Gálatas 1 - Kaxinawá Bíblia (BR)

Paulõ hatukiri xinãnikiaki, na hãtxarã

¹ Jesusũ tsuma kuxipaya betsa earã, ẽ Pauloki. Hawa hunibũ hatũ xinãnẽ katushũ ea yunuama inibuki. Hakia katukinã, Jesus tenãbu hatũ bestẽwani hawẽ Epa Deus inũ ha kayabis Jesusũ hamebi ea katunishũ ea yunukubaĩmisbuki.

² Na nenu hiweshũ dasibi nukũ betsabu Jesus ikũwaĩbubetã hari Galácia mai pakea mae tibi anu mã dasibi nukũ betsabu itxamisbu tibi anua ẽ matu kene bumai uĩkubaũshãkãwẽ.

³ Ẽ kene uĩtã mã haskaya mã unãnuma hiweaibũ Epa Deus inũ nukũ Shanẽ Ibu Jesus Cristo matuwẽ nuikĩ hatũ pepawẽ hau matu duawakubainũbũwẽ.

⁴ Haskakẽ nukũ Epa Deusũ haska xinaĩ keskawẽ nuku ikirã, natiã hiweabũ txakabuhaira wakubainaibube hau nuku kupiyamashanũ haskawẽ taea Jesus Cristo mawai hawẽ hiwea yauxiama nukũ txakabu buanũ ika iniki.

⁵ Haskakẽ nukũ Epa Deus kuxipa hau kẽwãkubainũbũwẽ. Haskakirã.

Deuskiri yusĩa meketi betsa hayamakiaki, na hãtxarã

⁶ Cristo nuikipa pepawẽ taeshũ Deusũ matu katukĩ unãmabianiwẽ taea kanekĩ hawaira henei yusĩa betsaki maekĩ mã harakiri ea xinãtima kayawai e ikĩ ẽ nĩkaii.

⁷ Txanima ẽ matu yuiaii. Yusĩa betsa naeshuma kuxipa hayama keskawẽ matu yusĩkanikiki. Huni betsabu humepakĩ matu parãkĩ Cristõ matu mekeakiri kakape betsa wakĩ habias hãtxawẽ matu yusĩabumaki. Hatũ yusĩa hãtxarã, hamẽ haki beparamekanikiki.

⁸ Haskakẽ tsuãra yusĩa betsa nũ matu yusĩ taewani keskama beshũ matu yusĩaĩburã, Deusũ yupukĩ kupiti wani anu bunũ ika ikanikiki. Haratura xinãma ea kasmai naiuria Deusũ nai tsuma hua hatũ hãtxawẽ txanitxakayuarã, hawa hatu nĩkayamakubaĩshãkãwẽ.

⁹ Ha dukũ ẽ matu yuitani keska na habiatiã ana ẽ matu yuaii: “Tsuabũra yusĩa betsa, hawara mã ikũwãni keskama, habũ matu yusĩkĩ parãkĩ matu betsa wakĩ itxakawaiburã, Deusũ hatu yupukĩ hatu kupiti wani anũ hau meshanũbũwẽ”, iwanã, ẽ matu ana keneshunaii.

¹⁰ Matũmebi xinã pewakãwẽ. Tsua ẽ benimawaimẽkainã? Ea ikirã, yurabu ẽ datã akĩ kẽwãmakatsi ikamaki. Hakia Deus besti datã akĩ ẽ hatu kẽwãmakatsis ikaii, yurabũ hau ea kẽwãnũ hatu abumairã. Haska abuaibu keska ẽ hatubetã pewakeanaii. Hatubetã haska akirã, ẽ Cristõ tsuma ikeanamaki.

Paulo eska ibiani Jesusũ kuxipaya inikiaki, na hãtxarã

¹¹ Ẽ betsabu inũ ẽ puibuũ, matunã, nĩkairakãwẽ. Deusũ yusĩni Jesus mekenãkiri kaka wakĩ datã akĩ ẽ matu yuikubainirã, yurabũ ea hawa tapĩmama inibuki.

¹² Hakia hunibũ katutã ea yusĩabumabiakẽ Jesus Cristo bestitũ ibubis hawẽ meketi shabakabi ea unãmaniki.

¹³ Haskati dabanẽ ẽ Israelĩ babawẽ taeshũ judeubũ beya dasibi txibãkubaĩkĩ Jesus ikũwaĩbu bari betsatiã ẽ hatu itxakahairawakĩ ẽ hatu yamawakĩ keyukatsis ikai mã ekiri nĩkanibuki.

¹⁴ Earã, tsua haskamabiakẽ ẽ shenipabũ beya txibãhairakĩ huni ewai unãnepakĩ betsabu ea keskabu ẽ hatu binuhairakubainiki.

^15-16 Hamẽ judeubumari hau Deusũ hatu kupiyamashanũ nukũ mekenã Messiaskiri eã ẽ hatu yusĩkubaũshanũ ẽ kaĩriamabiakẽ bebũkiri Deusũ ea katuniki. Hanua hawẽ pepawẽ ewẽ nuikĩ ma ẽ huni ewa ea unãmakĩ ana shabakabi ea katushũ hawẽ bakẽ daya ẽ ashũkubaĩshanũ ea kenashũ hawẽ bake ea unãmaniki. Hanushũ hawẽ merabewati hãtxa hau tsuãra ea yusĩnũ yura betsa ẽ hawa yukama iniki.

¹⁷ Ha inũ, Jerusalém anu dikabi Jesusũ kuxipayabube dukũ ẽ hãtxai kayuama iniki. Hakia Damasco mae ewapa leste bari huaikiri Arábia mai pakea anu ẽ katanima haria Damasco anu ẽ ana txĩtũkiraniki.

¹⁸ Ẽ Jesus Cristo ikũwãkĩ taewabainima harishũ ano dabe inun besti nitxĩtã Damasco anu txĩtũkirã Pedro uĩnũ ika Jerusalém anu ẽ ka 15 shaba besti haki bakĩ daewakĩ unãti wai ẽ habe hiweyuniki.

¹⁹ Hakia Jesusũ kuxipaya betsabu uĩyama nukũ Shanẽ Ibũ betsa Tiago besti ẽ uĩrianiki.

²⁰ Deusũ ẽ xinã txanima unãyã ẽ matu keneshũkĩ yuiairã, txanimaki.

²¹ Pedro uĩxina hanua kai mai pakea dabe Síria inũ Cilícia anu ẽ kakẽ

²² hakia Judéia mai pakea anushũ ikũwaĩbu nukũ puibu inũ nukũ betsabũ ea uĩsmabia

²³ tsuãra nĩkashũ hatu yuikĩ: “Paulõ nuku itxakawakubainitũ Jesusũ kakape yamawapaiaya Deus hawẽ nuikĩ huĩti benawaima ikis hawẽ kakape dasibibu yusĩkubaunikiaki”, iwanã, ekiri nĩkakĩ

²⁴ ewẽ taeshũ Deus kẽwãkubainibukiaki.