Ester 3 - Kaxinawá Bíblia (BR)

Mardoqueu inũ Hamã eskanibukiaki, na hãtxarã

¹ Ushe betsatiã Agaguẽ enabu Hamedatã huni bake Assuerõ Hamã shanẽ ibu beshmasbiakẽ ana hawẽ shanẽ ibu shekakĩ katukĩ shanẽ ibuhaira merabewai yununikabu dasibi hanu yunubaunai anu hatũ shanẽ ibu washũ

² Hamã huaya shanẽ ibuhairatũ hiwe ewapa anu dayamisbu dãti itã tinĩshũ hau kẽwãkubaĩshanũbũ shanẽ ibuhairatũ hatu yunushinawẽ taeshũ hawenabũ haska wabiakubainaya hakia Hamã huaya Mardoqueũ kẽwaĩ haki dateama hawa ha bebũ haki dãti iki tiniãma ikũkainaya

³ hanushũ shanẽ ibuhaira dayashũmisbũ Mardoqueu yukakĩ: “Hamã kẽwãma haskakĩ shanẽ ibuhairatũ hãtxa txibãkĩ mĩ ishuãmamẽ?” ikĩ

⁴ shaba tibi habias yukakubainabu hakia Mardoqueũ hatu nĩkama ikũkainaiwẽ taeshũ Mardoqueu habũ yunumis haskai ikũkainai tapĩtã hawẽ shinã betsa wamanũ ika Hamã anu bushũ yuikĩ: “Judeu nawa Mardoqueũ mia kẽwaĩ dãti ikamaki”, akabu

⁵ nĩkatã shinãkĩ: “Txanima ẽ daĩbaina eki dãti iki Mardoqueu tinĩshũ ea kẽwaĩsmaki”, iki Hamã sinatahairakĩ:

⁶ “Mardoqueu Judeu nawakiaki”, iwanã, ma yuiabuwẽ taeshũ Mardoqueu besti kupikatsi ikama hakia hanu Assuerõ hatu yunubaũmis anu hiweabu Judeu nawabu dasibi tenãkĩ hatu keyushanũ, iwanã, Hamãnẽ hatukiri shinãkĩ taewaya

Judeu nawabu dasibi hau yamawashanũbũ Hamãnẽ hatu yununikiaki, na hãtxarã

⁷ Assuero shanẽ ibukũkaini ma 12 ano taekainaya ha dukũ ushe hawẽ kena Nisã anushũ Hamãnẽ mukayabu itxawashũ Judeu nawabu dete keyukĩ hau hatu yamawashanũbũ haratura ushe inũ shaba haratura atirubu unanũ, iwanã, mukayabũ hawẽ hamapai unãti shau meshte númeroya dabe hau putanũbũ hatu yunua hawẽ unãti putabu ushe 12 hawẽ kena Adar hawẽ shaba 13 hatu unãti wamai tashnia uĩtã katuabuwẽ taeshũ

⁸ Assuero anu kai hikishũ Hamãnẽ yuikĩ: —Província tibi hanu mĩ hatu yunukubainai anu hiweabube husia yura shuku betsa hiwekubaĩmisbu hatũ beya betsabũ beya keskama ha dikabi haska mĩ yunua nĩkakĩ aisbumaki. Hanu mĩ yunumis anu hiwekubainaibu minarã, haska pemaki.

⁹ Haskawẽ taeshũ hau hatu yamawashanũbũ miã haska pe mĩ shinainã, yunukĩ província tibi anu mĩ hatu banabima keyubaũtiruki. Mĩ haska yunuaya hanu mĩ mabu inũ mĩ pei mekemisbu hiwe anu 330.000 quilo mane prata has bushũ ẽ hatu mia arumashũshanaii, inãkuĩkinã— aka

¹⁰ haska wa nĩkatã hawẽ meitxikiti kena neya metsekeshũ Judeu nawabuki sinatai Hamã inãkĩ

¹¹ yuikĩ: —Peki. Mane prata mĩ ea inãnũ ika ikairã, ẽ biamaki. Minaki. Hakia ha nawa betsa shukuabukiri mĩ ea yuishu haska mĩ hatu akatsis ikai keska ashãwẽ— aka

¹² kaĩkaĩ ha habias shabatiã ushe ha dukũ Nisã shaba 13tiã shanẽ ibuhairatũ keneshunika itxapa kenakĩ Hamãnẽ hatu itxawashũ maewã yununika tibi inũ, província yununika tibi inũ, yura shukuabu shanẽ ibubu tibi hawẽ yunuti hãtxa hau hatu kenenũbũ Hamãnẽ hatu yunua província tibi inũ, yura shukuabu tibitũ hãtxa inũ, haska kenemisbuwẽ Hamãnẽ yunuti hãtxa keneabu shanẽ ibuhaira Assuero hawẽ kena keneshũkĩ shanẽ ibuhairatũ meitxikiti kenayawẽ kene tibi Hamãnẽ netãkĩ tsamĩpakekĩ keyutã

¹³ hanu Assuerõ yunuai anu hiweabu tibi anu kene bunikabu yunuti hãtxa bumakeakekĩ ushe 12 hawẽ kena Adar shaba 13tiã hanu Judeu nawabu berunãbu inũ, txipashbu inũ, anibu inũ, yushabu inũ, bake mishtĩbu inũ, aĩbuaibu dasibi habias shabatiã hatu detekĩ yamawatã hatũ mabu sharabu hayabu hau bishanũbũ Hamãnẽ hatu yununikiaki.

^14-15 Shanẽ ibuhairatũ hatu yunuawẽ taea kene bunikabu hawaira kaĩbaini bushũ yununika tibi inũ shanẽ ibubu tibi hawẽ yunuti hãtxa hatu inãbaunabu ha shabatiã Judeubu dasibi detekatsi hau pewanũbũ província tibi anu inũ yura shukuabu dasibi tibi anu hatu banabimakĩ keyutã hanushũ hanubi shanẽ ibuhairatũ mae ewapa Susã anu habias yunuti hãtxa hatu banabimariabaunabu, yura itxapa haskatima itimaskabaunaibũ hakia unanuma shanẽ ibuhaira Assuero inũ Hamãnẽ uva vinho akaibũ,