Êxodo 40 - Kaxinawá Bíblia (BR)

Hanu Deuski nukuti tari hiwe menenibukiaki, na hãtxarã

^16-17 Egito anua tashnibiranimabu bari bestitxai nitxĩtã ana bari betsa taekainaitiã ushe ha dukũ taeaitiã inũ hawẽ dia taeaitiã haska Senhor Deusũ Moisés uĩmakĩ yunuima keska wakĩ hanu Deuski nukuti tari hiwe wakĩ nitxĩkĩ taewaima menenikiaki.

¹⁸ Moisĩ Deuski nukuti tari hiwe haska washĩshũ haki taewabaũkatsi hi tuash tsamĩkĩ keyutã hawẽ shau keyã keyutã hanushũ hawẽ txibu tibi beni keyutã

¹⁹ hawẽ tari tuash ewapa itxapa pũte pewakĩ tariwẽ mamaki hatu mabemashũ haska Senhor Deusũ yunuima keska wakĩ Moisĩ hawenabu pũtemabaũkĩ keyutã

²⁰ hanushũ mishki sapa dabe haki hawẽ 10 hãtxa hawẽ yunuti inũ hawẽ nemati ha tibi Deus yubakaima hãtxa Moisĩ bitã bau merã naneshũ hawẽ bakebaĩti hi dabe bau shui anu mistutã hawẽ bepu kenarã, Deus nuiti watã bepukĩ atximatã

²¹ hanu Senhor Deus meribi hawẽ nukuti tari hiwe merã Deus yubakati unãmati aruti bau bitxikĩ hatu tsaũmashũ pakẽkĩ tariwẽ hunekĩ hatu pũtemakĩ habias Senhor Deusũ yuishina keska wakĩ Moisĩ hatu amatã

²² hanushũ hanu Deus haki nukuti tari hiwe uke merã ha dukũ dĩtu anu yusiuri nortekiri hawẽ kẽwãti tapu hatu tsaũmakĩ dĩtu meribi shabakã hatu tsaũmatã

²³ haska Senhor Deusũ yunushina keska wakĩ Deus bebũ pewakĩ hawẽ kẽwãti misi tapu anu mãtxĩkĩ kekũbaĩtã

²⁴ hanushũ betsari haki nukuti tari hiwe uke merã dĩtu meribi anuri tapu bebũ ha dukũ yusmauri sulkiri hawẽ kẽwãti tapu haki bĩ dekuti hatu tsaũmatã

²⁵ Senhor Deusũ uiãyã haska yunushina keska wakĩ hawẽ bĩ tetxiakeakeshũ habiati deku keyutã

²⁶ hawẽ yubani hãtxa unãmati aruti bau haki huneti tari pũtea besuuri ouro mane tapu pishta tsaũshũ

²⁷ hakishũ ni pei inĩti pepa kuati wakĩ haska Senhor Deusũ yunushina keska ni pei inĩti eskarabes Moisĩ kuashũtã

²⁸ hanushũ hawẽ hikiti shui tariwẽ kebẽkĩ tari hatu pũtematã

²⁹ hanushũ haska Senhor Deusũ yunushina keska wakĩ hawẽ hikiti shui besuuri hawẽ kẽwãti txi tapu ewapa benãta hatu tsaũmashũ hanushũ Senhor Deus benimawakĩ kẽwãkĩ inabu tesẽshũ menukĩ shekiwã duru inãkĩ keyunikiaki.

³⁰ Haska hanu Deuski nukuti tari hiwe inũ hawẽ kẽwãti txi tapu ewapa namakis anu hanua txukiti mane kẽtxa ewapa hatu tsaũmashũ haki ũpash hatu manemakĩ matawamakẽ

³¹ haki txukiti ũpashwẽ Moisés inũ Arão inũ hawẽ huni bakebu hutxuki inũ mepanutã

³² txipu haska Senhor Deusũ Moisés yunushina keska wai hanu Deuski nukuti tari hiwe hikikatsi inũ hawẽ kẽwãti txi tapu kemakatsi hatũ tae inũ hatũ mekẽ txukapaunibukiaki.

³³ Hawẽ henekĩ keyukĩ hanu Deuski nukuti hiwe merã hawẽ kẽwãti txi tapu hemaĩtĩ hatu wamatã haki hatu kebẽmabaũkatsi txibu hatu nitxĩmabaũshũ tariwẽ hatu dayabumatã hawẽ hikiti shuiri tari betsawẽ hatu bepumatã hanu Deuski nukuti tari hiwe hirabi Moisĩ meneaya

Hanu haki nukuti tari hiwe Moisés ashũshinanu nai kuĩwẽ hua Senhor Deus butunikiaki, na hãtxarã

³⁴ hawaira hanu haki nukuti tari hiwe anu nai kuĩwẽ bututã Senhor Deus hawẽ kushipawẽ txasha txasha ikĩ tari hiwe merã matahaira wakẽ

³⁵ haska uĩ Moisés haskatã hikitima inikiaki, hanu Deuski nukuti tari hiwe mamaki nai kuĩwẽ atximakĩ keyua Senhor Deus txasha txasha ikĩ matahaira wakenã.

^36-38 Bari itxapa hiwei maekubaunaibutiã Israelĩ enabu dasibibũ uiaĩbũ hanu haki nukuti tari hiwe meranua bariri Senhor Deusũ nai kuĩ mamaki atxima uĩkĩ inũ meshu merã txi here habianuri uĩpaunibukiaki. Hanua hatu maewakĩ iyuaitiã ha nai kuĩ hiwe mamakia benibainaya Israelĩ enabũ hatũ tari hiwe pekatã nai kuĩ txibaĩ ana maekubaĩpaunibukiaki. Hakia nai kuĩ benikainamakẽ hanu niti ika manishũ nai kuĩ beniai Israelĩ enabu kayuama manayukubaĩpaunibukiaki.