Jonas 1 - Kaxinawá Bíblia (BR)

Nínive anu Senhor Deusũ Jonas nitxĩkĩ yununikiaki, na hãtxarã

¹ Amitaĩ huni bake Jonas Senhor Deusũ yunukĩ yuikĩ:

² “Benitã Assíria nawabũ maewã ewapahaira Nínive anu katãwẽ. Txakabuhairakubainaibu ẽ uiaĩwẽ taeshũ txakabuwakĩ ẽ hatu yamawashanai hatu banabimatãwẽ”, aka

³ hawẽ yunua hãtxa nĩkakĩ txibãkatsi ikama Senhor Deus anua pashai Társis anu kanũ ika ianẽwã ewapa kesha anu bai butua mae hawẽ kena Jope anu Jonas ka shashu ewapa Társiskiri kai betxitushitã hawẽ pashai kanũ ishũ peiwẽ pakatã Senhor Deus nĩkama patapakaini txaihaira Társis anu kanũ ika shashu ewapa merã inatã ma kaya

⁴ hakia niwe kushipahaira Senhor Deusũ yunua bekĩ ianẽwã betxuruwãbirãkĩ hene buspu tsaubirãkĩ shashu ewapa hashka hashka akaitũ besuaya

⁵ habu shashu bunikabu datehairakĩ hatũ mekenika yushĩ tibibũ hau hatu merabewanũbũ yukakĩ hanushũ shashu shãkawakĩ mabu itxapa buaibu ianẽwã merã urẽkĩ puku keyuaibũ habiatiãri shashu uke merã hanu mabu aruti anu hikikaĩ Jonas usha txakayama dakakẽ

⁶ hanushũ shashu bunikabũ shanẽ ibu Jonas anu kashũ bestẽwãtã yuikĩ: —Miarã, haskai mĩ hanu hua dakamẽ, ushabuũ? Benitã hau nuku merabewakĩ mekenũ mĩ mekenika yushĩ nuku yukashũwẽ. Nukuwẽ nuitirumẽkaĩ, nũ hasayamanunã— aka

⁷ habiatiãri shashu bunikabu yuinamei: —Tsua txakabukirani huawẽ taeshũ nuku akimẽkaĩ. Hawẽ hamapai unãti shau meshte númeroya putanãkãwẽ, tsuki tashnimẽkainã?— iwanã, unãti putabu Jonas txakabukirana haki tashniai hatu unãma

⁸ habũ Jonas yukakĩ: —Mĩ haskakirãshũ niwe txakabu nuku anu bemashumẽ? Nuku yuiwe! Mĩ hawa daya haya kai ikai? Hania mĩ huamẽ? Mĩ maerã, haratumẽ? Mĩ tsua nawamẽ?— akabu

⁹ Jonasĩ hatu kemakĩ yuikĩ: —Ẽ Hebreu nawaki. Nai anu hiwea Senhor Deusũ ianẽwã ewapa inũ mai hirabi dami wanitũ ea tsumawani dayashũkĩ ẽ kẽwãmiski.

^10-11 Ea haska wabiani hawẽ yunua ashuãma Senhor Deus anua ẽ pashai ikaii— hatu wa hawẽ hãtxa nĩkaibũ hanua ianẽwã ana tũkash tũkash itxakayamaya uĩ datetxakayamakĩ Jonas yukakĩ: —Haskai hawẽ yunua txibãma mĩ nuku haska wamai ikai? Ianẽwã hau mainũ nũ mia haska watirumẽ?— akabu

¹² Jonasĩ hatu kemakĩ yuikĩ: —Ianẽwã merã mã ea pukuaya ibubis maĩkiki. Ẽ txakabuwẽ taea matu anu niwe birenepa beshu ẽ unãhairaii— hatu wa

¹³ hawẽ hãtxa nĩkama maĩ shashu keti anũ, iwanã, haimãwẽ tuẽ txakayamabiabu ianẽwã ana tũkash tũkash itxakayamaiwẽ taea hawa keti atirubuma

¹⁴ hanushũ habũ Senhor Deus yuka txakayamakĩ yuikĩ: —Senhor Deusuũ, ha hunĩ txakabuwẽ taeshũ nũ hasayamanũ nuku tenãyamawe. Ha huni hawa txakabu hayamakẽ Senhor Deusuũ, haska mĩ akatsis ikai mĩ akubaĩmiswẽ taeshũ ha huni hasai mawakẽ nuku kupiyamashãwẽ—

¹⁵ atã ianẽwã anu Jonas putaibũ samama ianẽwã betxuruni maiãyã

¹⁶ uĩtã shashu bunikabu Senhor Deuski datehairakĩ hawẽ daewati inãkuĩ inãtã haskai pe hiweti Senhor Deus yubaibũ

¹⁷ hakimamari Jonas bakawã itamamahaira Senhor Deusũ dami wani yunua hushũ Jonas sheashina shaba dabe inũ bestitiã inũ meshu dabe inũ bestitiã kaya Jonas dakashũ