João 5 - Kaxinawá Bíblia (BR)

Betesda kesha huni isĩ tenei babuni Jesusũ shushawanikiaki, na hãtxarã

¹ Galiléia anushũ Jesusũ huni bake shushawaima ana betsatiã Jerusalém anushũ judeubũ hatũ beya betsa txibaĩ besi nawaibu anu Jesus ana txĩtũkaini kakĩ

^2-4 hanushũ Jerusalém mae mixkiwẽ kenebaunibu hanu hikiti shui hawẽ kenarã, Txashuwã Kaĩtirã, ha dapi hanu ũpash uke merã habai anu mixki pukĩnibu anu ũpash tsauwa hawẽ kenarã, Betesdarã, hanu utai huĩrukũmisbu anu cinco utati anu bekũbu inũ, tiribu inũ, meyuxkibu inũ, isĩ betsa betsapa tenei maniabu anu mixki pukĩnibu ũpash mata nai tsumã xubimaya: “Ea dukũ ka ẽ pukua ẽ shushatiruki”, iki maniabu anu

⁵ huni betsa 38 ano bari ka hawẽ yura babuni

⁶ daka Jesusũ betxituxitã bari itxapa ka isĩ teneai unãkĩ yukakĩ: —Mĩ yura shushai mĩ ana kuxipakatsis ikai?— aka

⁷ —Haa, Shanẽ Ibuũ. Hakia nai tsumapã hene xubimai anu tsuã ea bakebaĩ pukutimakẽ ẽ unãshubira kaya isĩ teneai betsã ea maemai binukaĩ habu dukũ pukukubaĩmisbuki— aka

⁸ hawẽ nuikĩ shushawanũ, iwanã, Jesusũ yuikĩ: —Haskakenã, benitã mĩ dakati iabaini kariwe— aka

⁹ hawaira hawẽ yura dakuxi kayatã benikawã sábado huĩrukũtitiã dayatimabiakẽ habiatiãri hawẽ dakati iabainaiwẽ taeshũ

¹⁰ judeu shanẽ ibubũ yukakĩ: —Haskakĩ huĩrukũtitiã mĩ dakati iabaĩkĩ Moisés nuku nemani mĩ txibãma kaneai?— akabu

¹¹ —Ea shushawashutũ yunukĩ: “Mĩ dakati iabaini kariwe”, ea wa ẽ kai ikaii— hatu wa

¹² —Tsuã mia haska yunushumẽ?— akaibũ

¹³ hanu itxabu anu Jesus hawaira naxui ikawẽ taeshũ hatũ shushawashu unãma harakiri hawa hatu yuitima nibai kakẽ

¹⁴ txipu Jesus Templo hemaĩtĩ anu haki ana nukushũ yuikĩ: —Uĩwẽ, ikis ẽ ma mia shushawashuki. Haskakẽ txakabu xinãkĩ Deusũ hãtxa ana kaneyamashãwẽ, mĩ ana hamapai betsa kaneairã, hawara txakabuhairawẽ mĩ ana pikutirukirã— aka

¹⁵ ha huni haska wa kashũ judeu shanẽ ibubu hatu yuikĩ: —Na ẽ shushashu mã ea yukarã, Jesusũ ea akakiaki— hatu wa

¹⁶ huĩrukũtitiã Jesusũ shushawawẽ taea haki sinatakĩ judeu shanẽ ibubũ Jesus danãkĩ yuaĩbũ

¹⁷ hatũ hãtxa nĩkatã Jesusũ hatu yuikĩ: —Ẽ Epa Deusũ hatu merabewai dayakũkaĩmiski. Eari habiaskariai ẽ dayariakũkainaii— hatu wa

¹⁸ nĩkatã hune judeu shanẽ ibubu yuinamei: —Sábado huĩrukũtitiã yununi kaneai bestimaki. Txakabu betsa wariai hamebi Deus keskakatsis ikĩ yuikĩ: “Deus ẽ Epaki”, ikĩ yuiriaikiki— ikaiwẽ taea haki sinatahairakĩ Jesus tenãkatsis itxakayamaibũ

Hawẽ Epã Jesus hawẽ kuxipa inãnikiri yusĩnikiaki, na hãtxarã

¹⁹ Jesusũ ana hatu yuikĩ: —Txanima ẽ matu yuiaii. Deusũ bakẽ hawẽ xinãnẽ besti haska atirumaki. Hakia hamapai xarabu Epa Deusũ akai uĩkĩ habiaskari wakĩ hawẽ bakẽri ariatiruki. Haskakẽ Epa Deusũ xinãnẽ ea hawẽ bakẽ ẽ ariaii.

²⁰ Haska inũ, Epa Deusũ hawẽ bake abukĩ dasibi akĩ uĩmamiski. Haska inũ, ana kuxipahairawẽ dami atimaska betsa betsapa hawẽ bakewẽ matu uĩmaya uĩ mã e ikũkaĩshanaii.

²¹ Haska inũ, ẽ Epa Deusũ mawabu hiwemamiski. Habiaskari wakĩ hawẽ bakẽri tsuabura katutã hatu hiwekuĩmariatiruki.

^22-23 Haskawẽ taeshũ tsuara Epa Deusũ unãti waismaki. Hakia hau dasibibu hawẽ bakẽ hatu unãti washanũ hawẽ kuxipa inãni hayaki. Haskawẽ taeshũ habias Deus kẽwãmisbu keska wakĩ hawẽ bakeri hau kẽwãshanũbunã. Tsuabũra hawẽ bake ma yununi kẽwãbumarã, haskatã hawẽ Epari kẽwã kayabitirumaki.

