Ester 5 - Kaxinawá Bíblia (BR)

Shanẽ ibuhaira bebũ Ester kanikiaki, na hãtxarã

¹ Shaba dabe inũ besti binutã hawẽ shanẽ ibu tari hawẽrua Esterĩ sawetã shanẽ ibuhairatũ hiwe anu kai hemaĩtĩ kenekauna uke merã hikikaĩ ha shanẽ ibuhaira Assuero hawẽ tsauti anu tsaua ha dĩtu hikiti shui bepeã anu Ester kakaĩ nishũ manaya

² hemaĩtĩ anu hawẽ aĩ kayabi betxitã haska betxipaiai uĩmakĩ hawẽ shanẽ ibu unãti mane ouro mestẽti tsumabaĩmis Assuerõ hakiri sanã Ester tapikaĩ haki kemashũ hawẽ mane ouro mestẽti debu mekĩ detsuãyã

³ hanushũ hawẽ aĩ kayabi Assuerõ yukakĩ: —Esterĩ, mĩ haskara huamẽ? Mĩ hawa betxipai huamẽ? Ẽ shanẽ ibũ yunumis namakis pashkatã kasmai hawara mĩ ea yukai ẽ mia ha inãtiruki— aka Esterĩ kemakĩ yuikĩ:

⁴ —Mia ha pimakĩ kẽwãkatsi piti inũ nushuti pepa ma ẽ pewabiranaii. Natiã ebetã pikatsis ikinã, Hamãri mĩ iyutiruki— atã tashnikainaya hanushũ hawẽ dayarubu Assuerõ yunukĩ:

⁵ —Haska Esterĩ ea yubashu hau ebetã pi kanũ Hamã hawaira benatãkãwẽ— hatu wa bushũ Hamã itanabu hawẽ aĩ kayabi Esterĩ ma piti pewashuna anu Assuero inũ Hamã bui hikishũ piaibũ shanẽ ibuhaira Assuerõ Ester yuikĩ: —Hawara mĩ ea yukakatsis ikai ea yukawe. Ẽ shanẽ ibũ yunumis namakis pashkatã kasmai hawara mĩ ea yukai ẽ mia ha inãtiruki— aka

⁷ Esterĩ kemakĩ yuikĩ: —Eã eska besti shinãkĩ ẽ mia yukaii.

⁸ Ea betxipaikĩ ea uĩmakĩ ashũkinã, hawara ẽ mia yukai mĩ ea ashũshanimẽkaĩ. Mia kẽwãkĩ piti ẽ ma pewa meshukiri ebetã pi mia inũ Hamã mã ana hutiruki. Habiatiãri haska mĩ ea yukashu ẽ mia yuishanaii— aka pikĩ keyutã tashnibainaibũ

Hakishũ Mardoqueu teneshkatsi Hamãnẽ hatu pewamanikiaki, na hãtxarã

⁹ pikĩ yaniwatã Hamã benimai pepe kainaya dasibibu haki dãti iki tinĩkubainaibũ hakia shanẽ ibuhairatũ hiwe hemaĩtĩ hikiti shui anu Mardoqueu tsaua hawa tukukauani beniama Hamãnẽ Mardoqueu haskashunai daĩbaĩkĩ uĩbaini haki sinatahairabiakĩ

¹⁰ haska sinatai Hamãnẽ tsua uĩmama kai hawẽ hiwe anu hikitã hau hawẽ aĩ Zeres inũ hawẽ haibuaibu hatu kenatanũbũ hawẽ tsumabu yunua

¹¹ bushũ hatu yuiabu dasibi bei haki nukui itxaibũ ibubis kẽkĩ hatu yuikĩ: —Mabu inũ pei mirima ẽ hayaki. Ẽ bakebu itxapaburi ẽ hayaki. Shanẽ ibuhaira merabewanikabu inũ hawẽ shanẽ ibubu beshmasbu ea hatu binumakĩ ẽ habetã yunukubaĩshanũ shanẽ ibuhaira Assuerõ ea katuima ea besti ẽ pehairaki— itã

¹² ana kẽkĩ hatu yuikĩ: —Ha dikabi kẽwãkĩ piti inũ nushuti pepa shanẽ ibuhaira Assuero amakĩ ẽ habetã pinũ hawẽ aĩ kayabi Esterĩ ea besti kenashũ pimashuki. Hakia haska bestima meshukiri nuku pimakatsis ikĩ ea ana yubashuki.

¹³ Hakia shanẽ ibuhairatũ hiwe hemaĩtĩ kenekauna hikiti shui anu ha Judeu nawa Mardoqueu tsaua ẽ uĩtãtanairã, ha dasibi haska sharabu pepakiri ẽ matu yuiairã, enarã, hawamahairaki— hatu wa

¹⁴ nĩkatã hawẽ aĩ Zeres inũ hawẽ haibuaibu dasibibũ yuikĩ: —Hakishũ teneshti hi keyatapa 20 metro hau anũbũ ikis hatu yunuwe. Ma haska wakĩ mia keyushunabu meshukiri penama Mardoqueu mĩ hakishũ teneshtiru shanẽ ibuhaira yukashãwẽ. Mia betxipaikĩ hawara mĩ yuka mia amashanikiki. Mardoqueu ma hatu teneshmatã ana hawa shinaĩ bika teneama shanẽ ibuhairabetã pi mĩ katiruki— akabu haska shinãkĩ yuiaibuwẽ taeshũ Hamã benimahairakĩ hawẽ teneshti keyatapa hau anũbũ hatu yunukẽ