Êxodo 5 - Kaxinawá Bíblia (BR)

Moisés inũ Arão Faraóbe hãtxanibukiaki, na hãtxarã

¹ Shaba betsatiã Egito shanẽ ibu Faraó anu Moisés inũ Arão kai hikishũ Arãonẽ Moisĩ hãtxa yuishũkĩ: —Israelĩ enabu mekenika Senhor Deusũ hãtxa mia yuinũ ea nĩkawe: ‘Hari tsua hiweabuma anushũ hau enabũ ẽ pepa shinaĩ besi nawatanũbũ hatu nemakĩ bashiyamashãwẽ’, akĩ, mia yuikiki— aka

² hatũ hãtxa nĩkabiakĩ hawa hatu tapĩkatsis ikama Faraónẽ hatu yuikĩ: —Matũ mekenika Senhor Deus tsuamẽ? ha nĩkatã eã Israelĩ enabu ẽ nitxinunã. Ha matũ mekenika ẽ unãma inũ matunabu besi buaibu ẽ hatu nitxiãmahairaki— hatu wa

³ Moisés hawẽ betsa Arãobetã Faraó ana yuikĩ: —Hebreu nawabũ mekenika Deusũ nuku yuimaki. Haskawẽ taea nukũ mekenika Senhor Deus kẽwanũ ika hari tsua hiweabuma anua shaba dabe inũ besti bui hanu hikitã kẽwãkĩ txashuwã itxapa tesẽshũ nũ kuashanaii. Nũ haska wakĩ kẽwãmakẽ nuku kupikĩ tenãtiruki, isĩ paepa tenemaimẽkaĩ, nukuki sinataibũ nupewẽ nuku detetirubumẽkaĩ— aka

⁴ hakia hatũ hãtxa nĩkakatsi ikama hatuki sinatakĩ Egito shanẽ ibũ hatu kũyã akĩ: —Moisés inũ Arãonẽ, haskakĩ matunabu dayabiaibũ hatu itimaska wakĩ mã hatũ daya henemanũ ikai ikai? Nenushũ ea haska yuiama dayaritãkãwẽ— iwanã,

⁵ ana hatu yuikĩ: —Matunabu mirimabũ ea daya txakayamashũbiaibũ haskakĩ mã hatũ daya henemabainũ ika ikai? Burikãwẽ— hatu watã

⁶ habias shabatiã shanẽ ibuhaira Faraónẽ hawẽ yununikabu betsabu Egito nawa inũ betsabu Hebreu nawa habũ hatu dayamakĩ tananikabu hatu itxawatã yuikĩ:

⁷ —Israelĩ enabũ ha hiwe wati mai husikĩ kapãmisbu basi tsusĩ mã hatu pewashuna amisburã, ana hatu inãyamakãwẽ, natiã hau ibubis basi tsusiã itxawatã akubainũbunã.

⁸ Mã hatu inãmabia shaba tibi hati kaĩmakubaĩmisbu hatu henemama ana habiatiri hatu amakubaĩkãwẽ, betsa maewamarã. Natiã txikishkĩ ea ea akĩ: ‘Nukũ mekenika Deus kẽwaĩ kashãpa?’ akĩ ea yukakanikiki.

⁹ Ha huniburã, ana hatu dayama txakayamakubaĩkãwẽ, daya henei beshpakirã Moisés inũ Arãonẽ txani hãtxa hau ana nĩkayamakubainũbunã— hatu wa

¹⁰ hanua Egito nawa yununikabu inũ Israelĩ enabũ hatu dayamakĩ tananikabu mae betsa betsapa anu bushũ Israelĩ enabu hatu yuikĩ: —Faraónẽ nuku yunushurã, matu yuinũ ea nĩkakãwẽ. “Basi tsusĩ txũkish nũ ana matu inãmakiaki.

