Joel 1 - Kaxinawá Bíblia (BR)

Mibã shinĩ txakabu wakĩ yamawashanikiaki, na hãtxarã

¹ Petuelĩ huni bake ẽ Joel na kaka Senhor Deusũ ea hatu yusĩmaniki.

² Anibu unanepabu inũ nukũ mai pakea anu mã dasibi hiwebaunabuũ, na hãtxa ẽ matu yuiai nĩka peirawakãwẽ. Na txakabu haska huai tenekĩ mã memis keskama ma hayaki. Habias matũ epabu inũ matũ shenipabũ haska ikai uiãma ipaunibuki.

³ Haska ẽ matu yuiai natiã ikairã, matũ bakebu dukũ hatu yuikubaĩkãwẽ. Hanushũ habũri hatũ bakebu haska mã tenekubaini hau matukiri yuiriakubaĩshanũbũwẽ. Hanushũ txipu hatũ bakeri kaĩriaiburi hau habias hatu yui heneyamanũbarinũbũwẽ.

⁴ Shini beshũ yunu inũ, basi inũ, mibã sharabu pei pikĩ keyukĩ henebainaibũ hatiri shini betsa ana bekĩ ha teshe wabaĩshinabu keyuhairakĩ ma yamawashinabuki.

⁵ Mã paenawãbuũ, bestẽtã uĩkãwẽ. Uva bimi hene ma pema pema akaibu matu mebĩshanaibuwẽ taea vinho anikabuũ, kasharikãwẽ.

⁶ Detenamenikabu kushipa mirima keska shiniwanã, inu betsa leão bene sheta keska inũ leão yushã makushpia keskayatũ dasibi ẽ mai pakea hirabi ma atxi keyuabuki.

⁷ Nukũ uva bai nishi txakabuwakĩ keyukĩ nukũ mibã hi figueira senu senu akĩ hawẽ pei inũ hawẽ bitxi daxpikĩ hawẽ mebi metash wakĩ hushu datãbaĩshinabuki.

⁸ Hamẽ betsarã, beneyakatsi habe yubakaima ma mawakẽ nui tari besha sawea bis bis iki kashakũkaini keskai

⁹ ẽ kẽwãti hiwe Templo anushũ Senhor Deus kẽwãkĩ inãkuĩti shekiwã trigo duru inũ uva vinho ana hayamawẽ taea nukunabu Deusbe nuku hãtxashunikabu ma kashakubaĩkanikiki.

¹⁰ Yunu bai dasibi hawa hayama shaba besti dakaki, mai besti pes daka kashai keskarã. Shekiwã trigo shiniwanẽ pikĩ ma keyukĩ benuabuki. Uva nishi bana ma shanai keyuaki, hawa betsa taska besheamarã. Oliva hi pei dasibi ma pashĩ keyua dakariaki.

¹¹ Mã dayakapa bai anu dayanikabuũ, matũ uva bana inũ matũ shekiwã trigo inũ cevada bai anu mã banamis matũ mibã dasibi ma benui keyukẽ mã hania ana tsekatimawẽ taea punu nuka kashakubaĩkãwẽ.

¹² Uva nishi dasibi shanai keyua figueira mibã hi shanai hawẽ pei niri iki keyui hawẽ bimi ma benuaki. Bimi batapa maçã inũ, banĩ inũ, bimi betsa bai anua hi bimiya dasibi ma shanai keyuawẽ taea haska keskariai yura dasibibũ hatũ benima pae ma benukĩ keyuriabuki.

¹³ Matu mã nukunabu Deusbe hãtxashunikabuũ, Senhor Deus kẽwãti hiwe Templo anu dayakĩ shekiwã trigo duru inũ uva vinhowẽ nukũ mekenika Deus hawẽ txi tapu anushũ mã ana inãkuĩtirubumaki. Haskawẽ taea matũ tari pepa pekatã nui tari besha sawetã nuitxakayamai kasharikubaĩkãwẽ.

¹⁴ Anibu unanepabu inũ nukũ mai pakea anu hiwebaunabu hatu yuikãwẽ. Nukũ mekenika Senhor Deus kẽwãti hiwe Templo hemaĩtĩ anu itxatã samakekĩ hanushũ merabe Senhor Deus yukashãkãwẽ.

¹⁵ Ma pemahaira huaya nũ peirakãwã! Senhor Deusũ hanu kupishanai ma kemaikiki. Shaba mesehairatiã nuku dasibibu unãti wakĩ kushipa dasibi binu keyuatũ hawẽ kupitiwẽ yamawabaũshanikiki.

¹⁶ Nukũ berubi nukũ piti dasibi nuku mebiaĩbũ nukũ mekenika Deus kẽwãti Templo hemaĩtĩ anua hawa benimati hayama ma keyukũkainikiki.

¹⁷ Mai sheshakĩ kerãwãbaĩshũ ha shekiwã trigo heshe banakĩ sa abiabu beneama mawai benui keyuaya hanu aruti dĩtu tibi di akĩ ma keyuabuki.

¹⁸ Hamẽ ina awã hatũ basi benai maã maã ikaibũ habiaskariai txashuwã shukuabu mawakubaĩkanikiki.

¹⁹ Senhor Deusuũ, pemakĩ hui kushipawẽ mĩ merabe ẽ mia yukaii. Hanu tsua hiweabuma anua basi inũ nukũ bai anua txiwẽ hi kuakĩ ma keyuabuki.

²⁰ Ha dikabi pashku ma netsui tashkai keyukẽ txiwẽ hatũ basi menui keyukẽ yuinaka inabumã mia yukariakanikiki, hau mĩ hatu merabewanunã.