Lucas 17 - Kaxinawá Bíblia (BR)

Yura betsã hawara hatu txakabuwamai mesekiaki, na hãtxarã

^1-2 Hanushũ Jesusũ haki txiti ikabu besti yusĩkĩ yuikĩ: —Tsuãra haska xinãmabiakẽ yura betsã hawara txakabu memakĩ mia beya wamanũ, iwanã, haska Deusũ yunumis inũ nemamis matu amakĩ txakabuwamisbuki. Hakia tsuabũra enabu huĩti babubu parãkĩ hatu txakabuwamamis haburi Deusũ hatu kupia nuitapahairashanaiwẽ taea hawẽ shekiwã deneti mixki ewapa neshashũ teumatã iãnẽwã merã pukua hasarã, hawẽ kupiti beshmas mekeanaii.

³ Haskakẽ txakabuwakĩ mã kanekatsi ikamarã, uĩrakãwẽ. Hamẽ ea ikũwaĩ betsã kanekĩ mia txakabuwa dakeama kashũ shabakabi txitekĩ dakewawe. Mĩ hãtxa pewẽ hawẽ txakabu mĩ hakimawa hawẽ xinã betsa waya hawẽ txakabu ana xinãyamawe.

⁴ Habias shabatiã tsuãra seteki mia txakabuwashu habiatikiri mia yuikĩ: “Ẽ ana kaneshuki. Ana ẽ haskayamashanũ ẽ txakabu ana xinãyamawe, nũ ana sinatarabeyamanunã”, mia waya habiatiriki hawẽ txakabu ana habetã xinãtimaki— hatu wa

Hawẽ tsumabũ ana ikũhairawati kuxipa ea anibukiaki, na hãtxarã

⁵ hawẽ tsuma kuxipayabũ Jesus ea akĩ yuikĩ: —Nũ mia ikũwãbiaya ana ikũhairawati kuxipa nuku inãwẽ— akabu

⁶ hanushũ Jesusũ hatu yuikĩ: —Mã ea ikũwaĩnã, mostarda heshe pesheixta keska mã hayaki. Haska keska hayabũ na hi yunukĩ: “Nenua mĩ tatxa betsekekaĩ unu iãnẽwã nemaki ni maewe”, mã aka matu nĩkatã itiruki— iwanã,

Hatũ shanẽ ibuã yunua ashũkĩ duawai kẽtimakiri Jesusũ yusĩnikiaki, na hãtxarã

⁷ ana hatu yusĩkĩ: —Tsuara mã dayaruya matũ bai urutani kasmai matũ txashuwã inũ ina awa matu mekeshũbai hukirã hiwetã hikiai yuikĩ: “Tsaushũ piriyuwe”, akĩ mã yuimismẽ?

⁸ Mã haska waismaki. Yuikĩ: “Bari kaya nũ pinũ bawa taewawe, eã dukũ ẽ piaya txipu mĩ tari betsa sawetã miãri mĩ piairã”, akĩ matũ dayaru mã pe yunumiski.

⁹ Haska yunua hawẽ tsumapã nĩkakĩ pe akubainaiwẽ taeshũ hawẽ shanẽ ibũ hawẽ tsuma: “Peki”, aismaki.

¹⁰ Maturã mã habiaskari keskaki. Haskakẽ hawara Deusũ matu yunua atã ibubis keãma yuikĩ: “Ẽ shanẽ ibũ ea yunuas besti ẽ akubainaii. Ẽ hawẽ tsuma bestiki”, ikĩ hawara matu yunua ha besti xinãkĩ ashũkĩ ha dukũ meneshũkubaĩkãwẽ, hawa txikixamarã— hatu wanikiaki.

Mekẽ dabeti hunibu bitxiki txamini buisbuma Jesusũ shushawanikiaki, na hãtxarã

¹¹ Hanua betsatiã Jesus Jerusalémkiri kakũkaini Samaria mai pakea inũ Galiléia mai pakea ha dabe namakis anu kai

¹² mae betsa anu hikiaya dez hunibu yuraki txaminibũ Jesus betxitã benãta mapushũ

¹³ hãtxa kuxipawẽ yuikĩ: —Jesus yusĩnaã, nukuwẽ nuiwe— akabu

¹⁴ Jesus hatuwẽ nuikĩ uĩkĩ hatu yunukĩ: —Jerusalém anu bushũ Deusbe nukunabu hãtxashunikabu matũ yura uĩmaritãkãwẽ— hatu wa hawẽ hãtxa ikũwãbaini dabekebaini bukĩ hatũ yuraki txamini ma shusha ana txami hayama uĩaĩbũ

¹⁵ habu bestitxaitũ hawẽ yuraki txamini ma shusha uĩtã dabekekirã hui kuxipawẽ Deus kẽwaĩ

¹⁶ Jesusunabuma Samarianawabia Jesusũ besuuri dãti iki beti ishũ kẽwãyã

¹⁷ Jesusũ yuikĩ: —Dez huni txaminibu ẽ shushawashuki. Haskamamẽ? Hanimẽ, ha nove huni Israelburã?— ikĩ

¹⁸ —Na nawã besti Deus kẽwaĩ txĩtũkirãshuki. Hawẽ tapĩkãwẽ— iwanã,

¹⁹ nawa dãti ika yuikĩ: —Benitã inũ kariwe. Mĩ ea ikũwaĩwẽ taea mĩ shushashuki— anikiaki.

