Êxodo 24 - Kaxinawá Bíblia (BR)

Deus hatube yubakani hãtxa ana hatu mestẽwãmanikiaki, na hãtxarã

¹ Senhor Deusũ Moisés ana yuikĩ: —Butushũ ẽ hãtxa hatu yuitã Arão inũ, hawẽ huni bake dabe Nadabe inũ Abiú inũ, 70 Israelĩ enabu shanẽ ibubu na ẽ nia anu ana mapekekĩ hatu iweshãwẽ. Habu beaburã, benãta niti itã habũ ea kẽwaĩ hau dãti ishanũbũwẽ.

² Huarã, mia besti mĩ eki kematiruki. Hakia ha mibe mapekeabu ea dapi betirubumaki. Ha dikabi Israelĩ bake betsabũ mia txibaĩ mapeketirubumariki— aka

³ Moisés butushũ Senhor Deusũ yunuti hãtxa inũ hawẽ nemati hatu pewashũshu hawenabu yuia nĩkatã dasibubũ hui bestitxai keskawẽ Moisés yuikĩ: —Hawẽ hãtxa dasibi Senhor Deusũ ma nuku pewashunarã, nĩkatã txibãkĩ nũ akubaĩshanaii— akabu

⁴ hanushũ Senhor Deusũ hawẽ hãtxa dasibi yunushina una merã Moisĩ kene keyutã ushashini penaya butushũ mati tenãmã anu hawẽ kẽwãti mishki txi tapu hatu wamatã Israelĩ 12 huni bake hayani ha tibitũ enabu shukua akeakeabu 12 hawẽ Senhor Deus shinãmati mishki keyatapa meribi Deusuna hatũ kena tibiya txi tapu dapi hatu nitxĩbaũkĩ benimatã

^5-6 hau habũ ina awa Senhor Deus inãkĩ menu keyukĩ Deus daewashũtanũbũ hatira berunãbu Moisĩ yunua ina awa benes itxapa tesẽshũ himi biabu pashkakĩ namakis kẽtxa betsa ewapaki hushketã hanua himi namakis betsa txi tapuki basha basha atã

⁷ haska watã Deusũ yubati hãtxa una bishũ hawẽ hãtxa dasibi hatu yuishuna nĩkatã hanus hãtxakĩ yuikĩ: —Nukuburã, ana nukũ shinanẽ nũ itirubumaki. Haska Senhor Deusũ hawẽ yunuti nuku pewashunai besti nĩkatã nũ ashũkubaĩshanaii— akabu

⁸ hanushũ Moisés himi kẽtxa betsa anua tsumatã ni peiwẽ himi pukushũ hawenabu basha basha akubaũkĩ habiatiãri hatu yuikĩ: —Na yuba hãtxa ẽ matu yuishu na himiwẽ Senhor Deus matube yubakaikiki, na hawẽ hãtxa ẽ matu yuishu tushkutima mã hawẽ shinãpakeshanũbunã— hatu watã

⁹ hanua Arão inũ, Nadabe inũ, Abiú inũ, 70 Israelĩ enabu shanẽ ibubu hatu iyui Moisés ana mapekeshũ

¹⁰ Deusũ tae namã nẽkati safira tapa nãketapa shabakabi nai keska txasha txasha ikihairai anushũ harishũ habũ shenipabu Israelĩ mekenika Deus nia uĩbiaibũ

¹¹ Deusũ hatu kupiama Deus uĩbetanã pikĩ nushukĩ kẽwãkĩ keyutã Moisésbe ana butuaibũ

Moisés Mati Sinai anu ana mapekenikiaki, na hãtxarã

¹² hanushũ Senhor Deusũ Moisés ana yuikĩ: —Neri eanu ana mapekewe. Hanushũ ea manakawe. Hawẽ yunuti inũ hawẽ nemati hãtxa uĩmakĩ mĩ hatu yusĩkubaĩshanũ mĩ huai mishki ture sapa dabeki ẽ ma kenea ẽ mia inãshanaii— aka

^13-15 shanẽ ibu beshmasbu Moisĩ yunukĩ: —Nũ kaya nenushũ ea manayushãkãwẽ, hatiãra ẽ txĩtuainã. Ẽ betsa Arão inũ ẽ txai Hur matube ẽ bashiyubainairã, tsuabura txakabui ha ikaibu ea shanẽ ibushũyukĩ Arão inũ Hurĩ hau hatu pewanũbũ ha dabe anu hatu iyushãkãwẽ— hatu watã hawẽ merabewanika Josué iyui Deusũ mati nai kuĩwẽ atximakẽ namakis anu mapekea

¹⁶ Deusũ kushipa hua niti ika ha Mati Sinai anu 6 dia shaba kuĩwẽ bepukẽ hanua sétimo shabatiã hari kuĩ merãshũ Deusũ Moisés kenaya

¹⁷ hanushũ hatũ tari hiwe dapi mapubaũshũ mati keyatapahaira mamakia Senhor Deusũ kushipa tsuã nematiruma txi here keska hi hi ikai Israelĩ enabũ uiaĩbũ

¹⁸ ana mapekei nai kuinẽ ha mati atxia anu Moisés hikia haria 40 shaba inũ 40 yame Deusbe ikũkainikiaki.