Josué 8 - Kaxinawá Bíblia (BR)

Haska watã maewã Ai hau ibuwashanũbũ Senhor Deusũ hatu yununikiaki, na hãtxarã

¹ Hanushũ Senhor Deusũ Josué ana yuikĩ: “Ai anu hiweabuwẽ natiã ana datei punu nukayamawe. Mĩ hunibu detenamenikabu dasibi iyui Ai anu mapekeshãwẽ. Harishũ eã matu merabewakĩ Ai shanẽ ibu inũ, hawenabu inũ hawẽ mae inũ, hawẽ mai pakea matu atximakĩ mina ẽ mia wamashanaii.

² Jericó inũ hawẽ shanẽ ibu mã yamawashina keska wakĩ Ai inũ hawẽ shanẽ ibu habiaskari washãkãwẽ. Hakia mã ma hatu maema hatũ mabu inũ hatũ inabu atxitã matũ ibu wakĩ bishãkãwẽ. Hatu beparani hatũ maewã petxiuri detenamenikabu itxapa hau huneshũ manatanũbũ, hune hatu yunuwe, ikis na habia meshu meranã”, aka

³ hatũ detetiya detenamenika dasibibu Ai anu hau bunũbũ, iwanã, 30.000 detenamenikabu katushũ meshu merã bebũkiri hau bunũbũ

⁴ Josué hatu yunukĩ: “Ea nĩka peirawakãwẽ. Ai hiweabu nũ hatu detenũbũ matu dukũ bui hatũ maewã petxiuri dapi huneshũ nuku manayushãkãwẽ.

⁵ Hanua hatũ maewã besuuria ea inũ nukunabube nũ kemai haskashinabu keskakĩ nuku detekatsi tashnibiranaibu hatu paraĩ pashai nũ txĩtũkiranaya ana uatiã nuku ashiã keska dabanẽ shinaĩ nuku detenũ ika hatũ mae anua kaĩbirãshãkanikiki.

⁶ Nuku txibaĩ haskabirã nuku ashiã keska wanũ ika hatũ maewã anua kaĩbiranaibũ nũ hatu ninikĩ akawãbirana nuku txibaĩ beaibu haska wakĩ parãkĩ hatũ mae anua nũ hatu iwekubirãshanaii. Nũ haskai Ai anuabũ uĩtã: ‘Haskashinabu keskai nukuwẽ datei ana kushibaĩkanikiki’, ika

⁷ nuku txibaĩ hatũ mae henebiranaibu hatu uĩtã nukũ mekenika Senhor Deusũ matu merabewaiwẽ taea mã hunea anua kushibirã hatũ maewã atxishãkãwẽ.

⁸ Hatũ maewã atxitã kuakĩ taewayushãkãwẽ. Senhor Deusũ hãtxa txibãkĩ hawẽ hãtxa ẽ matu yunua kaneama ashãkãwẽ”, hatu watã

⁹ yunukĩ Josué hatu nitxiã meshu merã hune bui Ai bari hikiaikiri anu Betel inũ Ai tsisumẽ huneshũ hatu beparaĩ bushũ habũ hatu manaibũ hakia Josué hawenabube niti ika ushashini

¹⁰ penaya bestẽtã detetiya hunibu detenamenikabu itxawashũ hawẽ shanẽ ibu beshmasbubetã hatu iyui mapekei

¹¹ Ai besusi nortekiria kematã napaku ewapa kesha betsauri peã shubu wabu

¹² meshu merã ha katxu ana 5.000 hunibu detenamenikabu katushũ huni betsabu yunushinabubetã hatũ maewã Betel inũ Ai namakis hau hune atxishanũbũ Josué haburi yunua

¹³ hatu paraĩ hatũ maewã nortekiri Israelĩ enabu detenamenikabu itxapa shabakabi manaibũ hatũ maewã bari hikiaikiria detenamenika betsabu hunea maniabũ dateama habias meshu merã Josué ha mesti bebui napaku namakis niti ika

¹⁴ ukeri shabakabi maniabu Ai shanẽ ibũ uĩbiakĩ petxiuri hune manabiaibũ unãriama penamahaira Ai anua huni dasibi bestẽtã Israelĩ enabu ana detenũ ika hawaira hatũ shanẽ ibube hatũ maewã besusi kaĩbirã

¹⁵ hatube detenamei taeaibũ Israelĩ enabũ hatu paraĩ datei keskai hanu tsua hiweabumakiri kushibainaibũ

¹⁶ hau hatu detekĩ txibanũbũ hawẽ maewã mishki kene meranua hatũ shanẽ ibũ huni dasibi kena Josué inũ hawenabu txibãkĩ Ai shanẽ ibũ hatũ maewã anua hatu iweaya

¹⁷ hatũ mae hikiti shui bepẽtã bepuama henebaĩkĩ Israelĩ enabu dasibibu txibaĩbuwẽ taea hatũ maewã anua Ai inũ Betel anua huni detenamenikabu tsuã hatu meketiru hayabumakẽ

