Gênesis 50 - Kaxinawá Bíblia (BR)

¹ hawẽ bake José ikutã tãtsu atã haya kashai

² nesetã hawẽ tsuma Egito nawa huni dauyabũ hau hawẽ yura txaputima wakĩ mekekĩ hau dapushtã tariwẽ dayabushunũbũ José hatu yunua haska hatu yunushu keska washunibukiaki.

³ Egito nawabũ dau txaputimawẽ dapush shũkĩ 40 shaba yura meketi amisbu keska wakĩ ashũtã Egito nawabu dasibi Joséwẽ nuikĩ hawẽ epa Israel shinaĩ 70 dia shaba uĩkubainaibũ

⁴ José kasha nesetã Faraónẽ hiwe anu mekenikabu hatu yuikĩ: —Matu merabewakubaĩkĩ ẽ matu hawa txakabuwaismawẽ taeshũ ekiri shinãkãwẽ, Faraó ea yuishũkinã.

⁵ Ẽ epabe ẽ habe yubakaima ma ea henebaĩshina Canaã anu ẽ mai wai kakatsis ikaii, hari hawenabu mai wamisbu anurã, mai watani ẽ ana txĩtũkatsis ikairã— hatu wa haska Faraó yuishunabu

⁶ hanushũ Faraónẽ José kemakĩ: —Txanima peki. Kashũ mĩ epa mai watãwẽ, haska mĩ epã mia yubashina keskarã— aka

⁷ haska nĩkatã José hawẽ epa mai wai kai habũ merabewai kakĩ txibãbaini Faraónẽ shanẽ ibu beshmas hawẽ hiwe anu habe dayamisbu inũ, shanẽ ibu beshmas Egito anuabu habe bui

⁸ José enabu inũ hawẽ betsabu inũ dasibi hawẽ epã enabu bukĩ Gósen anu hatũ bakebu inũ, hatũ inabu besti bashiyubainaibũ

⁹ habiatiãri cavalo tarãtiyaki yura mirima inũ cavaloki katsaumeabu yurã kaiã mirimabũ José txibaĩ bui

¹⁰ mae Atade anu Hene Jordão anu bari huaikiri hikitã haria Joséwẽ nuihairai habe itxa kashahairakũkaini José hawẽ epa Jacó mai wabaĩtãshanũ ika 7 shaba hawẽ epawẽ nui shinaĩ kashanikiaki.

¹¹ Haskaibũ ha Canaã anu hiweabu habũ uĩkĩ shinãkĩ: “Haskaira Egito nawabu hawenabu mawa mai wai beshiãbu nuitxakatirubumaraka?” iwanã, hanurã, Hene Jordão bari huaikiri ha mae kenakĩ: “Abel-Mizraimki”, anibukiaki, nukũ hãtxawenã, “Egito nawabu Nui Kashatxakatirubumaki”, akinã.

^12-13 Haska hatũ epã hatu yunuima akĩ Hene Jordão pukebaĩ Israelĩ yura Canaã anu bushũ Manre bari huaikiri dapi Macpela bai Heteu nawa Efrom anua hawenabu mawa hanu mai wati tãpe Abraãonẽ bini anu Israel hawẽ bakebũ mai wanibukiaki, ha mai wati mishki tãpe kini meranã.

¹⁴ Hari José hawẽ epa mai watani Egito anu txĩtũkirani hawẽ betsabu inũ ha hatibũ txibãshinabuya hatũ mae anu txĩtunibukiaki.

Joséki hawẽ betsabu dateaibu hatu daewanikiaki, na hãtxarã

¹⁵ Hanua hatũ epa mawaimakẽ José betsabũ shinã txakai yuinamekĩ: “Eskatianã, José nũ itxakahairawaniwẽ taeshunã, nuku danãkĩ nukuri kupihairashanikiki”, ikĩ

¹⁶ hawẽ betsabũ huni betsa yunua kashũ José habũ yuishũkĩ: “Nukũ epa ma mawa kemashũ nuku yunushinarã,

¹⁷ nukũ epã hãtxa ana mia shabakabi yuipa? akĩ eska mia yuikãshuki. ‘Mĩ betsabũ mia nuitapawakĩ mia itxakawanirã, hatuwẽ nuikĩ hatũ txakabukiri ẽ mia yuiai ana shinãyamashãwẽ’, akĩ Jacó nuku mia yuishunimawẽ taeshũ txanima nũ mia itxakawabianikẽ nũ mia yukai nukũ txakabu ana shinãyamawe, nũ mĩ epã mekenika Deusũ tsumabukirã”, ikãshu haska yuiabu José nĩkatã hatuwẽ nui kashaya

¹⁸ hanua hakimamari hawẽ betsabu kayabi bua ha bebũ dashka ikaĩ beua beti ika manishũ yuikĩ: —Nukurã, nũ mĩ escravoki. Nuku haskara wariwe— akabu

¹⁹ hanushũ José hatukiri hawa txakabu shinãma hatu yuikĩ: —Earã, ẽ Deus keskamaki. Ewẽ taea datei meseyamakãwẽ. Ẽ matu kupiamaki.

²⁰ Hakia matunã, txakabu shinãkĩ mã ea itxakawaniki. Haskawẽ taeshũ Deusũ ha txakabu mae wakĩ matu pepawashuniki, natiã mã uiainã. Hati yurabu ewẽ taea mawama hiwekanimẽkainã.

²¹ Haskawẽ taea eki mesei dateyamakãwẽ, matuki pe shinãkĩ matu inũ matũ bakebu ẽ matu pimakĩ hiwemairã— akĩ hãtxa pepawẽ hatu duawakĩ hawẽ betsabu José hatu daewanikiaki.

Haskai hiwea José mawanikiaki, na hãtxarã

²² José inũ hawẽ epã enabu Egito anu hiweyukubainaibũ José 110 bariyatũ

²³ hawẽ bake Efraimnẽ bakebũ bababu uĩyukĩ hawẽ bake betsa Manassésĩ bake Maquirĩ bakebu uĩrianikiaki.

²⁴ Hanushũ José hawẽ betsabu yuikĩ: “Mawakĩ ẽ ma matu shunukatsis ikaii. Ẽ haskabiaya Deusũ matu merabewakĩ Egito anua matunabu tashnimabaĩkĩ hanu nukũ shenipabu Abraão inũ Isaque inũ Jacó ha mai Deusũ hatu yubani anu matunabu iyushanikiki”, iwanã,

²⁵ hawẽ betsabu inũ hatunabu hatu yubakĩ: “Txanima hatiãra Deusũ matu merabewakĩ matu tashnimabainaya nenua ẽ shau ea heneama ea hari bunũbarikãwẽ”, hatu wa nĩkaimabũ hatube hiwea

²⁶ hanua José 110 bariya Egito anua mawa hawẽ yura txaputimawakĩ dauwẽ pusha keyutã yabu pewatã hi bauki hawẽ yura nanenibu hawenabũ hawẽ shau mekekubainibukiaki.