Josué 3 - Kaxinawá Bíblia (BR)

Hene Jordão pukenibukiaki, na hãtxarã

¹ ushashini penama Josué hawenabube bututã Sitim anua bui Hene Jordão pukeriama hene kesha anu niti itushitã hatũ tari hiwe ana pũtebaunabũ

² hanua shaba dabe inũ besti hatũ tari hiwe tibi anu buaketãkĩ hatũ shanẽ ibu beshmasbũ hawenabu

³ hatu yuikubaũkĩ: “Nukũ mekenika nukube yubakani Senhor Deusũ hãtxa aruni bau Levĩ enabu Deusbe nuku hãtxashunikabũ buaibu uĩtã nenua maturi bukĩ hatu txibãshãkãwẽ.

⁴ Hakia haskaira hatu dapihaira buama benãta duakabi bukĩ hatu txibãkubaĩshãkãwẽ, 1.000 metro niti ikubainirã. Hariri nuku iyuaibu hatu uĩtã hatu txibãkubaĩshãkãwẽ, hariri nuku iyuaibu ha bai mã unãmakirã”, hatu wakeakeaibũ

⁵ hanushũ hawenabu itxawashũ Josué hatu yuikĩ: “Meshukiri matũ besuubi Senhor Deusũ hawẽ kushipawẽ haskabiama wakĩ matu dami washũshanaiwẽ taeshũ Deuskiri besti shinaĩ pepa bestiyukãwẽ”, hatu watã

⁶ hatube ushashini bestẽkauã Deusbe hawenabu hãtxashunikaburi Josué yuikĩ: “Nukũ mekenika nukube yubakani hãtxa aruni bau iabaini nukunabu bebũ matu dukũ pukui taebaĩshãkãwẽ”, hatu wa ha hatube yubakani hãtxa aruni bau hi dabe haya hawẽ iabaini hatunabu bebushuni henekiri bui taeaibũ

⁷ hanushũ Senhor Deusũ Josué ana yuikĩ: “Minabu ẽ mia hatu kayati wamakĩ na habiatiã ẽ taewaii. Unuri mĩ shanẽ ibu kushipai ẽ mia ewawamabaĩkĩ hatu uĩmakubaĩshanaii. Haska ẽ Moisés merabewakubiranima keska wakĩ minabũ berubiri shanẽ ibu kushipa wakĩ mibe nishũ ẽ mia merabewakubaĩshanaii.

⁸ Ha dikabi ẽ matube yubakani hãtxa aruni bau ha hawenabu ebe hãtxashunikabũ buaibu hatu yunukĩ: ‘Hene Jordão kesha pukui taekaĩ hau niti ishanũbũ’, haska ea hatu yuishũwẽ”, aka habias hãtxa hatu yunutã

⁹ hawenabu itxawatã Josué hatu yuikĩ: “Senhor Deusũ hãtxa nĩkai eanu bekãwẽ”, hatu wa bea itxabu

^10-13 hatu yuikĩ: “Uĩkãwẽ. Mai hirabi hatũ dami wani hawẽ ibu hatube yubakani hãtxa aruni bau matu bebũ bebũkiri Hene Jordãokiri pukui bukanikiki. Ha bau iabaini bui Hene Jordão anu Deusbe matu hãtxashunikabu pukutanaibũ hene dami hamebi pashkai ha hene manãkiria kushibirani niti ika pes daka uĩkĩ Senhor Deus hiwea matube nia kakũkainai mã uĩshanaii. Hanushũ hatũ matu merabewakĩ Canaã nawabu inũ, Heteu nawabu inũ, Heveu nawabu inũ, Ferezeu nawabu inũ, Girgaseu nawabu inũ, Amorreu nawabu inũ, Jebuseu nawabu matũ berubi nitxĩkĩ hatũ mae tibi matu mebĩshũkĩ matu ibuwamashanai mã uĩshanaii. Haskakẽ mã shukua tibi anua huni bestitxai tibi katukãwẽ, 12 huni kushipaburã. Ebe buaibu daya betsa ẽ hatu yunushanaii”, hatu wa

¹⁴ hanushũ hatu haska washina hatũ tari hiwe pewaibũ hau Hene Jordão pukei bunũbũ hatu bebushũkaini Deusbe hatu hãtxashunikabu Deus hatube yubakani hãtxa aruni bau iabaini bui

¹⁵ heneki kematã ha habũ bau iabaini pukenũ ika hatũ tae pukuaibũ hanu hatũ yunu tsekatitiã hene bai matakĩ mai atxibirãmistiã ma iki hene bai matai kushipaya

¹⁶ hene dami hamebi pashkai niti iki detenamenikabũ mae kushipa Sartã dapi mae betsa Adã anu manãkiri txitei iã keskaya hanua hene maikiri netsubaini Ianẽwã Mar Salgadokiri bui netsui sha ibainaya Hene Jordão namakis Deus hatube yubakani hãtxa aruni bau ia niti ika mapuyuabũ bai mata netsui keyua mae Jericó besusi hene tashkanũ Israelĩ enabu hawaira kapukei pukebainaibũ

¹⁷ dasibi Israelĩ enabu pukei keyuriabumakẽ Deusbe hatu hãtxashunikabũ Deus hatube yubakani hãtxa aruni bau iashũ hene netsua tsusĩ namakis anu mapushũ hatu manayuaibũ