũ ishũ hawẽ yura yukai kashũ yuka yunua ma huĩrukũti kemaiwẽ taea hawaira kashũ cruz anua hawẽ haibubetã Jesusũ yura hatu butemashũ tari txaipa hushupawẽ dayabutã bushũ maiwati mixki tãpe bena kini waimabu anu hanu yura betsa datãriabuma anu Josẽ hawẽ haibuaibubetã Jesusũ yura datãtã mixki ewapawẽ bepubainaibũ

⁵⁵ hanua aĩbuaibu Galiléia anua Jesusbe bexiãbũ Jesusũ yura buaibu txibãbaini maiwati tãpe inũ haska Jesusũ yura datãtã bepubainaibu uĩtã

⁵⁶ haria Jerusalém anu txĩtũbaĩ hatũ hiwe anu hikishũ sheni ininipa pepa inũ hawẽ dapushti dau betsa hawẽ yura tashka wakĩ txaputima wati dau pewakĩ meneabũ ma bari hikiaya huĩrukũtiãkẽ haska Deusũ Moisés yununi xinaĩ aĩbuaibu huĩrukũkĩ manabaixina