¹⁸ hanushũ Senhor Deusũ Josué ana yuikĩ: “Ẽ mia atximaiwẽ taeshũ hanu niti itã mĩ hashiwẽ Aikiri metuwe”, aka hawẽ hashi sanãkĩ Aikiri Josué metua

¹⁹ huneshinabũ uĩtã hawaira beni kushibirani hikishũ hatũ maewã Ai atxitã txiwẽ kuakĩ taewaibũ

^20-21 Ai hunibu natsaukekauã hatũ mae kuĩ itxapa nai anu puebainai uĩ datei hani pashatirubuma Israelĩ enabu habu hunei bushiãbũ Ai ma atxishũ kuaibũ hawẽ kuĩ uĩtã Israelĩ enabu pashai bui txĩtũtã Ai hunibu detekĩ taewaibũ

²² Ai mae kuakĩ taewatã huneshinabu tashnibirãkĩ hatu deteriabiranaibũ hani pashatirubumakẽ nekeshuri inũ ukeshuri hatu dasibi detebaunabu tsua pashama tsua hiweama

²³ hatũ shanẽ ibu besti hiwemakĩ atxitã Josué anu iwenibukiaki.

²⁴ Hatũ maewã anua tashnibaĩ hatu txibãbainabu Israelĩ enabũ hatũ matxatu txaipawẽ Ai anuabu hatu detekĩ keyutã txĩtũbirã Ai anu hikishũ dasibi habu detebaunabu

²⁵ Ai anu hiweabu dasibi habiatiã dete keyuabu 12.000 huni inũ aĩbu mawai keyuabu

²⁶ Ai anuabu yamawakĩ keyuriabuma hawẽ hashi Josué sanãbainaya

²⁷ haska Senhor Deusũ Josué yuishina keska wakĩ hatũ mabu inũ hatũ inabu Israelĩ enabũ bikĩ ibuwakĩ keyunibukiaki.

^28-29 Hatũ mabu inũ hatũ inabu tashnimakĩ keyutã hau kuakĩ keyunũbũ Josué hatu yunua ana kuakĩ keyuabu dispiwẽ hau shanẽ ibu teneshnũbũ hawenabu Josué yunua hi anu dũtãkĩ Ai shanẽ ibu teneshabu bari hikiaya Josué hatu ana yunua hawẽ yura buteshũ hawẽ mae hikiti shui anu urẽtã hawẽ yuraki mishki ture mirima puta puta akĩ maspu wanibukiaki. Ai anu hiwe tibi ma di iki keyuni inũ mishki ture mirima maspu wanibu uĩpaketirubu natiã uĩriatiru hayaki.

Deusũ yunuti inũ hawẽ nemati Mati Ebal anushũ Josué hatu yuishunikiaki, na hãtxarã

³⁰ Deusũ hatu ana merabewaiwẽ taeshũ Mati Ebal anushũ hawẽ kẽwãti txi tapu Josué wakĩ

³¹ Senhor Deusũ tsuma Moisĩ Israelĩ enabu yunushũ hawẽ unãmati una merã kenekĩ: “Hawẽ mane tsatiwẽ mishki kerã wama hakia mishki kerãma besti mãtxĩkĩ hawẽ kẽwãti txi tapu hau apakeshanũbũwẽ”, ani keska wakĩ Josué haska txi tapu wakẽ Israelĩ enabũ ina awa inũ txashuwã itxapa tesẽshũ hawẽ kẽwãti inũ hawẽ daewati wakĩ habũ ina Senhor Deus menu keyushunabu

³² hanushũ txi tapu mishki mania tũku betsa betsapaki Moisĩ hatu unãmani hãtxa Josué sheshakĩ keneai Israelĩ enabũ uinibukiaki, na habias hãtxa Moisĩ hatu keneshunirã.

³³ Mati Gerizim inũ Mati Ebal namakis napaku anu Senhor Deus hatube yubakani hãtxa aruni bau ia Deusbe hawenabu hãtxashunikabu mapuabu hawenabu hau pepawanũbũ haska ha dukũ Moisĩ yununi keska wai Israelĩ enabu mae hirabi inũ, hatũ shanẽ ibubu inũ, hatũ shanẽ ibu beshmasbu inũ, pepabu inũ txakabubu unanikabu inũ, hawenabu kayabi inũ, yura betsa betsapa hatube hiwekubiranaibu hatu itxawatã hatu pashkakĩ hatiri Mati Gerizim bebũ hatiri Mati Ebal bebũ mapuabu uinanãrabekĩ nĩkaibu

³⁴ hawẽ unãmati hãtxa tibi Deusũ pewati hãtxa inũ Deusũ kupiti hãtxa Moisĩ unãmani una anua hãtxa kushipawẽ Josué dasibi hatu yuishũkĩ

³⁵ Moisĩ yunuti inũ hawẽ nemati hãtxa dasibi hawa heneama hunibu dasibi inũ aĩbu dasibi inũ bake mishtĩbu dasibi inũ nawa betsa betsapabu hatube hiweabu Josué hatu yuishunaya hawẽ hãtxa nĩkanibukiaki.