Jeremias 52 - Kaxinawá Bíblia (BR)

Senhor Deus kẽwãti hiwe anua hawẽ mabu bitã hiwe kuanibukiaki, na hãtxarã

¹² Nabucodonosor Babilônia shanẽ ibuhairakũkaini ha shaba 10 inũ, ushe 5 inũ, ano 19 kaitiã Babilônia shanẽ ibu beshmas hatũ shanẽ ibuhaira mekenikabu yununika Nebuzaradã hawẽ detenamenikabu itxapabube Jerusalém anu ana bei hikitushitã

¹³ Senhor Deus kẽwãti hiwe inũ, shanẽ ibuhairatũ hiwe hawẽrua inũ, dasibi yununikabũ hiwe ewapa hawẽrua tibi inũ, dasibi mae anu hawẽ hiwemisbu tibi txiwẽ kuakĩ keyukĩ

¹⁴ hanushũ habiabũri Jerusalém mishki kenebaunibu berãkĩ di aki dayahairakũkaĩkĩ atimas di akĩ keyuaibũ

¹⁵ Jerusalém anu habu nuitapaibu bashikuimabu inũ, habũ Babilônia shanẽ ibuhairatũ yunua txibaĩmabu inũ, mabu wanikabu tesheimabu Nebuzaradãnẽ hatu itxawashũ Babilônia anu hau hatu ana iyunũbũ hawẽ detenamenikabu itxapabu yunua Babilônia anu maĩ hatu iyuaibũ

¹⁶ hanushũ hau habũ uva bai inũ yunu bai dayakĩ hau mekekubaĩshanũbũ nuitapahairaibu besti hatũ mae anu Nebuzaradãnẽ hatu ana bashinikiaki.

¹⁷ Hatu haska wariamarã, Caldéia nawabu detenamenikabũ Senhor Deus kẽwãti Templo anua hawẽ mabu Babilônia anu bukatsi itxawashũ hawẽ bronze mane txibu keyatapa dabe inũ, haki txibu tsaũrabenibu inũ, hawẽ bronze mane ũpash aruti ewapahaira teke teke atã

¹⁸ hanushũ habu bukatsi haki txi mapu beamisbu inũ, hatũ pá inũ, hatũ bĩ pahi meshteti tsisura inũ, kẽtxa ewapa inũ, beati ewapa, dasibi bronze mane mabu betsa betsapa hawẽ Deus kẽwãti hiwe Templo anua haya itxawakĩ keyuabũ

¹⁹ hanushũ hatu yunubiakĩ hawẽ shanẽ ibuhaira mekenikabu yununika Nebuzaradãnẽ hatubetã ouro mane mabu inũ, prata mane mabu dasibi, haki mepanuti inũ, kẽti inũ, kẽtxa ewapa inũ, haki txi mapu beati inũ, bĩ haki tsaũti inũ, beati betsa inũ, kẽtxa pishta hawẽ Deus kẽwãkĩ vinho haki hushketã amisbu itxawashũ bunikiaki.

²⁰ Ha Senhor Deus kẽwãti hiwe anu hawẽ bronze mane txibu dabe inũ, ha bronze txibu haki mistuti dabe watã haki tsaũnibu inũ, haki ũpash manekĩ mata wati bronze turuakea ewapahaira inũ 12 ina awa bene bronze dami kekũbaunibuki ũpash matawati hau anũbũ shanẽ ibuhaira Salomãonẽ hatu yunua anibu hawẽ shãkama haska washũ tsuã tanatiruma

²¹ ha bronze mane txibu tibi hawẽ keyatapa 8 metro binua inũ, hawẽ ewapa iakea 5 metro ana namakis inũ, uke merã hawẽ nashui inũ hawẽ keshtu 7 centímetro haska hatu amani txakabuwanibukiaki.

^22-23 Ha txibu masua tibiki mane bronze maiti hawẽrua hawẽ keyatapa 2 metro binua matxuramea hawẽ kesukauna anu 100 mane bronze hi bimi dami wakĩ hawẽrua washũ kerũtãbaunibu hakia 96 hi bimi dami shabakabi uĩtirubu wanibukiaki, ha dabe haska dabes wakinã.