¹¹ Egito nawabũ basi matu ana pewashunabumakiaki. Natiã haniara ibubis betxitã basi tsusĩ txũkish bitã bitãkĩ mai basi kapãkĩ pewatã hati mã tsusĩ wãmis keska hawa heneyamakãwẽ”, akĩ nukũ shanẽ ibuhairatũ matu yunuikiki. Haskakiaki. Akubaĩkãwẽ— hatu akeakeaibũ

¹² haskakẽ Egito mai pakea hirabi anu basi tsusĩ txũkish itxawakĩ keyushũ bebirã bebiranaibũ

¹³ Egito nawa yununikabũ hatu yunutxakayamakĩ heneama: —Shaba tibi hati nũ matu yunua mã amisti wariakĩ heneama akubaĩkãwẽ, basi tsusĩ txũkish nũ matu inã mã akubaĩmis keska wakinã— akĩ hatu kushabetana yunukubainaibũ

¹⁴ hati amisbuti hayamakẽ Egito nawa yununikabũ Hebreu nawa habũ hatu dayamakĩ tanamisbu yukakĩ: —Haskakĩ uatiã mã akubaĩshina keska ma ana akamamẽ, uatiã inũ ikisrã?— akĩ hatu kusha kusha akabu

¹⁵ haska hatu wabu Hebreubũ hatũ daya tanamisbu dasibi Faraó anu bushũ kashai keskakĩ Faraó yuikĩ: —Shanẽ ibuhairatuũ, haskakĩ mĩ dayarubu mĩ nuku bika tenemai?

¹⁶ Mĩ yununikabũ basi tsusĩ txũkish nuku ana inãmabia haska watã nũ anũ keska nuku yunutxakayamakĩ: “Menã, hawairakãwẽ”, akĩ nuku kushakanikiki. Mĩ yununikabũ nuku kanemakĩ txakabuwamakanikiki, basi nuku ana inãmarã— akabu

¹⁷ hatũ hãtxa danãkĩ Faraónẽ hatu yuikĩ: —Daya itxapa mã hayabia hawawẽ haskatima txikishi maputanũ ika beshũ ea yukakĩ: “Nukũ mekenika Senhor Deus kẽwãtãpa?” ikĩ mã ea yukabirãbiranaii.

¹⁸ Matunabu dayamaritãkãwẽ. Tsuã matu basi tsusĩ txũkish ana inãmabia mã uatiã akubaĩshina keskari habiatiri shaba tibi hatu amakubaĩtãkãwẽ— hatu wa

¹⁹ Hebreubu habũ hawenabu dayamamisbũ hatu hawa betsa washuãma shinaĩ: —Nũ peirawa! Shaba tibi hatishũ nũ daya mirĩtiruma nuku nuitapawaikiki— itã

²⁰ Faraónẽ besuuria tashnibaini Moisés inũ Arãonẽ hatu manai anu hatuki nukutã

²¹ hatuki sinatakĩ habũ yuikĩ: —Nuku bika tenemakĩ hau nuku tenãshanũbũ hawenabu Faraó nukukiri txakabu shinãmakĩ mã hatu nukuki sinatamaii. Mã haska waiwẽ taeshũ Senhor Deusũ matu unãti watã hau matu kupishanũwẽ— hatu watã tashnibainaibũ

Moisés Senhor Deusbe hãtxakĩ yukanikiaki, na hãtxarã

²² huĩti nishmahairatã Moisĩ Senhor Deus yuikĩ: —Senhor Deusuũ, haskakĩ na Israelĩ enabu mĩ hatu nuitapahairawai? Ea haska wakatsi mĩ ea nenu yunuimamẽ?

²³ Mĩ yunua kushipawẽ hushũ ẽ Faraó mĩ kena ẽ haki txanibiashĩkẽ minabu Faraónẽ hawenabubetã ana hatu itxakawa txakayamaikiki. Mĩ hawa hatu mekei nuiamaki— aka