Jó 42 - Kaxinawá Bíblia (BR)

Deusũ unanepakiri Jó shabakabi ana tapinikiaki, na hãtxarã

^1-2 hanushũ Jó Senhor Deus kemakĩ yuikĩ: “Hamapai sharabu unã keyukĩ dasibi mĩ haska akatsis ikai mĩ atiru betsã atirumarã, ma ẽ mia unaiĩ.

³ Ẽ hawamahairabia haska mĩ betxipaimis keska mĩ amis nĩka pewariama ẽ hãtxashinaki, haska ẽ hawa unãmahairabiatũ mia uĩmairã. Kushipakĩ haska dami betsa betsapa pepa mĩ akubaĩmis tapĩkĩ nĩkariama ẽ mikiri hãtxashinaki.

⁴ Deusuũ, miã ea yuikĩ: ‘Ẽ mia hãtxa wai ea nĩkawe. Ẽ mia yukai ea kemariwe’, akĩ mĩ ea yuishuki.

⁵ Uatiã mikiri yusiaĩbu nĩka bestikĩ haska bestiwẽ ẽ mia unãkubaĩshinaki. Hakia natiã ibubis miki nukutã ẽ beruwẽ ẽ mia uiaiĩ.

⁶ Haskawẽ taeshũ hawara mikiri ẽ yuishina ana shinãma ẽ yamawakatsis ikaii, hau mĩ ekiri haska ana shinãyamanunã. Na habiatiã mai kuru inũ txi mapu anu tsaushũ mikiri ẽ ana shinã betsa wakĩ taewaii”, akaya

Deusũ Jó duawakĩ ana hawẽ hamapai inãnikiaki, na hãtxarã

⁷ Jóbe hãtxakũkaini keyutã Senhor Deusũ Elifazri yuikĩ: “Ẽ tsuma Jó akubirãshina keskama ekiri txanima hãtxa mã yuiamawẽ taea mia inũ mĩ haibu dabeki ẽ sinatahairaii.

⁸ Haskawẽ taeshũ na habiatiã 7 ina awa bene inũ 7 txashuwã bene katushũ ẽ tsuma Jó anu butãkãwẽ. Mã ha bushuã Jó ea daewakĩ matũ inabu tesẽshũ txiwẽ matũ ina hirabi matu kuakĩ keyushũtã Jó matu merabewakĩ ea matu yukashunaya ẽ matu itxakawama ishanaii. Ẽ tsuma Jó hãtxa txanima yuishina keska wama haska mã betxipaiai keska mã ekiri hãtxa txakabubiashĩkẽ ẽ matu kupiama ishanaii”, aka

⁹ hanua Elifaz Temã anua inũ, Bildade Suá anua inũ, Zofar Naamá anua bushũ haska Senhor Deusũ hatu yunua ashuãbu Jó Senhor Deus hatu yukashunaya Jó yukai Senhor Deusũ nĩkashunikiaki.

¹⁰ Hanushũ hawẽ haibu dabe inũ besti Jó hatu yukashũkĩ meneaya Senhor Deusũ haska Jó pepawa hiwekũkainima keska ana duawakĩ hawẽ yura shushawatã uatiã hayakũkainima keska wakĩ ana dabeki hawẽ hamapai Jó inãnikiaki.

¹¹ Hanua hawẽ betsabu dasibi inũ, hawẽ puibu dasibi inũ, hawẽ haibuaibu dasibi inũ, hatube hãtxanamekũkainima dasibibũ Jó itxabirã uĩ beshũ hawẽ hiwe anua habe besikĩ Jóbetã piti itxapa pikĩ haska atimapa txakabu betsa betsapa Senhor Deusũ inãkĩ tenemakubainimawẽ taea hawẽ nuihairakĩ merabewakĩ daewakĩ bestibu tibitũ hatira pei heshe karu inũ ouro mane meitxikiti Jó inãnibukiaki.

¹² Hanua Jó anibui bari itxapa hawẽ henei hiwekũkainaya haska uatiã duawani binumakĩ dabeki keska Senhor Deusũ Jó ana duawakubaina hawẽ txashuwã 14.000 inũ, 6.000 camelo inũ, 1.000ti dabebaĩbaina ina bene hau ana pubeãma pe dayakubainũbũ hawẽ hubu hatu meshtemamis inũ, 1.000 jumenta yushã Jó hayakũkaini

¹³ ha dikabi ana huni bake 14 inũ aĩbu bake 3 hatu ana bawarianikiaki.

¹⁴ Hanushũ hawẽ aĩbu bake iyua kenakĩ: “Jemimaki”, atã ha katxu hawẽ aĩbu bake kenakĩ: “Queziaki”, atã hawẽ aĩbu bake hawẽ henea kenakĩ: “Quéren-Hapuqueki”, akĩ kenani

¹⁵ mai hirabi anua aĩbu betsabu hawẽruahairabiabũ Jó aĩbu bakebũ hatu binunibukiaki. Hanushũ Jó hawẽ mabu haska haya pashkashũkĩ hawẽ aĩbu bakebu inũ hawẽ huni bakebu ma ewabuwẽ taeshũ mabu inũ inabu inũ hawẽ tsuamabu itxapa Jó hatu inãkĩ ibuwamatã

^16-17 hatu haska watã ana 140 ano hiweyukũkaĩkĩ hawẽ bababu inũ, hawẽ bababũ bakebu inũ, hawẽ bababũ bababu hatu uĩkubaini mestebuhairai unanuma Jó mawanikiaki.