Babilônia anu Judá enabu ana hatu iyukĩ keyunibukiaki, na hãtxarã

²⁴ Shanẽ ibuhaira mekenikabu hatũ yununika Nebuzaradãnẽ hatũri hawẽ detenamenikabu yunukĩ Jerusalém anu yurabu bashikunibu hatu iyukatsi hatu itxawamakĩ hawenabu Deusbe hãtxashunika shanẽ ibu Seraías inũ, betsa hawenabu Deusbe hãtxashunika shanẽ ibu ha katxu Sofonias inũ, Senhor Deus kẽwãti hiwe hikiti shui beputi mekenikabu dabe inũ besti inũ,

²⁵ detenamenikabu yununika shanẽ ibu beshmas inũ, Judá enabu shanẽ ibuhaira dayashũmisbu 7bu bashikunibu inũ, ha hunĩ detenamenikabu wakĩ hatu katumis shanẽ ibu beshmas inũ, 70 hunibu merabenãmisbu dasibibũ ha mae anushũ unaĩbu Jerusalém anu habu bashikuni hiweabu betxitã

^26-27 atxikĩ hatu itxawashũ mai pakea Hamate anu mae betsa Ribla anushũ Babilônia shanẽ ibuhairatũ hatu manai anu hanu Nebuzaradãnẽ hatu iyushũ hawẽ shanẽ ibuhaira bebũ hatu nitxĩtushia mapuabu hau hatu detekĩ tenanũbũ Babilônia shanẽ ibuhairatũ hatu yunua hawẽ detenamenikabũ ha hunibu dasibi tenã keyunibukiaki. Haska wakĩ Judá enabu atxishũ hatũ mai pakea anua txaihaira hatu iyunibukiaki.

²⁸ Babilônia anu Nabucodonosor shanẽ ibuhairakũkaini ma 7 ano kaĩkĩ ha yurabu Judá enabu hatũ mai pakea anua hatu iyukĩ tananiburã, 3.023 yurabu inibukiaki.

²⁹ Hanua hawẽ shanẽ ibu ana ewakaini Nabucodonosor 18 ano kaitiã Jerusalém anua ana hatu iyukĩ 832 yurabu hatu iyumarianikiaki.

³⁰ Hanua Nabucodonosor shanẽ ibuhairakũkaini ma 23 ano kaĩkĩ hatu yunua Judá enabũ mai pakea anua ana hatu atxitãkĩ 745 yurabu Babilônia anu Nebuzaradãnẽ hatu iyunikiaki. Hati haki dasi wakĩ hatu tananiburã, dasibirã, 4.600 yurabu hatu iyunibukiaki.

Bitxiti hiwe Babilônia anua Joaquim tashnimatã duawanikiaki, na hãtxarã

³¹ Judá enabũ mai pakea anua shanẽ ibu Joaquim iyunibu ma shaba 25 inũ, ushe 12 inũ, ano 37 kainaitiã Babilônia anua shanẽ ibuhaira bena hawẽ kena Evil-Merodaquẽ hatu yunukĩ taewai Joaquimwẽ nuikĩ duawakĩ bitxiti hiwe anua tashnimashũ

³² betxipaiai uĩmakĩ Babilônia anu shanẽ ibubu Nabucodonosorĩ hatu iwemabirãbirãkĩ hatu itxawani Evil-Merodaquebe ha dapi tsaubiabaunabũ hanu shanẽ ibũ tsauti dapi habe ketashamekatsi betsa shekatã hatu binumakĩ ha dapihaira Joaquim tsaũtã

³³ bitxiti hiwe anushũ tari sawemis pekamatã hawẽ shanẽ ibũ tari Joaquim ana sawemakĩ duawakĩ hatishũ hiweaitiã hiwemashũ shaba tibi shanẽ ibuhaira Evil-Merodaquebetã pikubainikiaki.

³⁴ Ha dikabi hatishũ mawariama hiweaitiã pe hiwemakĩ shaba tibi Babilônia shanẽ ibuhairatũ duawai hawẽ hamapai tibi Joaquimnẽ bikubainikiaki.