Gênesis 39 - Kaxinawá Bíblia (BR)

Josékiri Potifar aĩ txanitxakanikiaki, na hãtxarã

¹ Ismael nawabũ José bibaĩkĩ Egito anu iyuabu Egito nawa Potifar peiwẽ taeshũ hawẽ dayaru escravo wakĩ José binikiaki. Egito nawa shanẽ ibuhaira Faraónẽ hiwe ewapa hawẽrua anu mekenikabu yunumis hatũ shanẽ ibu Potifar hatũ capitão inikiaki.

² José hawẽ tsuma Potifar hiwe anu dayashunaya Senhor Deusũ merabewaya José hawama pe dayakũkainikiaki.

³ José dayai Senhor Deusũ merabewakĩ pepawamaya hawẽ tsumapã txanima kaneama uĩ

⁴ hawẽ shinã txãkãkĩ hawẽ tsumapã José betxipaihairakĩ duawakĩ haki txiti ikatsi dasibi hawẽ tsumabu inũ hawẽ hiwe anuari mekeshunika wakĩ hawẽ bai inũ hawẽ inabu uinika wakĩ katunikiaki.

⁵ Hanushũ José haska yunuimawẽ taeshũ Senhor Deusũ Potifar duawakĩ dasibi hawẽ hiwe anua inũ hawẽ bai anua pepawakĩ merabewakubainaya

⁶ hawẽ shanẽ ibu Potifar hawẽ tsumabu betsa ana yunuama José bestitũ hau hatu uinũ yunuima hawara hayawẽ ana nuikĩ shinãma hawẽ pitiwẽ besti nuikũkainikiaki, ana hawa meama hiwearã. José hawẽruawẽ taeshũ dasibibũ uĩkĩ betxipaiaibũ

⁷ betsatiã hawẽ tsumapã ainẽ José hawẽrua uĩkĩ hawẽ kemui betxipaikĩ txutamakatsi ikĩ yuikĩ: —Ẽ mia betxipaiaii. Mibe hãtxapa?— aka

^8-9 José nemakĩ: —Miwẽ kemukĩ ẽ mia meamaki. Uiã, ea uinika washũ ẽ tsumapã hawẽ hiwe inũ hawẽ bai ea yunuimaki, hawena dasibi ẽ meke pewashununã. Nenu ea inũ ẽ tsuma nũ habias keskaki. Hawena dasibi yaushiama ea mekemakĩ ea yunuyuimaki. Hakia mia besti ea yunuamaki, mĩ hawẽ ainã. Haskai eiskauã emebi txakabui ẽ daketapatirumaki, Deuskiri txakabuirã— aka

¹⁰ hakia José aĩbu haska wabia hawẽ hãtxa nĩkama haki patapakĩ txutamanũ ishũ hawẽtsaĩs shaba tibi bikawakubaĩbia hawa meama ikũkainaya

¹¹ shaba betsatiã hiwe merã hanu tsua hayamakẽ José dayanũ ika hikiaya

¹² hawẽ tsumapã ainẽ José hawẽ tari txaipa saweawẽ tsumashũ yuikĩ: —Natiã ẽ mia txutamakatsis ikaii. Ea txutawe— abia mekatsi ikama hawẽ tsuma datei kaĩkaĩkĩ hawẽ mekẽ anu hawẽ tari heneshũbaini tashnikainaya

¹³ hawẽ tari tsuma heneshũbaina aĩbu nashuku paepakĩ

^14-15 hawẽ tsuma betsabu hemaĩtĩ anu dayarubu kenashũ hatu yuikĩ: —Uĩkãwẽ. Ẽ benẽ Hebreu nawa bikĩ dayaru escravo waimatũ ea dakewakĩ nukuki hatu kashemaikiki. Ea txutanũ ika hikikaĩ hawẽ tari pekaya ẽ bis itxakayamaya datekĩ hawẽ tari beama kaĩkirãshuki— hatu watã

^16-17 hanua José tari arua ibaikĩ hawẽ bene Potifar huai yuikĩ: —Ha Hebreu nawa mĩ peiwẽ bimatunã, ea txutanũ ika ẽ dĩtu merã hikiaya ebe hikikaĩ ea mepaia

^18-19 datei ẽ bis bis ikaya datekĩ hawẽ tari benubirani hawaira kushikirãshuki— aka hawẽ ainĩ hãtxa nĩkatã Joséki Potifar sinata txakayamakĩ

²⁰ atxishũ bitxiti hiwe anu hatu bitximakẽ Egito shanẽ ibuhaira Faraónẽ yunua ashuãma kaneaibu hatu bitximisbu anu José hatube bitxiti hiwe merã hiweyukẽ

²¹ hanushũri Senhor Deusũ José ana merabewakĩ duawakĩ bitxiti hiwe shanẽ ibu José pe uĩmakĩ betxipaimaya

²² bitxiti hiwe shanẽ ibũ José katukĩ hau merabewanũ yunutã haska washina ha habe bitxiabu dasibibu mekekĩ José hatu yunushũkubainikiaki.

²³ Senhor Deusũ José merabewakĩ hamapai José haska wakĩ pepawakubaĩwẽ taea bitxiti hiwe shanẽ ibu hawẽ dayawẽ ana hawẽ nuiama haki txiti ikũkainikiaki.