Haskai Deus shanẽ ibui ana hushanaikiri yusĩnikiaki, na hãtxarã

²⁰ Hanushũ fariseubũ Deus shanẽ ibui ana hushanaikiri yukabu Jesusũ hatu yuikĩ: —Deus shanẽ ibuairã, ikis beruwẽ mã uĩtirumaki.

²¹ Ha inũ, tsuãra yuikĩ: “Uĩwẽ. Deus shanẽ ibui naki”, ikasmai: “Uĩwẽ. Unuki”, ikĩ yuiama ishãkanikiki. Ikũ ẽ matu yuiaii. Deus shanẽ ibuirã, ikis matube dasia niaki, taeirã— hatu watã

²² hanushũ hawẽ tsumabu beiskĩ yuikĩ: —Earã, matũ Hutxi Kayabi Iuwa ea uĩbianishũ ana ea uĩkatsis ibiakĩ mã yane ana ea uĩyama ishãkanaii.

²³ Mã haskaya matu parãkĩ yuikĩ: “Nenu ma huaki, Cristorã”, ikasmai, “Unu ma huaki”, ikaibu nĩkabiatã hari hatu txibãyamashãkãwẽ.

²⁴ Hakia ẽ matũ Hutxi Kayabi Iuwa ẽ ana eskakirãshanai matu yuinũ nĩkakãwẽ. Hawaira uke bukũ kana beri iki bakamis keskatã ẽ ana huai dasibibũ ea uĩshãkanikiki.

²⁵ Ẽ haskariama ha dukũ na habiatiã ea danãkĩ yurabũ bikahaira ea tenemakĩ ea nuitapawayushãkanikiki.

²⁶ Haska inũ, Noé hiwekẽ txakabui hiwekubainibu keskariaibũ matũ Hutxi Kayabi Iuwa ẽ ana txĩtũkirãshanaii.

²⁷ Eskanibuki. Hawẽ nunutiwẽ Noé hikiriamakẽ yurabũ pikĩ mabesh aki aĩyãkĩ hatũ bakebu beneyawakĩ Deuskiri hawa xinãma hiwekubainaibu Deusũ yunua Noẽ txibaĩ hawenabubes hawẽ nunuti menetã hikiaya henẽ hatu atxiaya Deusũ yunua nĩkaisbuma hatumebi debui hasai keyunibuki.

²⁸ —Haska inũ, habiaskariai Ló hatube hiweriakẽ txakabuwakubaĩmisbu Deusũ hatu kupikĩ yamawani ana matu xinãmanũ nĩkakãwẽ. Habũ pikĩ mabesh akĩ mabu bikĩ mabu inãnanãkĩ bai washũ banakĩ hiwe wakubaini Deuski hawa dateama hiwekubainaibũ

²⁹ Ló huni pepa hawẽ mae Sodoma anua Deusũ pasha watã nai anua txi inũ enxofre ui keskai niri ikĩ Sodomanawabu hatu yamawaniki.

³⁰ Habiaskariai matũ Hutxi Kayabi Iuwa ẽ huai yurã kaiãnẽ ea xinãkĩ manabumakẽ ẽ hatu habiaskari wakĩ kupishanaii.

³¹ —Ẽ hatu haska washanaitiã na mai bawa hiwe sapa sheni manaũri maniaburã, butushũ hawẽ hamapai bikatsis ibiakĩ hau hawẽ hiwe anu hikiama hau hawaira pashashanũbũwẽ. Ha inũ, ikũwaĩ ha bai anu dayaiburã, mexu merã hatũ bemakia tari keshtupa bikatsis ibiai hau ana txĩtũkiranama hau habiariari pashariashanũbũwẽ.

³² Hamẽ betsarã, eskaniki. Xinãkãwẽ. Lõ aĩ Sodoma anua habe pashabiai hawẽ mabuwẽ nui haskaimẽkaĩ uĩnũ ika nasaukeai Deusũ habiari damiwakĩ tewe wanirã, mã haskariatiruki. Uĩrashãkãwẽ.

³³ Haskakẽ tsuabũra hawẽ hiwea yauxikĩ benushãkanikiki. Hakia tsuabura ewẽ taea mawanũ ika hawẽ hiweawẽ nuiama mawaburã, hawẽ hiwea benuama hiwekuĩshãkanikiki, niti ikamarã.

^34-36 Ha inũ, betsarã, mexu merã habias dakatiki dabe ushabu betsã ea txibãmis iyukĩ betsã ea txibaĩsma Deusũ nai tsumã henebaĩshanikiki. Ha inũ, aĩbu dabetã deneaibu betsã ea txibãmis iyukĩ betsã ea txibaĩsma heneriabaĩshanikiki— hatu wa

³⁷ haska yuiai hawẽ tsumabũ nĩkatã yukakĩ: —Shanẽ Ibuũ, dasibi mĩ nuku yuiairã, hania haskashanimẽkaĩ?— akabu hunea hãtxawẽ ana hatu yuikĩ: —Hanu yura mawa daka pisi mayai shetẽ shetebirã hanu itxai nuyabaũmis keskai ishãkanikiki— iwanã,