Ester 6 - Kaxinawá Bíblia (BR)

Mardoqueũ Hamã binunikiaki, na hãtxarã

¹ habias meshu merã shanẽ ibuhaira Assuero haskatã ushatirumawẽ taeshũ haska shanẽ ibubũ akubaĩmisbu miyui unaki kenekubaĩmisbu bitãshũ hui kushipawẽ hau yuishunũbũ hatu yunua kashũ bitãshũ miyui kene yui taewakĩ

² shanẽ ibuhaira Assuero detenũ ika shanẽ ibu mekenikabu yununika dabe Bigtã inũ Teres yubakaibu hatũ hãtxa Mardoqueũ hune nĩkatã shanẽ ibuhaira banabimaima ha hakiri keneimabu yuishunabu

³ nĩkatã shanẽ ibuhaira Assuerõ hatu yukakĩ: —Mardoqueũ ea merabewakĩ mekeimawẽ taeshunã, hawa manakukĩ duawakĩ mã inaĩmamẽ?— hatu wa hawẽ merabewanikabũ kemakĩ yuikĩ: —Tsuã nũ hawa washuãmahaira ikimaki— akabu

⁴ hanushũ Mardoqueu teneshkatsi hau anũbũ hatu yunushina anu teneshtiru Assuero yukanũ ika hawẽ hiwe hemaĩtĩ kenekauna anu Hamã dama hikiaya Mardoqueu duawakatsis ikĩ Assuerõ hatu yukakĩ: —Ẽ hiwe hemaĩtĩ anu tsua hushũ ea manaimẽkaĩ?— hatu wa

⁵ uĩtani beshũ hawẽ merabewanikabũ banabimakĩ yuikĩ: —Hamãnẽ mia manaikiki— akabu hatu yunukĩ: —Hau hikinũ itãkãwẽ— hatu wa

⁶ bushũ iwekĩ Hamã bitxiabu shanẽ ibuhairatũ Hamã yukakĩ: —Tsuara shanẽ ibuhairatũ betxipaikĩ duawayarã, haska washũtirubumẽ? Haska mĩ shinaĩ ea yuiwe— aka Hamãnẽ hamebi shinãkĩ: “Tsua shanẽ ibuhairatũ duawakatsi ikimẽkaĩ. Ẽ ea bestiki”, iwanã,

⁷ kemakĩ yuikĩ: —Ha huni duawakĩ

⁸ shanẽ ibũ tari mĩ sawemis hau benũbũwẽ. Mĩ haki katsaumekũkaĩmis cavalo shanẽ ibũ ouro maiti sawea hau berianũbũwẽ.

⁹ Tsuara duawakĩ mĩ kẽwãkatsis ikai mĩ tari sawematã mĩ cavaloki hau katsaumenũ mĩ shanẽ ibubu beshmasbu haratura pepa katushũ mĩ tari inũ mĩ cavalo hau inanũbũ hatu yunuwe. Mĩ tari sawematã mĩ cavaloki katsaũtã maewã Susã namakis hanu itxa hãtxanamemisbu shaba ewapa anu cavalo dispi sheweshekeawẽ iyubaũkĩ hui kushipawẽ: “Ha huni shanẽ ibuhairatũ betxipaikĩ duawairã, naki”, akĩ hawẽtsaĩs habias hau yuikubaunũwẽ— aka

¹⁰ nĩkatã hawẽ hãtxa betxipaikĩ Assuerõ Hamã yunukĩ: —Hawaira kaĩkaini kashũ ẽ tari inũ ẽ cavalo beabu hatu mebĩtã Judeu nawa Mardoqueu ẽ hiwe hemaĩtĩ kenekauana hikiti shui anu ma tsaua iyukĩ habias mĩ yuishu keska wakĩ ea duawashũtãwẽ. Haska mĩ ea yuishu keska ea ashũkĩ hawa kane taskama akĩ keyuwe— aka

¹¹ dakeyabi shanẽ ibũ tari inũ shanẽ ibuhairatũ cavalo hatu mebĩbaĩ Mardoqueu anu kashũ tari sawemashũ cavalo katsaũtã maewã Susã namakis hanu itxa hãtxanamemisbu shaba ewapa anu cavalo dispi sheweshekeawẽ iyubaũkĩ hui kushipawẽ yuikĩ: “Na huni shanẽ ibuhairatũ betxipaikĩ duawairã, ẽ eska washũkubaunaii”, akĩ hawẽtsaĩs yuiyatãkĩ ana iwekẽ

¹² maewã anu imabaũkĩ hatu uĩmakĩ keyutã cavalokia butea shanẽ ibuhairatũ hiwe hemaĩtĩ kenekauana hikiti shui anu Mardoqueu txĩtũkaĩ ana tsauaya Hamã hawaira kaini punu nukahairai dake pae tenei tariwẽ bepukua hawẽ hiwe anu kai hikitã

¹³ dasibi haska watanai hawẽ aĩ Zeres inũ hawẽ haibuaibu hatu yui keyua haska hatu yuia nĩkatã habũ yuikĩ: —Ha Mardoqueurã, Judeu nawarukaĩ. Shanẽ ibuhairatũ Mardoqueu betxipaiaiwẽ taeshũ mĩ kushipa mĩ ma benukĩ taewashuki. Mardoqueu mĩ maematirumaki. Hakia mĩ shanẽ ibu babutã dasibi mĩ benushanaii— akaibũ

¹⁴ hãtxai meneriabumakẽ habiatiãri shanẽ ibuhairatũ dayarubu bei hikishũ piti pepa Esterĩ ma pewa anu hau hawairakiranũ Hamã yuitã iyuabu,