Gênesis 8 - Kaxinawá Bíblia (BR)

Deusũ henewẽ hatu kupishina netsui eskanikiaki, na hãtxarã

¹ Hanua Noé inũ yuinaka betsa betsapa sharabu shashu nunuti merã Noébe hiweyuabũ Deusũ hatu shinãkĩ hene tsusĩ wãkĩ taewakĩ niwe shũku imaya hene netsui taekainaya

² mai meranua hene ana tueama inũ Deusũ ui nemakĩ nai anuari nese waya

³ hanua hene unãshubira netsui taekainaya hanua 150 shaba binukaini netsukũkaini taei

⁴ hanu ma ushe 7kẽ inũ shaba 17tiã hanu shashu nunuti Ararate Mati tsauakeakea mamaki dakakẽ

⁵ hene ma netsukũkainaya ha ushe tibi tashnikũkainaya 10ki niaya hatiã hawẽ dia ha dukũ taeaya ha mati hawẽ buru keyatapahaira ma tashnia betxitã

⁶ hanua ana 40 dia shaba binuaya hanushũ uĩti shui waima Noẽ bepẽtã

⁷ yuinaka betsa peiya meshupa nitxiã nuya atãkĩ hau hene netsutã tashkayunũ manai ana huamakẽ

^8-9 hanushũ Noẽ ana shinãtã: “Ma mai tsusĩmẽkaĩ, hau hatũri uĩtanũ”, iwanã, Noẽ deiwã nitxiã nuyakauãkĩ uiã dasibi mai anu netsuriamakẽ hani bututima ana txĩtũkirani shashu nunuti anu ana huaya Noẽ hawẽ mekẽ sanãshuna haki tsaua nunuti merã ana bitxitã

¹⁰ hanushũ ana 7 shaba Noẽ manatã deiwã ana nitxiã ka

¹¹ bari kai meshuaya ana deiwã txĩtũkirãkĩ ni pei bei Noéki nukuaya uĩkĩ yuikĩ: “Habaa! Ni pei bena tukũbiranibikaĩ!” hatu wa haskawẽ taea: “Mai tsusĩki”, ikĩ hene ma netsuai Noẽ unãkĩ

¹² ana 7 shaba manatã deiwã ana nitxiã ka ana huama haribi niti inikiaki.

¹³ Hanua Noé 601 ano ma hayakẽ hatiã hene netsui keyukẽ ha haskairã, bari bena ushe ha dukũ dia iki taeaitianã, hawẽ shashu nunuti hawẽ mabepu pekakĩ bepẽ keyutã mai ma tsusiã uĩtã

¹⁴ ana habias bari ushe 2 dia 27 tiã mai ma tãki keyukẽ

^15-16 habiatiãri Deus Noébe hãtxakĩ yuikĩ: “Nunuti anua kaĩrikãwẽ, mia inũ, mĩ aĩ inũ, mĩ bakebu inũ, mĩ babawanã.

¹⁷ Yuinaka pitibu inũ, pitibuma inũ, habu mã ina waisma inũ, habu mã ina wamis yuinaka betsa betsapa tibi inũ, nutawẽ sharai mapumisbu inũ, peiyaburã, dasibi kaĩmariwe, haburi mai hirabi anu hau bua haria bakeyai paritanũbunã”, aka

¹⁸ Noé hawenabube kaiãyã

¹⁹ yuinaka mani betsa tibi shashu nunuti meranua habiaskariai kaĩbainibukiaki.

²⁰ Hanushũ Noẽ Senhor Deus kẽwãkĩ eska wanikiaki. Mishki txi tapu wakĩ mishki itxawakĩ maspu watã yuinaka pitibu betsa betsapa tibi bishũ tesẽshũ txi tapu anushũ menukĩ kua keyuaya

²¹ hawẽ kuĩ nue maiai Senhor Deusũ shetekĩ benimakĩ shinãkĩ: “Hunibu ewariama shinã txakabui taemisbuki. Hunibu ewatã habiaskari ikubaĩmisbuki. Haskabiakẽ hatu kupikatsi ikama ẽ ana mai hatu txakabuwashunama ishanaii, kupikinã. Henewẽ ẽ haska waimarã, mai anu hiweabu dasibi ẽ ana hatu tenãma ishanaii.

²² Hanua mai hirabi pe iyuaya eskayukũkaĩshanikiki. Mibã banati pe inũ yunu tsekati pe ipakeshanikiki. Bari kui inũ matsi ikũkaĩshanikiki, bari pakei inũ ui pakeirã. Shaba hui penai inũ meshu hui bari kairã, haskai dasibi ikũkaĩshanikiki”, inikiaki.