Jeremias 6 - Kaxinawá Bíblia (BR)

Senhor Deusũ hãtxa Israelĩ enabũ nĩkama ikubiranibukiaki, na hãtxarã

¹⁶ Israelĩ enabu Senhor Deusũ ana hatu yuikĩ: “Bai shesha dabe anu kai niti ishũ uĩkãwẽ. Haratu bai hashu pepa matũ shenipabũ unanibu hatu yukakãwẽ. Ha bai pepa betxitã hawẽ kai hanu matũ yushĩ huĩrukũshanai anu mã haki nukushanaii”, ẽ matu wabia matũ ea kemakĩ yuikĩ: “Haskamaki. Ha baiwẽ nũ ana kakatsi ikamaki”, mã ikaya

¹⁷ Senhor Deusũ hawẽ uinika matu washũtã hatu nitxĩtã Israelĩ enabu yuikĩ: “Matuki sinataibu beaibu matu unãmakĩ ha uinikatũ hawẽ trombeta txã txã akaya nĩka besti mapuyamakubaĩshãkãwẽ”, hatu wa hakia ha hunibũ kemakĩ ea yuikĩ: “Hawẽ unãmati nuku haskawẽ txaniai nũ ana nĩkakatsi ikamaki”, ikaibũ

¹⁸ haskaibuwẽ taeshũ Senhor Deusũ nawabu yuikĩ: “Enabu Israelburã, haska ẽ hatu ashanai mã unãshanũbũ matu yuinũ ea nĩkakãwẽ.

¹⁹ Mai hirabi anu hiweabuũ, ea nĩkairakãwẽ. Ẽ yunuti hãtxa inũ ẽ nemati hãtxa danãkĩ ẽ hãtxa ẽ hatu yuikubirani hawa tapĩsbumawẽ taeshũ hawara habũ betxipaisbuma txakabu atimapa hatu anu ẽ yunushanaii. Habu yubakai peama huni txakabu yubakamisbu keskai atimapanibuwẽ taeshũ hatũ txakabu hakimakatsis ikama ẽ hatu itxakawashanaii.

²⁰ Sabá mai pakea anua sheni ininipa inũ mai pakea betsa txaikea mibã hua inĩhaira haskakĩ mã ea beshũmisbumẽ, ea benimawanũ, iwananã? Ea duawanũ, iwanã, ẽ txi tapu anushũ inabu mã ea menushũmisbu inũ hawẽ sheni mã ea kuashũmisburã, eã ẽ ha ana betxipai hawẽ benimamaki”, iwanã,

²¹ haskawẽ taeshũ Senhor Deusũ ana yuikĩ: “Huti ikaĩ hau di ikubaĩshanũbũ mishki keska hawara txakabu hatu bebũ ẽ datã hatũ ibubu inũ, hatũ huni bakebu inũ, hatu dapi hiweabu inũ, hatũ haibuaibu di iki habiaswẽ mawashãkanikiki”, iwanã,

Nortekiria detenamenikabu itxapahaira bekĩ hatu atxishãkanikiaki, na hãtxarã

²² Senhor Deusũ ana yuikĩ: “Txaihaira mai pakea betsa nortekiria nawa shukua betsa kushipa betsahairabu benũ, iwanã, hatũ detenameti pewakanikiki.

²³ Pia mirimaya inũ hatũ matxatu txaipa kenuhairaya bei, tsuawẽ nuisbuma pubẽhairabu, ianẽwã buspu tsaubiranai keskai sai sai ikubirani cavaloki katsaumebirãshãkanikiki, Davĩ mae Sião detetã atxinũ ika beirã”, hatu wa

²⁴ Jerusalém anushũ yurã kaianẽ yuikĩ: “Mesehaira beai uatiã nũ nĩkashinaki. Datei punu nukai nũ ana hawa kushipa hayamaki. Aĩbu bake kaĩ isĩmis keskai itimaskai nũ isĩ tenehairaii.

²⁵ Nukuki sinataibu hatũ detenametiya mae tibi anua mese meseaibuwẽ taea matũ bai anu ana tashnibaĩyamakãwẽ! Hamapai bai tibiwẽ ana mapuyamakãwẽ!” ikaibũ

²⁶ eã hatu yuikĩ: “Mã ẽ mae ẽ matu betxipaiairã, mã ea peirashũshãkãwã. Detekĩ yamawanũ ika nuku anu bei hawairabirãshanaibuwẽ taeshũ hawẽ bika teneai uĩmati tari besha sawetã txi mapu dapusheketã matũ huni bake bestitxai mawakẽ mã kashai bis bis itiru keskai kashahairakubaĩkãwẽ”, ẽ hatu waya

²⁷ hanushũ Senhor Deusũ ea yuikĩ: “Enabu mĩ hatu unãti wakubaĩshanũ ẽ mia yunuaii. Haska ẽ hatu yunua ikaibu haskara hatũ shinãmẽkaĩ, uĩkĩ ea hatu unãtihaira washũshãwẽ”, ea wa

²⁸ eã kemakĩ yuikĩ: “Senhor Deusuũ, ha dasibi yurabunã, tsuã nĩkaisbumaki, Yuananaĩ atimapai hiweabuki. Hatũ shinã kushihairabuki, mane bronze inũ due keskaburã.

²⁹ Chumbo hawẽ detsis bikatsi txi hi akĩ kukatsa akĩ kuahairatã hawẽ tane bemakis nunua bewetã urẽkĩ chumbo has wamisbu keska wakĩ hatu bika tenehairamakĩ mĩ hatu pewapanã hatũ txakabu putaisbumaki.

³⁰ Senhor Deusuũ, mĩ ma hatu putawẽ taeshũ minabu hatu metukĩ yuikĩ: ‘Prata detsisya danãmisbu keskabuki’, akĩ hatu kenakubaĩshãkanikiki.”