²⁴ Txanima ẽ matu yuikubainaii. Tsuãra ea nĩka pewai hawẽ hiwea txakabukiri kai beshteketã hatũ ea yununiri ikũwaĩ hiwekuĩkanikiki, ikisrã. Bikawẽ unãti wama mawa kayabi tenemama hiwekuĩaĩbu txakabuwẽ nũ kupiama ishanaii.

^25-26 Txanima ana ẽ matu yuiaii. Ẽ Epa Deusũ hawẽ hiwemati kuxipa hamebi hayatũ habias ea inãniki. Haskakẽ hanu bari hawẽ heneaitiã mawabũ ẽ hui nĩkatã besteĩ ana hiweshãkanikiki.

²⁷ Ẽ matũ Hutxi Kayabi Iuwawẽ taeshũ dasibi unãti kuxipa ẽ Epa Deusũ ea yunurianiki, eã ẽ hatu unãti wakeakeshanunã.

²⁸ Na haska hãtxa ẽ matu yuiai nĩkatã e iyamakãwẽ. Haskashanai matu yuinũ nĩkakãwẽ. Mawanibu dasibi ẽ hui kuxipawẽ ẽ hatu kena nĩkatã

²⁹ mai anua hanira hatu maiwanibu tashnibirãshãkanikiki. Pepabu hiwekuĩaĩbũ habu txakabumisbu ana bestẽbiatã ana hawẽri kai bika tenehairai ikibi ishãkanikiki— iwanã,

Jesusũ ibubis hawẽ xinãnẽ aki huama inikiaki, na hãtxarã

³⁰ Jesusũ shanẽ ibubu hatu nĩkamakubaĩkĩ yuikĩ: —Earã, ibubis e iskaũ ẽ xinãnẽ ẽ ikamaki. Hakia haska ẽ Epa Deusũ ea yunuai besti nĩkatã ẽ akubainaii. Haska hawẽ pepa ea katumairã, ẽ haska xinaĩwẽ ẽ akama hakia haska ẽ Epã ea yununitũ abuai haska yunuaya unãti wakĩ ẽ ashũkubainaii, kaneamarã.

³¹ Emebi ẽ keãyanã, ẽ hãtxa txani ikeanaii.

³² Hakia tsuabũra ekiri unãti watã ea kẽwaĩnã, hawẽ hãtxarã, pepaki, haska unaĩnã.

³³ Naximanika João Messiaskiri mã yukatanima txanima hakiri matu yuimaki.

³⁴ Hau tsuabũra mã ea kẽwãshanũbũ, iwanã, ẽ haskakiri xinãmaki. Hakia hanu kupiaitiã Deusũ hau matu kupiyamashanũ na kaka pepa ẽ matu yuiai nĩkatã mã benuama ishanaii.

³⁵ Haska inũ, João bĩ ewapa dekua hi ikĩ txashawa keskashũ matu yusĩaĩ nĩkai ushe eskarabes hawẽ yusĩa abui mã benimakũkainimaki.

³⁶ Hamẽ Epa Deusũ ea yununirã, hawẽ kuxipawẽ dami atimaska wakĩ ẽ matu uĩmaiwẽ taeshũ mã ea unãti wakĩ tapĩtirubuki, Deusũ ea yununirã. Haskakẽ ekiri hawẽ unãmati hãtxa Joãonẽ matu yusĩmaki. Hakia eãnã, atimaska betsa betsapa wakĩ haska Joãonẽ aisma akĩ ẽ binuaiĩ.

³⁷ Ha inũ, Deus mã uĩyama inũ hawẽ hui mã nĩkaismabiakẽ habiatũri ea yununitũ ea unãkĩ hawẽ hãtxa hatu kenemani anushũ ekiri hatu yuini mã uĩkubaĩmiski.

³⁸ Hakia matu anu Epa Deusũ ea yununi mã ea uĩkĩ ikũwãmawẽ taea habiaskari wakĩ hawẽ hãtxa uĩkĩ xinaĩ ha txibaĩ mã hawẽ hiweabumariki.

³⁹ Haskakẽ matunã, ha txibaĩ hiwei ikibi iti hãtxa kenenibu betxinũ, iwanã, Deusũ hãtxa yuishunikabũ kenenibu anua mã benakubaĩmiski. Hakia habias kenewẽ ekiri yuinibu uĩbiakinã,

⁴⁰ haskawẽ taea matũ ea ikũwãtã hiwekuĩkatsi ikama mã ea danaiĩ.

⁴¹ Hawara pepa ekiri yuiaibu besti ẽ nĩkakatsi ikamaki, yurabũ hãtxawenã.

⁴² Hamẽ eãnã, ẽ matu unaiĩ, Deus nuimis keska hayama mã ikũkainairã.

⁴³ Epa Deusũ kuxipaya ẽ hubianikẽ xinã betsatã mã ea nĩkamaki. Hakia huni betsa hamebi kẽkĩ yuiai nĩkakĩ mã txibãmiski.

⁴⁴ Haska inũ, matũmebi ibubis mã yurabu kẽwãma bestikatsis imiski, ha besti Deus hatu kẽwãmamarã. Haskawẽ taeshũ mã ea ikũwãtirubumaki.

⁴⁵ Haska inũ, Deus bebũ nishũ ẽ matu ha ashanai xinãyamakãwẽ. Hakia matũ yusĩnã pehaira Moisés mã ikũwaĩ hatũri matu ha ashanai xinaĩ hakimayamashãkãwẽ.

⁴⁶ Ha inũ, Moisés ekiri keneniwẽ taeshũ Moisés hãtxa ikũwãkĩ mã ea ikũwãriakeanaii.

⁴⁷ Hakia haska hatũ keneni ikũwãkĩ mã txibãmarã, ẽ hãtxari mã ikũwãtirubumariki— hatu waniki.